بۇگىن ق ر ەڭبەك سىڭىرگەن قايراتكەرى، اقىن كاكىمبەك سالىقوۆ دۇنيەگە كەلگەن كۇن
1932-جىلى سولتۇستىك قازاقستان وبلىسى شال اقىن اۋدانى ەڭبەك اۋىلىندا تۋعان.
1955-جىلى ماسكەۋدىڭ ءتۇستى مەتاللۋرگيا جانە التىن ينستيتۋتىن بىتىرگەننەن كەيىن جەزقازعان كەنىشىندە كەن شەبەرى بولىپ ەڭبەك جولىن باستاعان.
ك س ر و جوعارعى كەڭەسىنىڭ ەكولوگيا جونىندەگى كوميتەتىنىڭ باسشىسى لاۋازىمىنا دەيىن كوتەرىلدى.
كوپ جىلدار كەڭەس وداعى جوعارعى كەڭەسىنىڭ پرەزيديۋم مۇشەسى بولدى العاشقى ولەڭدەر جيناعى «سىر» 1977-جىلى جارىق كوردى. سول جىلى «جەزكيىك» اتتى جىر جيناعى ورىس تىلىنە اۋدارىلىپ جاريالاندى. 1981-جىلى «قىرعىزستان» باسپاسى ونىڭ «نۇرلى كۇندەر» كىتابىن قىرعىز تىلىندە، 1983-جىلى عافۋر عۋلام باسپاسى «جەزكيىك» جيناعىن وزبەك تىلىندە شىعاردى.
«بوكەتوۆكە رەكۆيەم»، «ەدەلۆەيس»، «عاسىرعا تەڭ ءبىر مەزەت»، «چە گيەۆارا» اتتى پوەمالارى ورىس تىلىنە اۋدارىلدى.
ك. سالىقوۆ - «دالا»، «قىراندار»، «گاككۋ»، «جەزكيىك»، «ەڭلىكگۇل»، «تاتتىمبەت»، «دومبىرا»، «قاراقالپاق»، «كەنەسارىنىڭ سوڭعى ءسوزى» سەكىلدى كوپتەگەن پوەمالاردىڭ اۆتورى. سوڭعى جىلدارى ونىڭ «ويتولعاق» (2001)، «سىرعالى سونەتتەر» (2001)، «كۇزگى شۋاق» (2004)، «كۇزگى سارىن» (2005)، «سەنسىڭ ەل داناسى» (2006)، «الەمنىڭ سەگىزىنشى عالاماتى» (2006)، «ماعجانعا تاعزىم» (2008) كىتاپتارى جارىق كوردى. ۆ. ۆ. ماياكوۆسكيدىڭ «ۆ. ي. لەنين» پوەماسىن، ا. س. پۋشكيننىڭ ولەڭمەن جازىلعان «ەۆگەني ونەگين» رومانىن، م. يۋ. لەرمونتوۆتىڭ، يۋ. پ. پولونسكيدىڭ، ر. عامزاتوۆتىڭ، الدان-سەمەنوۆتىڭ، س. نوروۆچاتوۆتىڭ، ۆ. ساۆەليەۆتىڭ، يا. كولاستىڭ، م. لۆوۆتىڭ، موڭعول جانە وزبەك اقىندارىنىڭ ولەڭدەرىن قازاق تىلىنە اۋداردى.
ب. جۇمانيازوۆ، ن. تىلەنديەۆ، ءا. بەيسەۋوۆ، ە. حاسانعاليەۆ سياقتى كومپوزيتورلار اقىننىڭ كوپتەگەن ولەڭدەرىنە ءان شىعاردى. «جەزكيىك»، «ساعىنىش»، «اققۋ ءانى»، «ءۇش ارىس»، «ءبىر اۋىز ءسوز»، «وقجەتپەس»، «كوكشەتاۋ»، «جامبىل اتا» سىندى تۋىندىلارى حالىق انىنە اينالىپ كەتتى.
قازاق ك س ر جوعارعى كەڭەسىنە ءۇش مارتە (IX، X، XI) دەپۋتات بولىپ سايلانعان. ك س ر و جوعارعى كەڭەسىنىڭ دەپۋتاتى. «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنىڭ يەگەرى (2001)، حالىقارالىق ق. ساتبايەۆ قورىنىڭ پرەزيدەنتى، قازاقستان رەسپۋبليكاسى «ەكولوگيا» اكادەمياسىنىڭ اكادەميگى.
لەنين وردەنىمەن، ەكى رەت ەڭبەك قىزىل تۋ وردەنىمەن، «پاراسات» جانە حالىقتار دوستىعى وردەندەرىمەن، كوپتەگەن مەدالدارمەن ماراپاتتالعان.
