قازاقستان مەن رەسەي اراسىنداعى «بايقوڭىر» عارىش ايلاعىنداعى اپاتقا قاتىستى كەلىسىمگە وزگەرىستەر ەنگىزىلدى - ءماجىلىس

ءماجىلىس ماقۇلداعان قۇجات ەندى پارلامەنت سەناتىنا جولدانادى.

زاڭ جوباسى بويىنشا بايانداعان ق ر ىشكى ىستەر ءمينيسترى قالمۇحانبەت قاسىموۆتىڭ ايتۋىنشا، ەكى ەل اراسىنداعى كەلىسىمگە وزگەرىستەر ەنگىزىلگەن حاتتاماعا 2015 -جىلدىڭ 2 - ماۋسىمىندا قول قويىلعان.

«قۇجات نەگىزىنەن «بايقوڭىر» عارىش ايلاعىنان زىمىراندى ۇشىرۋ بارىسىندا اپاتتار ورىن العان جاعدايدا قۇرىلاتىن كوميسسيالار، بىرلەسكەن شتابتار مەن ۋاكىلەتتى ورگانداردىڭ قۇزىرەتتەرىن ناقتىلايتىن بولادى. تۇتاستاي العاندا، زاڭنامانى قابىلداۋ قوسىمشا قارجى شىعىندارىن تالاپ ەتپەيدى. كەلىسىم قازاقستاننىڭ ۇلتتىق زاڭناماسىنا قايشى كەلمەيدى»، - دەدى مينيستر ق. قاسىموۆ.

ايتا كەتەرلىگى، كەلىسىمگە وزگەرىستەر ەنگىزۋگە قازاقستان تاراپى باستاماشىلىق جاساعان. دەپۋتات يۋري تيموشەنكونىڭ ايتۋىنشا، 2006 - جىلدىڭ 27 - شىلدەسىندەگى «بايقوڭىردان» ۇشىرىلعان «دنەپر» ر س-20 زىمىرانىنىڭ اپاتقا ۇشىراۋى بويىنشا وقيعانىڭ سالدارىن تالداي كەلە، قازاقستان ۇكىمەتارالىق كوميسسيا اياسىندا كەلىسىمگە وزگەرىس ەنگىزۋ تۋرالى باستاما كوتەردى. «ويتكەنى، اپات سالدارىن جويۋ پروتسەسىندە ءبىرقاتار ماسەلەلەر تۋىنداعان بولاتىن. ال ونى رەتتەۋ قولدانىستاعى كەلىسىمدەردە كورسەتىلمەگەن. سوعان وراي، 2006 -جىلدان بەرى ەكى مەملەكەت اراسىندا كەلىسسوزدەر جۇرگىزىلىپ، 2015 -جىلى ورتاق مامىلەگە كەلىپ، حاتتاماعا قول قويىلدى»، - دەدى دەپۋتات يۋ. تيموشەنكو.

 ءماجىلىس ماقۇلداعان زاڭ جوباسى پارلامەنت سەناتىنا جولدانادى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى