مۇحتار شەرىم. وپەراتسيا ماحاببات ەمەس

وڭباعان! كوزىمە ءشوپ تە ەمەس، شوڭگە دە ەمەس، جوڭىشقا سالىپ ءجۇر! ءبىر كۇنى تاڭەرتەڭ ءشاي ۇستىندە ماعان:

- بىردەڭە ايتسام، وكپەلەمەيسىڭ بە؟ - دەپ سۇرادى.

- جوعا.              

- بالامىز سوقىر ىشەك بولىپ، اۋرۋحاناداعى حيرۋرگكە بارىپ ەدىك قوي؟

- ءيا؟

- ءابدىماناپ ەدى اتى... ءوزى سونداي سىمباتتى، يناباتتى...

- ەسىمدە جوق...

- سول مەنىڭ تۇسىمە كىرىپ...

شىنىمدى ايتسام، ءبىرتۇرلى بولىپ كەتتىم. ۇيلەنگەنىمىزگە ءتورت جىل وتپەي جاتىپ، كوزىمە... ءبىر پالەسى بار عوي، ايتپەسە باسقالار نەگە ايەلىمنىڭ تۇسىنە كىرمەيدى؟ ايەل دەگەن نە دەگەن سيقىر، نە دەگەن قۋ تۇلكى ەدى؟ كوزىڭدى باقىرايتىپ قويىپ الدايدى عوي. سەنى تۇك بىلمەس توپاس سانايدى... باسە، كەيىنگى كەزدەرى اۋرۋحاناعا بالامىز اۋىرسا دا، اۋىرماسا دا جەتەلەگىش بولىپ كەتىپ ەدى...

- ارى قاراي نە بولدى دەيمىن؟ - دەپ سۇرادىم.

- ەكەۋمىز سويلەسىپ جاتىرمىز...

- نە تۋرالى؟

- سەن تۋرالى. سەنى قاشان ولەدى ەكەن دەپ... قورىقپا، تۇسىندە ولگەن، ولەدى دەگەندەر ۇزاق جاسايدى...

ادەيى ۇندەمەدىم. اڭدىعىم كەلدى. ءبىراق قالاي؟ ايەلىمنىڭ تۇسىنە قالاي كىرەمىن؟ قۇدايىم-اۋ، ماعان ەرەگەسىپ ءجۇر مە؟ تاعى ءبىر كۇنى ايەلىم:

- بىردەڭە ايتسام، وكپەلەمەيسىڭ بە؟ - دەپ سۇرادى.

- جوعا.

- حيرۋرگ ءابدىماناپ شە؟ سول تاعى تۇسىمە كىرىپ...

- نە ىستەپ جاتىر ءوزى؟

- تۇسىمە كىردى دە...

- وڭباعان! سەن ءۇنسىز عانا كوزىڭدى جۇمىپ جاتا بەردىڭ بە؟

- ءتۇسىم ەكەنىنە قاراماستان...

- ويباي، ايتشى، نە ىستەپ قويدى؟ مەن ونى سوتقا بەرەمىن! سەنەن اجىراسامىن! كەت ۇيدەن!

- توقتاشى، ايقايلاي بەرمەي... ءابدىماناپ شە؟ سول ءابدىماناپ تۇسىمە كىرىپ...

- ايتساڭشى ەندى...

- ۇيالمايدى ەكەن، رۇحساتسىز...

- ۋح...

- شەشىندىرىپ...

- اح، وڭباعاندار!

- ىشىمە ءۇڭىلىپ...

- سوسىن؟

- سيپالاپ...

- زورلادى ما نە؟

- تۇك تە ۇيالمايدى ەكەن. مەن دە ۇيالعان جوقپىن...

- سەن دە ۇيات قالماعان ەكەن دە...

- تىڭداشى اۋەلى! زورلاسا مەيلى عوي، سوقىر ىشەك ەكەنمىن دەيمىن، باس سالىپ وپەراتسيا جاساپ جاتىر-ەي! جانىم كىرىپ قالدى...

ۋح، وعان دا شۇكىر! وپەراتسيا ماحابباتقا جاتپايدى! مەنىڭ دە جانىم كىرىپ قالدى!

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى