اينۇر تۇرسىنبايەۆا ەرلى-زايىپتىلاردىڭ سەزىمى نەگە ءسونىپ قالاتىنىن ايتتى
«جالپى، كوڭىل-كۇي نەگىزىندە جۇرەككە بايلانىستى. جۇرەك ماحابباتقا تولىپ تۇرسا، كۇندىز كۇن كۇلىپ تۇرعانداي، تۇندە جۇلدىزدار جىميىپ تۇرعانداي بولادى ەمەس پە؟»، - دەيدى ايتىسكەر ءسوز باسىندا.
اينۇر تۇرسىنبايەۆا ادامعا دەگەن سۇيىسپەنشىلىكتىڭ جاسقا قارامايتىنىن العا تارتادى.
«ماحاببات تەك جاستارعا ارنالعان نىعمەت ەمەس! جۇرەگىندە ماحابباتى جوق ادام جوق! ول تەك ءسۇيىسىپ، قۇشاقتاسىپ بىرگە جاتۋ ەمەس! ماحاببات دەگەن جۇرەگىڭدەگى ادامدى سۇيە تۇرا، ءومىر سۇرۋگە تالپىنۋ!»، - دەپ تۇسىندىرەدى اقىن.
«مىسالى انانىڭ بالاعا دەگەن ماحابباتى قانداي؟! بالاڭ ءۇشىن ءومىر سۇرگىڭ كەلەدى. اكەنىڭ بالاعا دەگەن ماحابباتى مىقتى بولسا، بالا ەر مىنەزدى بولىپ وسپەي مە؟»، - دەيدى تۇرسىنبايەۆا.
اقىننىڭ پىكىرىنشە، ەركەكتىڭ ايەلگە دەگەن ماحابباتى كۇشتى بولسا، ول ەركەك تاۋ قوپارادى. ايەلدىڭ ەرىنە دەگەن ماحابباتى لۇپىلدەپ تۇرسا، شاڭىراعى جايناپ، قازانى قايناپ تۇرادى.
«ەگەر ءۇيىڭىز شاشىلىڭقىراپ، تاماق ءدامسىز بولا باستاسا، ءسىز ايەلىڭىزدىڭ سەزىمىن ءسوندىرىپ العانسىز. ەگەر كۇيەۋىڭىز ۇيگە كەشتەتىپ قايتىپ، دالاعا كەتكىسى كەلىپ تۇرسا، سىزگە دەگەن جىلۋلىق سۋىنا باستاعان»، - دەي كەلە، اقىن ءوز پاراقشاسىنا جازىلعاندارعا ماحابباتتى ساقتاۋدىڭ جولدارىن كورسەتەدى.
«ءبىراق، ەشتەڭە كەش ەمەس. ايەلىڭىزدى كەزدەسۋگە شاقىرىڭىز! گۇل اپارىڭىز، ماقتاڭىز. جارىڭىز قۇلپىرىپ شىعا كەلەدى. كۇيەۋىڭىزگە حات جازىڭىز. ءسىزدىڭ تاعدىرىڭىز ونىڭ قولىندا ەكەنىن ايتىڭىز. ايتا بەرىڭىز، ەركەلەڭىز. جارىڭىز جۇمىسقا كەتىپ بارا جاتقاندا، قالتاسىنا حات سالىپ جىبەرىڭىز. جۇرەك سوعۋىن توقتاتقانشا، سەزىمدەرىڭىز سونبەسىن. جانىپ تۇرعان وت ءوشىپ قالماس ءۇشىن وتىن سالىپ وتىرۋ كەرەك ەمەس پە؟! سەزىم دە سونداي. سوندىرمەڭىزدەر.
سونگەن وت قايتادان تۇتانبايدى. ماحابباتتارىڭىز بەرىك بولسىن دوستار!»، - دەپ كەڭەس بەردى تۇرسىنبايەۆا.
دەرەككوز: NUR. KZ
