اسا اۋىر سالماقتاعى شەتتەن كەلگەن قانداسىمىز كاسىپقوي بوكسقا اۋىسىپ كەتتى

سولاردىڭ ءبىرى - اسا اۋىر سالماقتاعى رۋسلان مىرساتايەۆ.

مىرساتايەۆ بوكس جانكۇيەرلەرىنە جاقسى تانىس. ول 1985-جىلى مامىردىڭ 7- كۇنى قىرعىزستاندا دۇنيەگە كەلىپ، 2005-جىلى اتا-جۇرتىنا قونىس اۋدارعان قانداستارىمىزدىڭ ءبىرى.

رۋسلان ەڭ اۋەلى سپورتتىق مانسابىن بالالىق شاعىندا فۋتبول ويناۋدان باستايدى. كەيىن سامبو كۇرەسىنە قىزىعىپ، ەكى جىلداي بوزكىلەم كورىگىن قىزدىرادى. ءبىراق، سپورتتىڭ بۇل تۇرىنەن جاقسى ناتيجە كورسەتە المايتىنىن ءبىلىپ، 17 جاسىندا كەڭەس وداعىنا ايگىلى بولعان باپكەر ۆلاديمير روسلوۆتىڭ قول استىندا جاتتىعىپ، بوكس الەمىنە بىلەك سىبانا كىرىسەدى.

ول قىرعىزستاندا جۇرگەندە 2005-جىلى سول ەلدىڭ اتىنان ازيا بىرىنشىلىگىنە قاتىسىپ، جاقسى ونەر كورسەتتى. سول جىلى الەم چەمپيوناتىندا دا شيرەك فينالعا دەيىن جەتىپ، بولاشاعىنان ءۇمىت كۇتتىرگەن سپورتشىلاردىڭ ءبىرى اتاندى. سودان قازىرگە دەيىن بىلعارى قولعابىن شەشكەن ەمەس.

ال مىرساتايەۆ اتا-جۇرتىنا ورالعان سوڭ دا، كوپتەگەن ءىرى جارىستارعا قاتىسىپ، ابىرويىمىزدى بيىكتەردەن كورسەتە ءبىلدى. وسىعان دەيىن ءار ءتۇرلى سايىستاردا 91+ كەلى سالماق دارەجەسىندە قازاقستان نامىسىن قورعاپ كەلدى. قازاقستان ۇلتتىق قۇراماسىندا ونەر كورسەتىپ، بەيجىڭ وليمپياداسىنا قاتىسىپ، شيرەك فينالعا دەيىن جەتكەن بولاتىن.

ول 2009-جىلى پرەزيدەنت كۋبوگىندا كۇمىس جۇلدەگەر اتانسا، 2010-جىلى وتكەن باسەكەدە قولا جۇلدەنى جەڭىپ الدى.سونداي-اق وسى جىلى كۇزدە استانادا WSB جوباسى اياسىندا قۇرىلعان «استانا ارلاندارى» قۇراماسىنىڭ بەلدى سپورتشىلارىنىڭ ءبىرى بولىپ، قاتارىنان بەس جىل وسى قۇرامادا تاپجىلماي ونەر كورسەتتى. سونىڭ ناتيجەسىندە ا ي ب ا تاراپىنان 2012-جىلعى WSB دارەجەسى بويىنشا «جىلدىڭ ۇزدىك بوكسشىسى» دەپ تانىلدى.

ەندى رۋسلان ونەرىن كاسىپقوي بوكستا جالعاستىرماق. ول كاسىپقوي رينگتەگى العاشقى جەكپە-جەگىن وزگە بوكسشىلار سياقتى قۇرلىق اسىپ، شەتەلدەردە وتكىزۋدى ءجون ساناماپتى. مىرساتايەۆ تۇڭعىش ايقاسىن بىردەن الاتاۋ بوكتەرىندەگى اسەم الماتى قالاسىندا 30- قاڭتار كۇنى جەرگىلىكتى جانكۇيەرلەرگە تارتۋ ەتپەك.

بوكس كەشى جەرگىلىكتى ۋاقىتپەن كەشكى ساعات 20:00-دە Royal Tulip قوناق ۇيىندە وتەدى.

بۇل كۇنى مىرساتايەۆتان وزگە ءبىرقاتار قازاق ۇلاندارى كاسىپقوي بوكستاعى رەيتينگتىك ايقاستارىن وتكىزەدى. ولار: ايدوس ەربوسىن ۇلى، بەرىكباي نۇرىمبەتوۆ، ەرجان زاليلوۆ، نۇرسۇلتان قابدۋلوۆ. قازىرگە بۇل باۋىرلارىمىزدىڭ قارسىلاستارىنىڭ ەسىمدەرى جاريالانا قويعان جوق. ال رۋسلان مىرساتايەۆتىڭ العاشقى قارسىلاسى - رەسەيلىك بوكسشى ۆالەري زاميرالوۆ.

ۆالەري وسىعان دەيىن كاسىپقوي بوكستا ءۇش جەكپە-جەك وتكىزىپ، ۇشەۋىندە دە جەڭىلىستىڭ كەرمەك ءدامىن تاتىپتى. رۋسلان مەن ۆالەري اراسىنداعى جەكپە-جەك وسى بوكس كەشىنىڭ باستى ايقاسى بولماق.

بوكس جەكپە-جەكتەرىن «BM Global» جانە «Diamond Ring» ج ش س جانە قازاقستان كاسىپقوي بوكس فەدەراتسياسى ۇيىمداستىرىپ وتىر.

كاسىپقوي بوكس الەمىنە قادام باسقان باۋىرلارىمىزعا ساتتىلىك جولداس بولسىن دەپ تىلەيىك.

كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى