دوپتى حوككەي: قازاقستان قۇراماسىنا ءتورت بىردەي ورال حوككەيىنىڭ تۇلەگى الىندى

«ا» توبىندا ونەر كورسەتەتىن قازاقستان قۇراماسى العاشقى كۇنى رەسەيلىكتەرمەن كۇش سىناسسا، 2- اقپاندا شۆەتسيا، ءبىر كۇننەن كەيىن فينليانديا قۇراماسىمەن كەزدەسەدى. سودان كەيىن جارتىلاي فينالعا شىققان كوماندالار جۇلدەلى ورىنداردى ساراپقا سالادى.

دۇنيەجۇزىلىك جارىسقا وراي «اقجايىق» حوككەي كلۋبى جانكۇيەرلەرىنىڭ سايتى قازاقستان نامىسىن قورعايتىن ويىنشىلاردىڭ ءتىزىمىن جاريالادى. ولاردىڭ ىشىندە ءتورت بىردەي ورال دوپتى حوككەيىنىڭ تۇلەكتەرى بار. اتاپ ايتقاندا، قازىرگى كەزدە ساراتوۆتىڭ «ۋنيۆەرسالىنىڭ» قاقپاسىن قورعاپ جۇرگەن ءىلياس حايرەكەشيەۆپەن قاتار رەسەي چەمپيوناتىنىڭ سۋپەرليگاسىندا وينايتىن قورعاۋشى دەنيس ماكسيمەنكو مەن جارتىلاي قورعاۋشى لەونيد بەداريەۆ (ەكەۋى دە نيجني نوۆگورودتىڭ «ستارتىنان»)، شابۋىلشى راۋان يساليەۆ («سيبسەلماش»، نوۆوسىبىر) قازاقستان قۇراماسىنا شاقىرتۋ الدى. وكىنىشكە قاراي، ورالدىق «اقجايىق» كومانداسىنىڭ شابۋىلشىسى ەسكەندىر نۇعمانوۆ جاراقاتىنا بايلانىستى الەمدىك دوداعا قاتىسا المايدى.

قازاقستان قۇراماسىنىڭ باس باپكەرى - الەكسەي نيكيشوۆ، اعا جاتتىقتىرۋشىسى - مارات ماڭعۋبايەۆ. كوماندانى بىرنەشە جىلدان بەرى باپتاپ كەلە جاتقان ولاردىڭ ەكەۋى دە - دوپتى حوككەيدىڭ بەلگىلى شەبەرلەرى، قازاقستاننىڭ ەڭبەك سىڭىرگەن جاتتىقتىرۋشىلارى.

ەسكە سالا كەتەيىك، وسىعان دەيىن قازاقستان قۇراماسى التى مارتە، دالىرەك ايتقاندا، 2003 (ارحانگەلسك قالاسىندا)، 2005 (قازان)، 2012 (الماتى)، 2013 (ۆەنەرسبورگ)، 2014 (يركۋتسك) جانە 2015 (حاباروۆسك) جىلدارى الەم چەمپيوناتىنىڭ قولا جۇلدەگەرى اتانعان بولاتىن. وسىنىڭ بارىندە دە التىن جۇلدەگە رەسەي مەن شۆەتسيا تالاسسا، قازاقستاندىقتار فين قۇراماسىن ۇتىپ، ءۇشىنشى ورىنعا كوتەرىلدى. وعان قوسا قازاقستان قۇراماسى - 2011-جىلى الماتىدا وتكەن قىسقى ازيا ويىندارىنىڭ جەڭىمپازى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى