سەمەيدە تەگىن دۇكەن اشىلدى
ەندى سەمەي تۇرعىندارى وزدەرىنە ۇناعان زاتتى ساتىپ الىپ، "راحمەت" ءسوزى ارقىلى زاتتىڭ اقىسىن تولەي الادى. دەگەنمەن مۇنداي مۇمكىندىككە تەك از قامتىلعان وتباسى مۇشەلەرى، كوپ بالالى وتباسى جانە جەتىم بالالار يە بولىپ وتىر. ەرەكشە ساۋدا نىسانىن سەمەي اكىمدىگى جانىنداعى قوعامدىق ۇيىم وكىلدەرى اشقان.
"بىزگە كاسىپكەرلەر، ىسكەر ايەلدەر اسسوتسياتسياسى، "يستوك" قوعامدىق بىرلەستىگى، "وتباسى ورتالىعى" قورى قولداۋ ءبىلدىردى. قازىر ءاربىر ادامدا پايدالانبايتىن زاتتار بار. ال وسى زاتتار باسقا ادامدارعا قاتتى كەرەك بولۋى مۇمكىن. ءبىز سول زاتتاردى وسى دۇكەنگە اكەلەمىز، ال سول زاتقا مۇقتاج ادام ونى "راحمەت" ايتىپ الىپ كەتە بەرەدى"، - دەدى سەمەي اكىمىنىڭ ورىنباسارى نادەجدا شاروۆا.
قالا بويىنشا وسىنداي تاعى ءۇش دۇكەن اشۋ جوسپارلانىپ وتىر. مۇندا ازاماتتاردان تۇرمىستىق زاتتاردان باستاپ بالالار كيىمىنە دەيىن قابىلدانادى. دەگەنمەن اكەلىنگەن زاتتار ىرىكتەلەدى. قايىرىمدىلىق اكسياسىن ۇيىمداستىرۋشىلار ساتىپ الۋشىلارعا قاتتى كەرەك زاتتاردى عانا الادى.
"زاتتار وتە تازا بولۋ كەرەك. تازالىققا ءمان بەرەمىز. ساننەن شىققان جاڭا كيىم دە، كونەسى دە قابىلدانادى. بالالار كيىمىن نەمەسە ەرەسەكتەرگە ارنالعان كيىم اكەلۋگە بولادى. كەيبىر زاتتاردى بىزگە كاسىپكەرلەر بەرۋى مۇمكىن"، - دەدى سەمەيدەگى ىسكەر ايەلدەر اسسوتسياتسياسىنىڭ ءتوراعاسى اينۇر ارعىنبەكوۆا.
