ديماش قۇدايبەرگەننىڭ ورىنداۋىنداعى «دايديداۋ» ءانى الەمدىك راديو جۇيەسىنە ەنگىزىلدى - كەسكىن
بۇل ديماشتىڭ ورىنداۋىنداعى ءاندى حالىقارالىق راديو جۇيەسىندەگى جۇزدەگەن ەلدىڭ تۇرعىندارى تىڭداي الادى دەگەن ءسوز. بۇل ءسۇيىنشى حاباردى بىزگە قازاقستان رەسپۋبليكاسىنىڭ مادەنيەت قايراتكەرى قانات ايتبايەۆ جەتكىزدى، دەپ جازادى «اقتوبە» باسىلىمى.
ق. ايتبايەۆتىڭ ايتۋىنشا، حالىقارالىق راديو وكىلدەرى «قازاق» راديوسىنا ۇسىنىسپەن شىعىپ، قازاق حالقىنىڭ ۇلتتىق بولمىسىن كورسەتەتىن ءان سۇراعان.
«بىزگە حات كەش جەتكەن بولۋى كەرەك، الدە ءبىر جەردە كىدىرىپ قالدى ما، ايتەۋىر، بۇل جاقسى حاباردى بىزگە لەۆ گۋميلەۆ اتىنداعى ەۋرازيالىق ۇلتتىق ۋنيۆەرسيتەتىندە قىزمەت ەتىپ جاتقان جاستار جەتكىزدى. اتالعان ۋنيۆەرسيتەتتە جۇمىس ىستەيتىن ۇشقىن سايدراحمان دەگەن جىگىت حالىقارالىق ەۆرو راديوسىنا ءبىر ءان ۇسىنۋىمىزدى سۇرادى. وعان مالايزياداعى ازيا- تىنىق مۇحيتى حابار تاراتۋ وداعى شتاب-كۆارتيراسىنىڭ قىزمەتكەرى نۇرزادا كۇمىسبەك قولقا سالىپتى. ۇشقىن قاجەتتى قۇجاتتاردى شەت تىلىندە تولتىرىپ، سونىڭ كومەگىمەن ديماش قۇدايبەرگەننىڭ ورىنداۋىنداعى حالىق ءانى «دايديداۋدى» ۇسىندىق. ءان بارلىق تالاپتارعا ساي كەلگەن. الىبەك دىنىشەۆتىڭ ورىنداۋىنداعى حالىق ءانى «اقباقايدى» ۇسىنۋ تۋرالى دا پىكىرلەر بولدى. دەگەنمەن ويلاسا كەلە «دايديداۋدى» جىبەرۋدى ءجون كوردىك»، - دەيدى «قازاق» راديوسىنىڭ «التىن قورىنىڭ» مۋزىكالىق رەداكتورى گاۋھار قوزىبايەۆا.
ماسەلەنىڭ ءمانى بىلاي: 13 -اقپان - حالىقارالىق راديو كۇنى. بۇل كۇندى تويلاۋ 2011 -جىلى يۋنەسكو-نىڭ شەشىمى بويىنشا قابىلدانعان جانە 2012 -جىلى العاش رەت اتاپ وتىلگەن. وسى مەرەكەگە بايلانىستى ەۋروپا حابار تاراتۋ وداعى مەن ازيا تىنىق مۇحيتى حابار تاراتۋ وداعى بيىل حالىقارالىق ەۆرو راديوسىنىڭ ارناسىندا «80 مينۋتتا بارلىق الەم» اتتى ءىس- شارا ۇيىمداستىرماق. بۇل شارا بارىسىندا راديو جەلىسىنەن وسى حابار تاراتۋ جەلىلەرىنە مۇشە ەلدەردىڭ بارلىعىنىڭ سول ەلدىڭ مادەنيەتى مەن بولمىسىنان حابار بەرەتىن ۇلتتىق اندەرى شىرقالاتىن بولادى. سول اندەر قاتارىنا بيىل تۇڭعىش رەت قازاق ءانى ەنگىزىلدى: ديماشتىڭ ورىنداۋىنداعى «دايديداۋ» ءانى!
قانات ايتبايەۆتىڭ ايتۋىنشا، ديماشتىڭ ورىنداۋىنداعى بۇل ءان بەلگىلى ارانجيروۆشيك باقىتبەك زەينەلوۆتىڭ وڭدەۋىندە جىبەرىلدى. ۆيكيپەديا ەركىن-ەنسيكلوپەدياعا سەنسەك، ەۋروپا حابار تاراتۋ وداعى مۇشەلىگىندە ەۋروپا، سولتۇستىك افريكا جانە تاياۋ شىعىستاعى 56 ەلدىڭ 72 كومپانياسى، ال ازيا- تىنىق مۇحيتى حابار تاراتۋ وداعىندا ازيا-تىنىق مۇحيتى اۋماعىنىڭ 57 ەلىندەگى 72 كومپانيا بار. ەكى وداقتىڭ الەۋەتتى اۋديتورياسى - كەمىندە 4 ميلليارد ادام. بۇل - ديماشتىڭ ورىنداۋىنداعى قازاقتىڭ حالىق ءانىن جارتى الەم تىڭدايدى دەگەن ءسوز.
ايتپاقشى، قانات ايتبايەۆ تاعى ءبىر جاقسى جاڭالىقپەن ءبولىستى. كوكتەمدە ديماش تۇركى مادەنيەتىن جانە ونەرىن دامىتۋ حالىقارالىق ۇيىمىنىڭ مۇرىندىق بولۋىمەن ا ق ش- تىڭ ۆاشينگتون، نيۋ-يورك قالالارىندا وتكىزىلەتىن شارالارعا رەسمي شاقىرتۋ العان.
