ماسكەۋدە قازاقستاننىڭ ساۋدا ءۇيى اشىلدى
جوبانى رەسەيدەگى قازاقستان ەلشىلىگىنىڭ جانە ساۋدا وكىلدىگىنىڭ قولداۋىمەن «KazFood» برەندىمەن «پريزما گرۋپپ» كومپانياسى ۇيىمداستىرىپ وتىر.
ساۋدا-كورمە زالىنىڭ سالتاناتتى اشىلۋ راسىمىنە وڭتۇستىك قازاقستان وبلىسى اكىمىنىڭ ورىنباسارى ساپاربەك تۇياقبايەۆ، قازاقستاننىڭ رەسەيدەگى ساۋدا وكىلىنىڭ ورىنباسارى گۇلجان بودىقوۆا، «فۋد سيتي» اگروكلاستەرىنىڭ باس ديرەكتورى ومار ابراموۆ، رەسەيلىك بيزنەس جانە قازاقستاندىق كاسىپورىن وكىلدەرى قاتىستى.
سالتاناتتى شارا بارىسىندا ءسوز العان و ق و اكىمىنىڭ ورىنباسارى س. تۇياقبايەۆ ماسكەۋدىڭ ءىرى ساۋدا ورتالىعىندا وڭتۇستىك قازاقستاننىڭ تۇراقتى جۇمىس ىستەيتىن كورمە ورتالىعىنىڭ اشىلۋى قازاقستاندىق جانە رەسەيلىك تاراپتىڭ ۇزاق ۋاقىتتان بەرى جۇرگىزگەن جۇمىسىنىڭ ناتيجەسى ەكەندىگىن اتاپ ءوتتى. «پاۆيلوندى اشۋداعى ماقسات قازاقستاندىق وندىرۋشىلەردىڭ ونىمدەرىن تانىستىرۋ. رەسەي استاناسىنىڭ بارلىق ءىرى ساۋدا جەلىلەرى مەن مەيرامحانا بيزنەسى تاۋارلارىن وسى ورتالىقتان ساتىپ الادى. وسىلايشا، ءبىزدىڭ وتاندىق وندىرۋشىلەرگە ماسكەۋ نارىعىنا جول اشىلدى»، - دەدى س. تۇياقبايەۆ.
ونىڭ اتاپ وتۋىنشە، الداعى ۋاقىتتا جەمىس-جيدەك، ەت-ءسۇت ونىمدەرىن، توقىما بۇيىمدارىن ماسكەۋ نارىعىنا جەتكىزۋ جوسپارلانعان. سونداي-اق ماسكەۋدە قازاقستاندىق ونىمدەر ساتاتىن شاعىن دۇكەندەر جەلىسىن اشۋ دا كوزدەلىپ وتىر.
قازاقستاننىڭ رەسەيدەگى ساۋدا وكىلىنىڭ ورىنباسارى گ. بودىقوۆا دا ءوز سوزىندە اتالعان جوبانىڭ بولاشاعى زور ەكەندىگىن اتاپ ءوتىپ، ونىڭ قازاقستاندىق دايىن ءونىمدى ەكسپورتقا ىلگەرىلەتۋگە ءوز سەپتىگىن تيگىزەتىندىگىن ايتتى. ونىڭ سوزىنە قاراعاندا، جىل بويى قازاقستاننىڭ رەسەيدەگى ساۋدا وكىلدىگى ماسكەۋدە، ماسكەۋ وبلىسىندا جانە رەسەيدىڭ باسقا دا وڭىرلەرىندە تاعى دا 12-14 دۇكەندەر مەن ساۋدا الاڭدارىن اشۋدى جوسپارلاپ وتىر.
«وڭتۇستىك قازاقستان» پاۆيلونىندا ازىرشە قازاقستاندىق ءونىمنىڭ 24 ءتۇرى عانا قويىلعان. دەگەنمەن تاياۋ ارالىقتا جوباعا قاتىسۋشىلار تاۋار تۇرلەرىن جۇزگە جەتكىزۋدى جوسپارلاپ وتىر.
