قازاقستاندا ءبىر بولمەلى پاتەر الۋ ءۇشىن نەشە جىل اقشا جيناۋ كەرەك
مامانداردىڭ ايتۋىنشا، ۇلتتىق ۆاليۋتانىڭ قۇنسىزدانۋى جىلجىمايتىن مۇلىك نارىعىنداعى بەلسەندىلىكتى باسەڭدەتىپ، سۇرانىستىڭ ازايۋىنا اكەلىپ وتىر. 2015 -جىلدىڭ سوڭعى توقسانىندا باستاپقى جىلجىمايتىن مۇلىك قۇنى 119,5 پايىزعا دەيىن وسكەن. ال ونىڭ الدىنداعى توقساندا بۇل كورسەتكىش 108,7 پايىز بولىپتى.
سونىمەن قاتار، حالىقتىڭ تابىس مولشەرى ازايىپ جاتىر. 2015 -جىلدىڭ قاراشاسىنداعى مالىمەت بويىنشا، قازاقستاندىقتاردىڭ تابىسى ءبىر جىلدا 5 پايىزعا تومەندەگەن. جاڭا تۇرعىن ۇيلەردەگى باسپانانىڭ شارشى مەترى بولسا 233,3 مىڭ تەڭگەگە دەيىن قىمباتتاپتى. ال رەسپۋبليكامىزدا ورتاشا جالاقى مولشەرى 124,6 مىڭ تەڭگە بولىپ وتىر.
ساراپشىلاردىڭ مالىمەتىنشە، بۇل جاعداي باسپانا ساتىپ الۋ مۇمكىندىگىنە ايتارلىقتاي اسەر ەتەدى. ءبىر جىلدىڭ وزىندە ەلىمىزدە باسپانا ساتىپ الۋ مۇمكىندىگى 2 پايىزعا ازايعان. ياعني، ورتاشا جالاقى الاتىن ادام جاڭا سالىنعان ۇيدەن باسپانا ساتىپ الۋ ءۇشىن 21 -جىلدان اسا ۋاقىت بويى قاراجات جيناۋ كەرەك ەكەن.
«ءبىر جاعىنان باسپانا الۋ مۇمكىندىگىنىڭ ازايۋى بانك يپوتەكالارىنىڭ قىسقارۋىنا دا بايلانىستى بولىپ وتىر. بيىل قازاقستاندا يپوتەكا نەسيەلەرىنىڭ بەرىلۋ كولەمى سوڭعى 5 جىلدا العاش رەت ازايدى»، - دەدى ساراپشىلار.
ماماندار پاتەر ساتىپ الۋدىڭ ءتيىمدى جولى تۇرعىن ءۇي قۇرىلىس جيناعى جۇيەسى ارقىلى نەسيەلەۋ باعدارلاماسىنا قاتىسۋ ەكەنىن ايتتى. «اۋدانى 34,6 شارشى مەتر بولاتىن باسپانا ساتىپ الۋ ءۇشىن ورتاشا مولشەردەگى جالاقى الاتىن ادام 5,5 جىل شاماسىندا ايلىعىنىڭ 21 پايىزىن سالىپ وتىرسا، بانك يپوتەكالىق نەسيە بەرەدى. كەلەسى ون جىلدا اي سايىنعى تولەنەتىن قاراجات مولشەرى 14 پايىزعا دەيىن تومەندەيدى. نەسيە قۇنى باسپانا باعاسىنىڭ 109,5 پايىزىن قۇرايدى»، - دەپ بولجادى ساراپشىلار.
