ەلىمىزدىڭ قۇرىلىس سالاسىندا حالىقارالىق ستاندارتتار ەنگىزىلۋى مۇمكىن
القا ءماجىلىسى بارىسىندا ۇلتتىق پالاتاداعى قۇرىلىس سالاسىنا جاۋاپتى كوميتەت ءتوراعاسى الەكساندر بەلوۆيچ ەلىمىزدەگى بيزنەستى جۇرگىزۋ پراكتيكاسىنا FIDIC (Federation Internationaldes Ingenieurs-Conseils- حالىقارالىق قۇرىلىس ستاندارتتارى) ستاندارتتارىن مەردىگەرلىك كەلىسىمشارتتارمەن قاتار قولدانۋدى ۇسىندى. ونىڭ ايتۋىنشا، 2013 -جىلى اتالعان ستاندارت ەلىمىزدەگى رەسپۋبليكالىق ماڭىزعا يە اۆتوجولدارعا ەنگىزىلگەن.
«بۇل ستاندارت جەكە جانە ونەركاسىپتىك قۇرىلىستاردا قولدانۋعا ابدەن بولادى، ول الەم ەلدەرىندە كەڭىنەن قولدانىلۋدا. ستاندارتتاردا ساپا جونىندەگى ينجەنەردىڭ جوعارى جاۋاپكەرشىلىگى، اتقارىلاتىن جۇمىستار اۋقىمى قاراستىرىلادى.
سونىمەن قاتار، قۇرىلىس ماتەريالدارى مەن قوندىرعىلارعا قاتىستى نارىقتاعى باعا قۇبىلۋلارىنا جەدەل دەن قويۋ، قۇرىلىس سالاسىنداعى جۇمىستاردىڭ مەرزىمگە ساي اتقارىلماعاندىعى ءۇشىن ايىپپۇل سانكتسيالارى دا وسى ستاندارتتاردا قامتىلعان»، - دەدى الەكساندر بەلوۆيچ.
ونىڭ ايتۋىنشا، FIDIC كەلىسىمشارتتارى قۇرىلىسقا قاتىسۋشى مەردىگەرگە دە تاپسىرىس بەرۋشىگە دە ادىلەتتى بولماق. ونىڭ ۇستىنە اتالعان ستاندارتتار قازاقستان رەسپۋبليكاسىنىڭ جەكە ينسۆەستورلار مەن حالىقارالىق قارجىلىق ينستيتۋتتار ەسەبىنەن سالىناتىن نىساندار بويىنشا حالىقارالىق قۇرىلىس تەندەرلەرىن وتكىزۋ بارىسىندا دا ماڭىزدى ءرول اتقارادى.
ءوز سوزىندە تيمۋر قۇلىبايەۆ قۇرىلىس سالاسىندا داعدارىسقا قارسى شارالاردى قامتۋ جانە سەكتوردى قارجىلاندىرۋدى ىنتالاندىرۋ ماسەلەسىنىڭ ماڭىزىنا توقتالدى.
اۆتور: قانات مامەتقازى ۇلى
