وڭتۇستىك قازاقستاندا جاڭادان ءتورت باسقارما قۇرىلدى
بۇل تۋرالى بۇگىن و ق و ايماقتىق كوممۋنيكاتسيالار قىزمەتىندە وتكەن بريفينگتە وبلىس اكىمى اپپارات باسشىسىنىڭ ورىنباسارى اسەت بايسىنوۆ ءمالىم ەتتى.
ايتۋىنشا، وبلىستى باسقارۋ سحەماسى بويىنشا اكىمدىككە قاراستى 19 باسقارمادان كەيبىر مىندەتتەر الىنىپ، جاڭادان قوسىلعان 4 باسقارماعا جۇكتەلۋ جايى 15 -قاڭتار كۇنى وتكەن وبلىستىق ءماسليحات سەسسياسىندا بەكىتىلىپ، بۇگىن وبلىس اكىمىنىڭ قاۋلىسىمەن قۇرىلعانى تۋرالى شەشىم شىققان.
اتاپ ايتساق، وبلىستىق جاستار ساياساتى باسقارماسى، وبلىستىق ءدىن ىستەرى باسقارماسى، وبلىستىق جەر ينسپەكسياسى باسقارماسى جانە وبلىستىق جولاۋشىلار كولىگى جانە اۆتوموبيل جولدارى باسقارماسى بولىپ قۇرىلدى. ال ءتىل ىستەرى وبلىستىق مۇراعاتتار جانە قۇجاتتاما باسقارماسىنا قوسىلسا، مىندەتتەمەلەرى الىنعان باسقارمالار وبلىستىق ءبىلىم باسقارماسى، وبلىستىق ىشكى ساياسات باسقارماسى، وبلىستىق ەنەرگەتيكا جانە تۇرعىن- ءۇي شارۋالىعى باسقارماسى، وبلىستىق جەر قاتىناستار باسقارماسى بولىپ قايتا قۇرىلدى، دەپ حابارلايدى و ق و اكىمىنىڭ باسپا ءسوز قىزمەتىنەن.
بريفينگتە اپپارات باسشىسىنىڭ ورىنباسارى ەلباسى ن. نازاربايەۆتىڭ جاريالاعان «ۇلت جوسپارى - قازاقستاندىق ارمانعا باستايتىن جول» اتتى ماقالاسى تۋرالى ءوز پىكىرىن ءبىلدىرىپ، وسى باعىتتاعى اتقارىلىپ جاتقان جۇمىستارعا توقتالدى. ماسەلەن، اكىمدىك اپپاراتىندا جەمقورلىقتىڭ الدىن الۋ جانە جۇمىستى جۇيەلەۋ ماقساتىندا ءبىرىڭعاي پەرسونالدى قىزمەت قۇرىلىپ، ءوز جۇمىسىن باستاعان. بۇل جۇيەدە كونكۋرستىق، تارتىپتىك جانە اتتەستاتسيا باعىتىندا 5 ادامنان تۇراتىن كوميسسيا مۇشەلەرى قىزمەت اتقارادى. اتالعان ءبىرىڭعاي باسقارۋ جۇيەسى ارقىلى بارلىق باسقارماداعى باسشىلىقتان باستاپ، جاي مامانعا دەيىن وسى كوميسسيادان ءوتىپ، تاعايىندالاتىن بولادى. بۇل ءوز كەزەگىندە، بىلىكتى ماماندى تاڭداۋ ماسەلەسىنە سەپتىگىن تيگىزەدى.
ەسكە سالساق، جاڭادان قابىلدانعان «قر مەملەكەتتىك قىزمەتشىلەردىڭ ادەپ كودەكسى» نەگىزىندە وقو اكىمدىگىنىڭ ادەپ جونىندەگى ۋاكىلى بولىپ ءا. بايسىنوۆ تاعايىندالعان بولاتىن. جيىندا وزىنە جۇكتەلگەن مىندەتتەردى تارقاتىپ ايتقان اسەت يبرايم ۇلى قىزمەتتىك ادەپ نورمالارىنىڭ ساقتالۋىن قاداعالاپ، ءوز فۋنكسيالارى شەگىندە مەملەكەتتىك قىزمەتشىلەر مەن ازاماتتارعا كەڭەس بەرۋمەن اينالىساتىنىن اتاپ ءوتتى. مۇنان بولەك، وبلىس اكىمىنىڭ باستاماسىمەن «وڭتۇستىك» تالداۋ توبى قۇرىلعانىن جەتكىزدى. «بولاشاق» باعدارلاماسىنىڭ تۇلەكتەرىنەن قۇرىلعان توپ بۇگىندە كادر ساياساتىنىڭ دامۋ ستراتەگياسىن تالداۋدا.
