پارلامەنت ءماجىلىسىنىڭ دەپۋتاتتىعىنا كانديداتۋرانى ۇسىنۋ مەرزىمدەرى بەلگىلى بولدى
بۇل تۋرالى بۇگىن ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆ ءمالىم ەتتى.
«پارتيالىق تىزىمدەر بويىنشا سايلاناتىن پارلامەنت ءماجىلىسىنىڭ دەپۋتاتتارىن سايلاۋدا كانديداتتاردى ۇسىنۋ 2016-جىلعى 8- اقپانعا دەيىن، ال پارتيالىق تىزىمدەردى تىركەۋ 19- اقپانعا دەيىن جۇرگىزىلەدى.
سايلاۋ تۋرالى زاڭعا سايكەس، پارتيالىق تىزىمدەر بويىنشا سايلاناتىن ءماجىلىس دەپۋتاتتىعىنا كانديداتتاردى ۇسىنۋ قۇقىعى ساياسي پارتيالارعا، ال قازاقستان حالقى اسسامبلەياسى سايلايتىن ءماجىلىس دەپۋتاتتىعىنا كانديداتتاردى ۇسىنۋ قۇقىعى اسسامبلەيا كەڭەسىنە تيەسىلى»، - دەدى ول.
ق. تۇرعانقۇلوۆتىڭ ءسوزى بويىنشا، قازاقستان حالقى اسسامبلەياسى سايلايتىن ءماجىلىس دەپۋتاتتارىن سايلاۋ جونىندەگى سايلاۋ راسىمدەرىنىڭ مەرزىمدەرى پارتيالىق تىزىمدەر بويىنشا سايلاناتىن دەپۋتاتتاردى سايلاۋ ءۇشىن ايقىندالعان مەرزىمدەرمەن تۇسپا-تۇس كەلمەيدى.
«قازاقستان حالقى اسسامبلەياسىنان ءماجىلىس دەپۋتاتتىعىنا كانديداتتاردى ۇسىنۋ 29- اقپانعا دەيىن سوزىلىپ، ال ولاردى تىركەۋ 29- اقپان - 5- ناۋرىز ارالىعىندا وتەدى. ءماسليحاتتار دەپۋتاتتارىن سايلاۋدا كانديداتتاردى ۇسىنۋ 2016-جىلعى 19- اقپانعا دەيىن جۇرگىزىلەدى»، - دەپ اتاپ ءوتتى ق. تۇرعانقۇلوۆ.
ونىڭ ايتۋىنشا، جالپى پارلامەنت ماجىلىسىنە 107 دەپۋتات سايلانادى. «ونىڭ ىشىندە 98 دەپۋتات پارتيالىق ءتىزىم بويىنشا، 9 ى قازاقستان حالقى اسسامبلەياسى اتىنان سايلانباق. ال جەرگىلىكتى ءماسليحاتقا 3335 دەپۋتات سايلانادى. ونىڭ ىشىندە وبلىستىق ءماسليحاتتارعا - 550، قالالىق - 625، سونداي-اق 2160 دەپۋتات اۋداندىق دەڭگەيلەردە سايلانادى»، - دەدى ول.
ق ر پارلامەنت ءماجىلىسىنىڭ جانە ءماسليحات دەپۋتاتتارىن سايلاۋ ناۋقانىنا شامامەن 8 ميلليارد تەڭگە بولىنەدى دەپ قاراستىرىلعان.
اۆتور: جاسۇلان جولدىبايەۆ
