قىتايداعى قازاق جازۋشىلارى «ءدۇلدۇل» سىيلىعىمەن ماراپاتتالدى
اتالعان ماراپاتتاردىڭ ىشىندە قازاق-قىرعىز ادەبيەتىنىڭ «ءدۇلدۇل» سىيلىعى، ۇيعۇر ادەبيەتىنىڭ «حانتاڭىرى» سىيلىعى جانە موڭعۇل ادەبيەتىنىڭ «التىن ۇزەڭگى» سىيلىقتارى بار.
«ءتاڭىرتاۋ» تورابىنىڭ مالىمەتىنە سۇيەنسەك، ۇرىمجىدە وتكەن جينالىسقا شىڭجاڭ ادەبيەت-كوركەمونەرشىلەر بىرلەستىگىنىڭ ءتوراعاسى ازات سۇلتان، قۇرمەتتى ءتوراعا، اقىن شاكەن وڭالبايەۆ، جازۋشى، اعا زەرتتەۋشى جاقىپ مىرزاقان ۇلى، ىلە قازاق وبلىستىق ادەبيەت-كوركەمونەرشىلەر بىرلەستىگىنىڭ ءتوراعاسى باقىت مىرزا قاتارلى باسشىلار مەن قالامگەرلەر قاتىسقان.
ەكى جىلدا ءبىر تابىستالاتىن سىيلىقتارعا ۇيعۇر تىلىنەن 11، قازاق تىلىنەن 5، قىرعىز جانە موڭعول تىلدەرىنەن 2 تۋىندىدان يە بولىپتى.
ال، «ءدۇلدۇل» ادەبيەت سىيلىعىن العان قازاق قالامگەرلەرى تومەندەگىدەي: «التاي اياسى» جۋرنالى ۇسىنعان جازۋشى، دراماتۋرگ، اقىن كوبەن اسقار ۇلىنىڭ «نايزاعاي - جىر، جىر - نايزاعاي» پوەماسى، «شۇعىلا» جۋرنالى رەداكسياسى اتىنان اۋدارماشى ابدىلدابەك اقىشتاي ۇلىنىڭ «لۋشۇن جانە اباي» اتتى ماقالاسى، «تارباعاتاي» جۋرنالى رەداكسياسى ۇسىنعان جازۋشى قيداش جۇبانىش ۇلىنىڭ «بابانىڭ كوزى» اتتى اڭگىمەسى، ىلە حالىق باسپاسى جولداعان جازۋشى قۇماربەك جۋانعان ۇلىنىڭ «ەرتىستىڭ ار جاعىنا كوردىم سەنى» رومانى، «ىلە ايدىنى» جۋرنالى رەداكسياسى جولداعان جاس اقىن مۇرات اۋەستىڭ «سام جامىراپ كەلەدى» اتتى ولەڭى بۇل جولعى ماراپاتقا لايىق دەپ تانىلعان. سونىمەن قاتار، ءارقايسى جۇلدەگەردىڭ الدىنا 20 مىڭ، قالعاندارىنا 15 مىڭ يۋاننان اقشالاي سىيلىق بەرىلدى. وسىمەن 19- رەت وتكىزلىپ وتىرعان ماراپاتتاۋ جيىنى قازىرگە دەيىن مىڭعا تارتا تالاپتى جاستار مەن تالانتتى اقىن-جازۋشىنىڭ شىعارماسىن ءادىل تارازىلاپ، ءوز باعاسىن بەرىپ كەلەدى.
Baq.kz
