الماتىدا ايەلدەر ءۇشىن اشىق ەسىك كۇنى ءوتتى
«بۇگىن بۇكىل الەم بويىنشا دۇنيەجۇزىلىك جاتىر موينى وبىرىنىڭ الدىن الۋ اپتالىعى باستالدى. ول الداعى 30 -قاڭتارعا دەيىن جالعاسادى. قازىرگى تاڭدا الەم بويىنشا جىلىنا 600 مىڭعا جۋىق، ال قازاقستان بويىنشا جىلىنا 1700 گە جۋىق ايەل جاتىر موينى وبىرىنا شالدىعادى. ەلىمىزدە جىلىنا 700 دەي ايەل وسى دەرتتەن كوز جۇمادى. سوندىقتان بۇل وتە وزەكتى ماسەلە. ال، الماتىدا جىلىنا شامامەن 140 ايەل وسى جاتىر موينى دەرتىنە شالدىعادى. وتكەن جىلى قالا بويىنشا 30 مىڭعا جۋىق ايەلدەن جاتىر موينىنىڭ قابىنۋ ۇدەرىسىن انىقتادىق. ياعني، بۇل قاتەرلى ىسىككە اينالۋ الدىنداعى اۋرۋ. ءبىز قابىنۋ ۇدەرىسىنىڭ جاتىر موينى وبىرىنا اينالىپ كەتۋىنە جول بەرمەدىك. ايەلدەرگە ءتيىستى ەم تاعايىندالدى»، - دەدى وسىعان بايلانىستى وتكىزىلگەن باسپا ءسوز بريفينگىندە «الماتىنىڭ ونكولوگيالىق ورتالىعى» مەملەكەتتىك كاسىپورنىنىڭ باس دارىگەرى، مەديتسينا عىلىمدارىنىڭ دوكتورى ديليارا قايداروۆا.
ول سونىمەن قاتار، جاتىر موينى وبىرىنىڭ وتە قاۋىپتى اۋرۋ ەكەندىگىن، سوندىقتان ايەل ازاماتتاردى ەرىنبەستەن تۇراقتى تۇردە دارىگەرگە قارالاپ تۇرۋعا شاقىردى.
«جاتىر موينىنىڭ قابىنۋى، ياعني ەروزياسىنىڭ قاتەرلى ىسىككە اينالۋ ۇدەرىسى - 10 جىل ۋاقىتتى الادى. ەندى وسى 10 جىلدىڭ ىشىندە ءبىر رەت بولسا دا دارىگەرگە قارالۋعا بولادى عوي. ءبىراق، ەروزيا ۆيرۋستىڭ جانە باسقا دا فاكتورلاردىڭ اسەرىنەن جاتىر موينى وبىرىنا تەزىرەك اينالىپ كەتۋى مۇمكىن. سوندىقتان ءبىز جاتىر موينى جاراسىنىڭ، قابىنۋىنىڭ قاتەرلى ىسىككە اينالۋىنا 5 جىل ۋاقىت بەرەمىز. ءبىراق، ايەلدەر ءار ءتۇرلى ىندەتتەر جۇقتىرىپ الۋى مۇمكىن عوي. سوندىقتان ءبىز ايەلدەردى كەم دەگەندە جىلىنا ءبىر رەت دارىگەرگە قارالىپ تۇرۋعا شاقىرامىز. ال تەكسەرىلۋ، ەمدەلۋ تەگىن»، - دەدى د. قايداروۆا.
قازىر ەلىمىزدە بىرنەشە جىلدان بەرى 30 بەن 60 جاس ارالىعىنداعى ايەلدەر ءۇشىن تەگىن سكرينينگتەر جۇرگىزىلىپ كەلەدى. سوعان قاراماستان، تەكسەرۋ بارىسىندا وسى سىرقاتقا شالدىققانى تۋرالى دياگنوز قويىلعان ايەلدەردىڭ 15 پايىزىنا جۋىعى دەرتى اسقىنىپ كەتكەن كەزىندە قارالعان بولىپ شىعادى. ال بۇل جاعدايدا جاتىردى امان الىپ قالۋ مۇمكىن ەمەس.
ايتا كەتەلىك، الدىن الا مالىمەت بويىنشا اشىق ەسىك كۇنى وتكەن تاڭەرتەڭگى ساعات 09:00 دەن 14:00 گە دەيىن الماتى قالاسى بويىنشا 510 ايەل مەديتسينالىق تەكسەرۋدەن وتكەن. ولاردىڭ ىشىندە 200 گە جۋىق ايەل «الماتى ونكولوگيالىق ورتالىعىنا» قارالۋعا كەلگەن.
ورتالىقتىڭ الدىن الا مالىمەتى بويىنشا 4 ايەلگە «جاتىر موينى وبىرى بولۋى مۇمكىن» دەگەن دياگنوز قويىلدى. ولار ەندى قوسىمشا تەكسەرۋدەن وتەتىن بولادى. ال 58 ايەلدەن ءار ءتۇرلى قابىنۋ ۇدەرىستەرى انىقتالدى.
اۆتور: جاپپاربەرگەن ايبوتا
