عالىمدار زاعيپتارعا ارنالعان پلانشەت جاسادى

برايل شريفتىمەن جازىلعان ەلەكتروندى كىتاپتار وتە قىمبات تۇرادى. ويتكەنى ول ەلەكتر قوزعالتقىشپەن كوتەرىلەتىن پلاستيك شتيفتەردى پايدالانادى. بۇل قۇرىلعىنىڭ اقپاراتتى بەرۋ جىلدامدىعى دا باياۋ. ونەرتاپقىشتار بۇل تەحنولوگيانى جەتىلدىرىپ، جاقسارتۋدى ۇسىنۋدا. ميچيگان ۋنيۆەرسيتەتىنىڭ ينجەنەرلەرى كوزى كورمەيتىن ادامدارعا ارناپ بەدەرلى ارىپتەردىڭ ءبىر بەتىن تولىق بەرەتىن تولىق ەكراندى قۇرىلعى جاساۋ جولىن ويلاپ تاپتى، دەپ جازادى رەسەيلىك vesti.ru.

سيلي و'مودرەين مەن ونىڭ ارىپتەستەرى بەتى جۇمساق ديسپلەيدە برايل ءارپىن تومپايتىپ شىعاراتىن سۇيىق پەن اۋانى پايدالانباق. ءاربىر بەدەرگە كەلەتىن سۇيىق كولەمى رەتتەلىپ وتىرادى.

بەدەردە ارىپتەر عانا ەمەس ءتۇرلى كۇردەلى ءپىشىن، سۋرەت جانە گرافيكالار دا كورسەتىلەدى.

پلانشەتتىڭ العاشقى نۇسقاسى ازىرگە وتە ءىرى، ءتۇرلى قۇبىرلار جالعانعان. ونىڭ سوڭعى نۇسقاسىندا قۇبىرلاردى ميكروارنالار الماستىرادى.

قازىپ زاعيپتار ءماتىندى سوزگە اينالدىراتىن باعدارلامانى قولدانادى. الايدا كوزى كورمەيتىن جاندار بەينەنى، فورمۋلانى باسقا دا سوزبەن سيپاتتالمايتىن كۇردەلى پىشىندەردى تەك كىتاپتان عانا وقي الادى.

ەگەر ونەرتاپقىشتار بارلىق نىشانداردى ەكرانعا شىعاراتىن ارزان پلانشەت جاساپ شىقسا، زاعيپتارعا ماتەماتيكا جانە باسقا دا عىلىمداردى يگەرۋگە مۇمكىندىك تۋادى.

قازىر ينجەنەرلەر ءوز قۇرىلعىلارى 1000 دوللار شاماسىندا بولادى دەپ وتىر. 2013 -جىلى قولعا الىنعان جوبا بيىل قىركۇيەك ايىندا اياقتالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى