ءوزىم دەپ كەلگەن باۋىرعا تورىڭنەن ورىن بەرىڭدەر
نەگە وسى ءبىز كەلىمسەكتەرگە جالپاق شەشەيلىك تانىتامىز دا، وزىمىزگە كەلگەندە تارىلىپ قالىپ جاتامىز. سوندىقتان، شەتتەن كەلگەن اعايىنداردىڭ اراسىنان وكىلدەر پارلامەنتتە مىندەتتى تۇردە بولۋى كەرەك!
وسىنى بيلىكتەن تاباندى تۇردە تالاپ ەتەيىك، اعايىن! جۋرناليستەر قاۋىمى وسى ماسەلەنى كوتەرۋ كەرەك! ايتاتىن جەردە ايتىپ، جازاتىن جەردە جازۋ كەرەك! بۇل تەك شەتتەن كەلگەن قانداستارىمىزعا عانا قاجەت نارسە ەمەس، بۇكىل قازاققا ورتاق، بۇكىل قازاق الاڭدايتىن ماسەلە... ويتكەنى، قازاققا قازاقتان باسقا ەشكىمنىڭ دە جانى اشىمايدى... الەمدەگى بۇكىل قازاقتىڭ جۇرەگى ءبىر، تىلەگى ءبىر، وتانى ءبىر، اتامەكەنى ءبىر، ارمان- اڭسارى ءبىر!.. ەندەشە بۇل ماسەلەنى اياقسىز قالدىرماي، شەتتەن كەلگەن ءبىر-ەكى قانداسىمىزدى پارلامەنتكە وتكىزۋگە كۇش سالايىق، اعايىن!
دۋمان رامازان
Facebook-تەگى پاراقشاسىنان
***
دۋمان رامازان - 1967 -جىلى 1 - تامىزدا سەمەي وبلىسىنىڭ (قازىرگى شىعىس قازاقستان وبلىسى) اباي اۋدانىنا قاراستى « قىزىلتۋ» كەڭشارىندا دۇنيەگە كەلگەن.
1992 -جىلى ءال- فارابي اتىنداعى قازاق مەملەكەتتىك ۇلتتىق ۋنيۆەرسيتەتىنىڭ جۋرناليستيكا فاكۋلتەتىن ءبىتىردى. سول جىلى رەسپۋبليكالىق «حالىق كەڭەسى» گازەتىنە قىزمەتكە ورنالاسىپ، ءتىلشى، اعا ءتىلشى، ءبولىم مەڭگەرۋشىسى، «قازاق ادەبيەتى» گازەتىنىڭ ءبولىم مەڭگەرۋشىسى قىزمەتتەرىن اتقاردى. ع. مۇسىرەپوۆ اتىنداعى قازاق مەملەكەتتىك اكادەميالىق بالالار جانە جاسوسپىرىمدەر تەاترىندا ادەبيەت ءبولىمىنىڭ مەڭگەرۋشىسى، قازاقستان ساياسي زەرتتەۋلەر ورتالىعىنىڭ باس ديرەكتورى بولىپ قىزمەتتەر اتقارعان.
2001 -جىلى «ەلوردا» باسپاسىنان «كوكجال» اتتى پروزالىق كىتابى جارىق كورگەن. «حان كەنەنىڭ قازاسى»، «اللانىڭ ءومىرى» سياقتى پروزالىق كىتاپتاردىڭ، تاريحي، ادەبي زەرتتەۋلەردىڭ اۆتورى. كوركەم اڭگىمەلەرى مەن حيكاياتتارى رەسپۋبليكالىق باسىلىمداردا ءجيى جاريالانىپ ءجۇر. «كەنەسارى» اتتى دەرەكتى فيلمنىڭ سسەناريىن جازىپ، كەڭەسشى رەتىندە ونى تۇسىرۋگە بەلسەنە اتسالىسقان.
قازاقستان جاستار وداعى مەن جۋرناليستەر وداعىنىڭ، باۋبەك بۇلقىشيەۆ اتىنداعى سىيلىعىنىڭ يەگەرى. كەنەسارى حان اتىنداعى رەسپۋبليكالىق ادەبي كونكۋرستىڭ باس جۇلدەگەرى. 2005 -جىلى قازاق ادەبيەتى مەن مادەنيەتىنە سىڭىرگەن ەڭبەگى ءۇشىن قازاقستان پرەزيدەنتىنىڭ العىس حاتىمەن ماراپاتتالعان.
