قازاقستاندىق «ونەر قىراندارى» توبى تۇڭعىش رەت وتاندىق كومەدياعا ءتۇستى
ال باستى ءرولدى «مەلومەن» توبىنىڭ ءسوليسى جىگەر اۋىپبايەۆ سومداعان.
«72 ساعاتتا ۇيلەنۋ» دەگەن اتاۋ العان فيلم ستۋدەنت جىگىت جايلى سىر شەرتەدى. باقىت (جىگەر اۋىپبايەۆ) تۋعان اتا- اناسىنان جاستاي ايرىلعاندىقتان، اتاسى مەن اجەسىنىڭ قولىندا تاربيەلەندى. اتانىڭ وسيەتتەرىن مۇقيات تىڭداپ وسكەن باقىت ءۇشىن، ۇلكەنگە قۇرمەت كورسەتۋ قاعيداسى ءبىرىنشى ورىندا تۇراتىن ەدى. ءوز تۋعان بالاسى مەن كەلىنىنەن ايرىلعان قاريانىڭ ەندىگى بار ءۇمىتى نەمەرەسى باقىتتى ەكەنىن ول جاقسى تۇسىنەتىن. كۇندەردىڭ كۇنىندە اتاسى مەن اجەسىن ەل الدىندا ماقتانىشقا يە قىلۋ ويىمەن، اۋىلعا استانادان كەلىن اكەلەمىن دەپ كۇن بەلگىلەيدى. ول جاڭالىق بۇكىل اۋىلعا تەز تاراپ، ءۇي ءىشى تويعا قاتتى كىرىسىپ كەتەدى. بارلىعى العاشىندا جاپ- جاقسى باستالعانىمەن، باقىتتى جاڭا كەدەرگىلەر كۇتىپ تۇرعان ەدى.
فيلم كورەرمەندى جەڭىل كۇلكىمەن عانا ەمەس، الەۋمەتتىك، وتباسىلىق، ادامگەرشىلىك تاقىرىپتارىن كەڭىنەن اشىپ، تاربيەلىك ءمانى بار كورىنىستەرمەن باۋرايدى. سونىمەن بىرگە، فيلمدە قازاقتىڭ ۇمىتىلىپ بارا جاتقان ادەت-عۇرپى، ادال دوستىق، پاك ماحاببات، الەۋمەتتىك تەڭسىزدىك، اكە مەن بالانىڭ قارىم-قاتىناسى جايلى تاقىرىپتار قوزعالادى.
باستى رولدەردە، سونىمەن قاتار، دينارا ابدۋللينا مەن جۇلدىزاي دۇيسەنبيەۆا وينايدى. فيلمنىڭ رەجيسسەرى ەركەبۇلان جولداسوۆ. ول بۇعان دەيىن اسەل ءسادۋاقاسوۆا مەن رانو ۋماروۆا ويناعان «فۋگا. دوروگا ۆ نيكۋدا» فيلمىن تۇسىرگەن بولاتىن. پروديۋسەرلەرى: جانىبەك ماديەۆ پەن اسحات سادىرباي.
وسى فيلمگە ساۋندترەك رەتىندە «مەلومەن» توبى «قازاق قىزى» دەگەن ءان جازدىرىپ، بەينەبايان تۇسىرگەن. فيلم وتاندىق پروكاتقا 11 -اقپان كۇنى شىعادى دەپ جوسپارلانىپ وتىر.
