الماتى پوليتسەيلەرى قالا كوشەلەرىندە جول قوزعالىسى ەرەجەسىن ساقتاۋدى قاتاڭ باقىلاۋدا

بۇل تۋرالى بۇگىن الماتى قالالىق ءى ءى د باسپا ءسوز قىزمەتى حابارلادى.

ۇستىمىزدەگى جىلدىڭ 19-21- قاڭتارى ارالىعىندا الماتى قالاسىندا رەسپۋبليكالىق «اۆتوبۋس» جەدەل-الدىن الۋ شاراسى وتكىزىلدى.

شارا بارىسىندا قالاداعى اۋداندىق ءى ءى ب اكىمشىلىك پوليتسيا بولىمدەرى مەن جول-تەحنيكالىق ينسپەكتسيا بولىمدەرىنىڭ قىزمەتكەرلەرى جانە جول- پاترۋلدىك پوليتسيا پولكىنىڭ ساپتىق بولىمشەلەرى جول قوزعالىسى ەرەجەسىن ورەسكەل بۇزعان اۆتوبۋس جۇرگىزۋشىلەرىنە قاتىستى 282 اكىمشىلىك حاتتاما تولتىردى.

ولاردىڭ ىشىندە اۆتوبۋستاردىڭ تۇتىنىندە كومىرتەك توتىعى(CO) مەن كومىرسۋتەكتىڭ (CH) نورمادان جوعارى بولعاندىعى ءۇشىن - 54 جۇرگىزۋشى، اۆتوبۋستىڭ زاڭسىز تۇردە قايتا جابدىقتالعانى ءۇشىن - 6، ءجۇرىپ كەلە جاتىپ ۇيالى تەلەفونمەن سويلەسكەندىگى ءۇشىن - 62، جولاۋشىلار مەن جولجۇكتى الىپ ءجۇرۋ ەرەجەسىن بۇزعاندىعى ءۇشىن - 8 جانە مانيەۆر جاساۋ ەرەجەسىن بۇزعاندىعى ءۇشىن - 64 جۇرگىزۋشى جاۋاپقا تارتىلدى.

«قازىرگى تاڭدا الماتى قالاسىنىڭ ىشكى ىستەر دەپارتامەنتى قالا كوشەلەرىندە جول قوزعالىسى ەرەجەسىن ساقتاۋدى قامتاماسىز ەتۋگە باعىتتالعان ءتيىستى شارالاردى جۇزەگە اسىرىپ جاتىر. بۇل جەردە جولاۋشىلار تاسىمالداۋمەن اينالىساتىن اۆتوكاسىپورىندارعا دا ءتيىستى تالاپتار قويىلۋدا. بۇگىنگى تاڭدا قالامىزدا 21 اۆتوكاسىپورىن جۇمىس ىستەيدى. ولاردىڭ قاراماعىندا 1638 اۆتوبۋس بار. ال بۇل اۆتوبۋستار -112 باعدار بويىنشا جولاۋشى تاسىمالداۋ ىسىنە قولدانىلادى. 2015-جىلدىڭ 12 ايى ىشىندە ءى ءى د جەكە قۇرامى اۆتوبۋس جۇرگىزۋشىلەرىنىڭ 1825 رەت جول قوزعالىسى ەرەجەسىن بۇزعاندىعىن تىركەدى»، - دەدى وسىعان وراي الماتى قالالىق ءى ءى د اكىمشىلىك پوليتسيا باسقارماسى باستىعىنىڭ ورىنباسارى، پوليتسيا پولكوۆنيگى جاندوس مۇراتاليەۆ.

ودان باسقا، الماتى قالاسى بويىنشا مەملەكەتتىك كىرىستەر دەپارتامەنتىنىڭ قىزمەتكەرلەرىمەن بىرگە 9 رەت زاڭسىز جولاۋشى تاسىمالدانعاندىعى انىقتالدى. ءار ءتۇرلى جول قوزعالىسى ەرەجەسىنىڭ بۇزىلۋىنا سەبەپشى بولعان 10 قوعامدىق كولىكتى پايدالانۋعا تىيىم سالىندى.

«اۆتوبۋس» جەدەل-الدىن الۋ شاراسىن وتكىزۋدەگى ماقسات - قالا كوشەلەرىندە جول- كولىك اپاتتارىن ازايتۋ جانە الدىن الۋ»، - دەدى پولكوۆنيك مۇراتاليەۆ.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى