قازاقتىڭ ۇيىندە قوناق بولعان شەتەلدىكتىڭ جىلقى ەتىن جەيمىن دەپ جۇرەگى كوتەرىلدى - فوتو
400 مىڭ قويىن جايىپ جۇرگەن قازاق مالشىسىنىڭ فوتوسى شەتەلدىك سايتتاردا جاريالاندى دەپ حابارلايدى NUR. KZ پورتالى imgur.com عا سىلتەمە جاساپ. ال قازاقتىڭ ۇيىندە قوناق بولعان امەريكالىقتىڭ جىلقى ەتىن جەيمىن دەپ جۇرەگى كوتەرىلگەن.
«قىتايدىڭ باتىسىندا قازاق مالشىلار جىل سايىن كوكتەمگى جايىلىمعا 400 مىڭ قويىن ايداپ، 300 شاقىرىم جەردى ءجۇرىپ وتەدى»، - دەپ جازعان فوتو اۆتورى قازاقتاردىڭ فوتوسىن نازارعا ۇسىنىپ.
رايان بەلل (Ryan Bell) ەسىمدى امەريكالىق فوتوگراف تا قازاق مالشىلارىنىڭ فوتوسىن Nationalgeographic-كە جاريا ەتكەن. ول قازاقتارعا ساپارىنان العان اسەرىمەن «جىلقىلاردى قۇرمەتتەپ، جەيتىن قازاقستان" اتتى ماقالاسىندا بولىسكەن.
بەلل قازاقتاردىڭ اتتاردى قاتتى قۇرمەتتەي تۇرا جەيتىنىنە تاڭىرقاعان.
«كيىز ۇيدەن اتتىڭ ءيىسى شىعىپ تۇردى. ادەتتەگى مەن سۇيەتىن ءيىس ەمەس، ات ەتىنىڭ پىسكەندەگى ءيىسى. مەن جاققا قاراي ەسكەن تاعامنىڭ يىسىنە تاڭ بولدىم. بۇل قازاقستاننىڭ تانىمال تاعامى - بەشبارماق. پىسكەن جىلقى ەتىنەن جاسالادى. امەريكالىقتار اتتى قۇرمەتتەگەندىكتەن ونى جەمەيدى، ال قازاقتار اتتى قۇرمەتتەگەندىكتەن ونى جەيدى»، - دەيدى اۆتور.
جىلقى ەتى قازاق تاعامىنىڭ نەگىزى بولىگى بولىپ تابىلادى. بەشبارماعى مەن قازى (شۇجىق) سياقتى تاعامدارى مەرەكە كەزىندە جانە قازاقستانعا كەلگەن ساياحاتشىلارعا سىي- قۇرمەت كورسەتۋدىڭ نىشانى رەتىندە ۇسىنىلادى.
امەريكالىقتى قىتايمەن شەكارالاسقان التاي تاۋلارىنىڭ بوكتەرىندە تۇراتىن باقتاشىلار وتباسى ۇيىندە قوناق ەتكەن.
«ولار 6000 جىل بۇرىن ات ۇيرەتكەن دالا كوشپەندىلەرىنىڭ قازىرگى بەينەسى. امەريكالىق كوۆبوي رەتىندە، مەن ءاردايىم وسى مادەني تايپا تۋرالى بىلگىم كەلەتىن. مەن مۇندا كەلگەننەن كەيىن، مەنىڭ اس مازىرىمە ۇيرەنبەگەن ەت تاعامدارى قوسىلاتىنىن كۇتپەگەن ەدىم»، - دەپ جالعاستىردى رايان.
ماقالا اۆتورى ات ۇستىندە
جىلقى ەتىن العاش اۋزىنا العان شەتەلدىكتىڭ قاتتى جۇرەگى اينىعان.
«مەن تاعامنان قاسىعىممەن ەندى الا بەرگەنىمدە، امەريكالىق سەزىمتالدىعىم وياندى ما، بىلمەيمىن، شاعىن جۇرەك اينۋ رەفلەكس تۋعىزدى. سوندا مەن ءوز ىشىمنەن: «قانەكي، سەن بۇرىن دا جىلقى ەتىن جەپ كورگەنسىڭ، يتالياداعى mortadella ەسىڭدە مە؟ موڭعوليادا ىشكەن اريك شە؟»، دەپ ويلادىم»، - دەيدى رايان.
امەريكالىقتىڭ ءوزىنىڭ كارى جىلقىسىن جەۋدى ءجون ساناماي، بوستاندىققا جىبەرۋ ءساتى
ولاي بولسا، امەريكالىقتار جىلقى ەتىنەن نەگە تۇرشىگەدى دەپ سۇراق قويدى شەتەلدىك اۆتور.
«شىندىق تاريحىمىزدا، نەگىزىنەن امەريكالىقتار بۇرىننان جىلقى ەتىنەن ءدام تاتقان. ءبىراق اۆتوموبيلدىڭ اشىلۋى وركەنيەتتىڭ دامۋىنا سەبەپكەر بولدى. بۇرىن، ەشبىر ءىس جىلقىنىڭ كومەگىنسىز بىتپەيتىن ەدى... نەگە ولاردى جەۋگە بولمايدى؟ ولار دا ءىرى قارا سياقتى، باسقا دا شارۋاشىلىق مالىمەن تەڭ قارالدى. الايدا، اۆتوموبيلدەردىڭ سانى ارتتى، جىلقىعا دەگەن سۇرانىس تومەندەدى. جىل سايىنعى ءوسىرۋى دە ازايدى. كوپ ۇزاماي، بۇل جىلقىنىڭ باعاسى ارتىپ، وعان قول جەتكىزۋ سالتاناتقا اينالدى. باسقاشا ايتقاندا، ولار يتتەر سەكىلدى ءۇي جانۋارلارىنا اينالدى»، - دەپ ءوز سۇراعىنا جاۋاپ بەردى امەريكالىق.
رايان قازاقتاردىڭ تاريحى امەريكالىقتاردان وزگەشە ەكەنىن ءسوز ەتتى.
«قازاقتىڭ تاريحى بىزدەن وزگەشە. ولاردىڭ كوشپەلى مادەنيەتى جىلقىنى كولىك رەتىندە جانە ازىق رەتىندە پايدالانعان. كەڭەس وداعىنىڭ قۇرامىنا وتكەن سوڭ، قازاق قوعامى قازىرگى زاماننىڭ لەگىنە ەندى. اۆتوموبيلدەر زاماننىڭ ءوز ۇلەسىن العانىمەن، قازاقستاندا بۇگىن دە جىلقى ەتىن ءوندىرۋ توقتاعان جوق»، - دەپ جالعاستىردى ول.
شەتەلدىك ءوز قورقىنىشىن جەڭىپ، اقىرى جىلقى ەتىن جەۋگە ۇيرەنىپ قالعانىن جاسىرمادى.
«مەن جىلقى ەتىنىڭ دامىنە ءبىراز ۇيرەنىپ قالدىم. جىلقى ەتى بۇلان ەتى تارىزدەس قاتقىلداۋ كەلدى، سول سەبەپتى ۇزاعىراق شايناۋ كەرەك. ءارى سول اۋلاناتىن جانۋارلار سياقتى، جىلقى ەتى دە اقۋىزدىڭ سالاۋاتتى كوزى بولىپ تابىلادى. جىلقى ەتىن جەگەن ادام شاپشاڭ، ءالدى ءارى اقىلدىراق بولادى دەسەدى. مەنىڭ تاز باسىمدى بايقاعان ءۇي يەسى جىلقى ەتىنىڭ شاش وسۋىنە دە پايداسى بارىن ايتىپ، ماعان كوبىرەك جەۋگە شاقىردى»، - دەپ ازىلدەدى رايان.
