دەپۋتاتتاردىڭ باستاماسى ەل تاعدىرىنا وتانشىلدىق تۇرعىدا قامقورلىق تانىتۋدىڭ كورىنىسى - ن. نازاربايەۆ
بۇگىن وتاندىق تەلەارنالار ارقىلى دەپۋتاتتاردىڭ ءماجىلىس پەن ءماسليحات سايلاۋىن مەرزىمىنەن بۇرىن وتكىزۋ باستاماسىنا وراي قازاقستان حالقىنا ۇندەۋ ارناعان ەلباسى نۇرسۇلتان نازاربايەۆ وسىلاي دەدى.
«قازىر ءبىزدىڭ قوعامىمىز باياعى 1991-جىلعى مۇلدەم بەيتانىس احۋالعا تاپ بولعان كەزدەگىدەي ابدىراعان ادامدار توبى ەمەس. 24 جىلدان استام ۋاقىتتان بەرى قاراي جۇمىسىمىزدى ىستەپ، تاۋەلسىزدىكتى نىعايتىپ كەلە جاتىرمىز. شيرەك عاسىرعا جۋىق ابىرويلى جولمەن ءجۇرىپ كەلە جاتقان ەلمىز. ءبىز جاسامپاز ەڭبەككە شىڭدالىپ، تابىستى قالىپتاسىپ، الەمگە سىيلى مەملەكەت قۇرعان ءبىرتۇتاس حالىققا اينالدىق. مەن دەپۋتاتتاردىڭ باستاماسى قازاقستان مەن قازاقستاندىقتاردىڭ تاعدىرىنا وتانشىلدىق تۇرعىدا قامقورلىق تانىتۋدىڭ كورىنىسى دەپ سانايمىن. ءماجىلىستىڭ كەزەكتەن تىس سايلاۋى، ونىڭ ىشىندە قازاقستان حالقى اسسامبلەياسى دەپۋتاتتارىنىڭ سايلاۋى بار جانە وڭىرلىك ءماسليحاتتاردىڭ كەزەكتى سايلاۋى بار. وسى ەكەۋىن قوسىپ وتكىزۋ دەگەن - ول ۋاقىتتى دا، قارجىنى دا ۇنەمدەۋ دەگەن ءسوز. مەنىڭشە دۇرىس ويلاستىرىلىپ وتىرعان ماسەلە»، - دەدى ن. نازاربايەۆ.
اۆتور: مارلان جيەمباي
