اقتوبەدە قاتەرلى دەرتكە شالدىققانداردى قۇرانمەن ەمدەيتىن اجەيدى ىزدەپ كەلەتىن ادامدا شەك جوق
ول اناسىن ەمدەپ بەرگەنى ءۇشىن «ەستەلىك» قالدىرىپ كەتكەن اكىمدى ۇلكەن ساۋاپتان ايىرىلدى دەپ وتىر.
زالۋبا ماگومادوۆا اقتوبە قالاسىنان 75 شاقىرىم جەردەگى شيبالوۆكا اۋىلىندا تۇرادى. دارىگەردەن ەم تابا الماعان ناۋقاستار وسى زالۋبا اجەيدىڭ ءۇيىن جاعالايدى. ونىڭ ناۋقاستاردى قۇرانمەن ەمدەيتىن قاسيەتى بار. الاقانىن جۇمعان كەزدە جۇدىرىعىندا ارابشا جازۋ سەكىلدى تارماقتار پايدا بولادى. ءوزىنىڭ ايتۋىنشا، ونىڭ بىرىندە «اللا» ءسوزى، ەكىنشىسىندە قۇران اياتىنىڭ اتى جازىلعان.
«مەنىڭ ەرەكشەلىگىم - وسى ەكى قولىم. بۇل اللانىڭ ماعان بەرگەن قۇدىرەتى شىعار. قولىممەن سيپاپ، قۇران اياتتارىن وقىعان كەزدە قولىم قىزدىرىپ، ەم بەرەدى. ءوزىمدى ءوزىم ەمدەي بەرەمىن. ءدارى دە ىشەمىن. ارابشا وقۋ بىلەتىندەرگە وقىتارسىز»، - دەپ كەيۋانا ەكى قولىنداعى جازۋدى سۋرەتكە تۇسىرۋگە رۇقسات بەردى.
وعان ەمدەلۋشىلەرىنىڭ ءبىرى ەكى جاعىندا جازۋى بار تۇماردى مەككەدەن سىيلىققا اكەلگەن.
«مەن ەم جاساۋدى 16 جاسىمنان باستادىم. ەڭ ءبىرىنشى بالامدى ەمدەدىم. 14 جاسىمدا تۇرمىسقا شىعىپ، 16 جاسىمدا بالالى بولدىم. ايدالادا تۇرامىز، كىشكەنتاي بالام اۋىرعان كەزدە قايدا بارارىمدى بىلمەي، بيسسيميليامدى ايتىپ، قۇران اياتتارىن وقىپ، قولىممەن سيپاپ ەمدەدىم. 7 بالا ءوسىردىم»، - دەيدى زالۋبا ماگومادوۆا.
اقتوبەلىكتەردىڭ اراسىندا وبلىستىق جەدەل جاردەم اۋرۋحاناسىنىڭ جان ساقتاۋ بولىمىنە اۋىر جاعدايدا تۇسكەن ناۋقاستارعا ەمشى اكەلىنەدى دەگەن سىبىس بار. زالۋبا ماگومادوۆا بۇل اڭگىمەنى راستاپ وتىر. ول اۋرۋحانانىڭ جانساقتاۋ بولىمىنە بىرنەشە مارتە كىرىپ، كوپ ادامدى ولىمنەن اراشالاعانىن ايتادى.
«اۋرۋحاناعا ادامداردىڭ وزدەرى الىپ كەتەدى. دارىگەرلەرمەن سويلەسىپ، وزدەرى كىرگىزەدى. جانساقتاۋ بولىمىندە ەس-ءتۇسسىز جاتقان ادامداردى اياعىنا تۇرعىزعانمىن. كومەكتەسە الماسام، بىردەن ايتامىن. ەم قوناتىن بولسا، مەن سيپاعاندا ول بەلگى بەرەدى. جەدەل جاردەم اۋرۋحاناسىنىڭ جانساقتاۋ بولىمىنە بىرنەشە رەت باردىم. قاتەرلى ىسىك اۋرۋىمەن ومىرمەن قوشتاسىپ جاتقان ادامدار اياعىنان تۇردى»، - دەيدى ەمشى.
ەمشى ادامداردىڭ حيميا الماعانى دۇرىس دەگەن پىكىردە. ول ميدى كەپتىرىپ، ادامنىڭ اعزاسىن ولتىرەدى ەكەن.
«بىردە مىناداي جاعداي بولدى. قاتتى دەرتكە شالدىققان ادام 17 رەت حيميا الىپ، ءولىپ كەتكەن. ۇيىنە قايىر ايتىپ كەلىپ جاتقاندار ەسىكتىڭ الدىندا تۇردى. بالالارى مەنى ۇيىنە اپاردى. اۋزىن اشىپ قاراعانىمدا، ءتىلى ارتقا قاراي كەتىپ بارا جاتىر ەكەن. تامىرى سوعىپ تۇرعان جوق. اۋزىنا ەكى بارماعىمدى سالىپ ەدىم، ءتىلى بەرى قاراي شىقتى. ازدان سوڭ ەسىن جينادى. ەكى اپتا بويى قاتىناپ، اللانىڭ قالاۋىمەن ەمدەپ شىعاردىم. قاتەرلى ىسىككە شالدىققان دارىگەر دە الدىما تىزەرلەپ كەلدى. «دارىگەرلەر اۋىرا ما ەكەن؟» دەپ ولاردى كۇلدىرەم. «ءبىز ادام ەمەسپىز بە، ءسىزدىڭ كومەكتەسىپ جاتقانىڭىزدى كورىپ تۇرىپ قالاي سەنبەيمىز؟! ءسىز تۋرالى كوپ ەستىدىك» دەپ كەلەدى. اققانمەن اۋىراتىن ادامداردى ەمدەپ شىعاردىم»، - دەيدى ەمشى.
زالۋبا اجەيدى ىزدەپ شەتەلدەن، باسقا وبلىستاردان دا ادامدار كوپ كەلەدى ەكەن. گەرمانيادان، رەسەيدەن، كاۆكازدان، قاراعاندى، باتىس قازاقستان وبلىسىنان اۋىر دەرتكە شالدىققاندار تۇراقتى كەلىپ تۇرادى. اجەي ەم الۋعا قاراپايىم ادامدارمەن قوسا، لاۋازىمدى قىزمەتكەرلەردىڭ كەلەتىنىن ايتادى. ولاردىڭ قاتارىندا اكىمدەر دە بار. ماسەلەن، قوستاناي وبلىسىنىڭ اكىمى ارحيمەد مۇحامبەتوۆ. ول ەمشىگە اۋىر ناۋقاسقا شالدىققان اناسىن اكەلگەن.
«اقتوبە وبلىسىنىڭ بۇرىنعى اكىمى ارحيمەد مۇحامبەتوۆ اناسىن ەرتىپ، ەكى جىل بۇرىن كەلدى. اناسى اۋىر سىرقاتقا شالدىققان ەكەن. ەمدەپ بەردىم. قۇلان تازا ايىعىپ كەتتى. اكىم «نە كەرەك؟» دەپ سۇرادى. كەيىن ءوز العىسى رەتىندە ءۇيىمنىڭ قاسىنان ادام قابىلدايتىن شاعىن ورتالىق سالىپ بەرەمىن دەگەن. وسىدان ەكى جىل بۇرىن توبەسىن كوتەرگەنىمەن، ەسىك- تەرەزەسىن قاڭىراتىپ، اياقتاماي كەتىپ قالدى. سالمادى، جازىلعاننان كەيىن اناسى دا كەلمەدى. مەن ەشكىمگە رەنجىمەيمىن، وعان جول بەرسەم جامان بولادى. قۇدايدىڭ ءوزى كورىپ تۇر. ول مەنى ەمەس، قۇدايدى الدادى. ەگەر ول دۇرىستاپ سالعان بولسا، ونىڭ ىشىنە كىرەتىن قانشاما ادامنىڭ ساۋابىن الار ەدى. اقشاسىن اياپ، ەلدىڭ باتاسىنان ايرىلىپ قالدى. وندا بەرەكەت بولمايدى»، - دەيدى زالۋبا اجەي.
زالۋبا ماگومادوۆانىڭ ەم جاساۋ كەزىندە بالالارىنا كەدەرگى ەتپەي، بولەك ورىندا ادام قابىلدايمىن دەگەن نيەتى ارمان بولىپ قالعان. ەسىكتىڭ الدىنداعى اياقتالماي قالعان قۇرىلىستى ەمشى «ارحيمەد دەگەن اكىمنىڭ ەستەلىگى» دەپ تانىستىردى.
«ونىڭ شەشەسى «ءبىزدىڭ كەلگەنىمىزدى ەشكىمگە ايتپا» دەدى. ولار ماعان قۇدايدان ەمەس، ادامداردان تىعىلىپ كەلەتىن. مەن «ماعان ءبارىبىر» دەدىم، كەلگەن ادامنىڭ اتىن دا سۇرامايمىن. اناسى باسىنا باس كيىمىن جاپىرىپ، ۇستىنە ەسكى جامان كيىمدەرىن ءىلىپ، قۇددى ءبىر بومج(قاڭعىباس) سياقتى كەلەدى. ولار كىمگە كەرەك؟ ول كەلگەندە دۇرىس اتىن دا ايتقان جوق. ەڭ ءبىرىنشى اكىمنىڭ ءوزى كەلىپ، كەرەمەت ەكەن دەپ كەتتى. ەمدەۋ ورنىن سالىپ بەرەم دەپ ەدى، اقشاسىن قيمادى. كوزبوياۋشىلىق كورىنىپ قالدى. اللا ءبىزدىڭ ءاربىر ءسوزىمىزدى جازىپ وتىر»، - دەدى زالۋبا ماگومادوۆا.
ءبىراق، قوستاناي وبلىسىنىڭ اكىمى ارحيمەد مۇحامبەتوۆ بۇل جاعدايدى جوققا شىعارادى.
«جوق، قۇرىسىن! ونداي كىسىنى تانىمايمىن مەن. العا اۋدانىنىڭ اكىمى بولعان كەزدە شەريازدانوۆتى جىبەرگەنمىن. ول جەرگە مامام بارماعان. باسقا ادامدار مەنىڭ مامام بولىپ، الداپ بارعان. مەن جۇمىستا جۇرگەن اداممىن، وندايلاردى تانىمايمىن دا. مامامنىڭ اۋىرعانى دا وتىرىك، ول كىسىنىڭ دەنى ساۋ. قازىر قوستانايعا الىپ كەتتىم. سول جاقتا تۇرىپ جاتىرمىز»، - دەيدى قوستاناي وبلىسىنىڭ اكىمى ارحيمەد مۇحامبەتوۆ.
