بەرمۋد ءۇشتاعانىنىڭ سىرى
قازىرگى ۋاقىتتا بەرمۋد ءۇشتاعانى ادامدار، كەمەلەر، ۇشاقتار ءىز- ءتۇزسىز جوعالىپ كەتەتىن ەڭ قاۋىپتى انومالدى ايماق ەكەنى بەلگىلى.
ول اتلانت تەڭىزىنىڭ سولتۇستىك- باتىس بولىگىندە ورنالاسقان. بەرمۋت ءۇشتاعانىنىڭ شەكتى ايماقتارى رەتىندە فلوريدانىڭ وڭتۇستىگى (مايامي)، بەرمۋد ارالدارى جانە پۋەرتو- ريكو ەسەپتەلەدى. بۇل شارتتى تۇردە ايتقانى بولماسا، قايعىلى اپاتتار ونىڭ سىرتىندا دا، مەكسيكا شىعاناعىندا، كاريب تەڭىزىنىڭ سولتۇستىك بولىگىندە دە بولىپ جاتادى.
بەرمۋد ءۇشتاعانىنداعى سىرى اشىلماعان جوعالىپ كەتۋ جاعدايلار ادامداردى وتكەن عاسىردىڭ ورتاسىنان باستاپ الاڭداتا باستادى. 1950 - جىلى «Associated Press» ءتىلشىسى دجونس بۇل ايماقتى «سايتاننىڭ تەڭىزى» دەپ اتاعان.
قازىرگى ۋاقىتتا بۇل جەردە جۇزدەگەن جوعالىپ كەتۋلەر تىركەلگەن.
1945 -جىلى بۇل انومالدى ايماقتا اسكەري ەسكادريليانىڭ جوعالىپ كەتۋى حالىق نازارىن وزىنەن اۋداردى. «ەۆەنجەر» ءتيپتى بەس بومبارديرشى ءوزىنىڭ تاجىريبەلى ەكيپاجىمەن اشىق كۇن، تىنىش تەڭىز ۇستىندە جوعالىپ كەتتى.
راديوجەلى ارقىلى سويلەسكەندە ولار كەيبىر قۇرىلعىلاردىڭ ىستەن شىققانى تۋرالى ايتىپ، جانە «ءبىز باتىستىڭ قايدا ەكەنىن بىلمەيمىز. ەشتەڭە قولدان كەلمەي جاتىر.. . قىزىق.. . ءبىز باعىتتى انىقتاي المايمىز. تەڭىز دە باسقاشا بولىپ كەتكەن؟ ..» دەگەن. پيلوتتاردىڭ سوڭعى سوزدەرى ءارتۇرلى پىكىرلەردى تۋدىرىپ وتىر: «ءبىز اق سۋعا كىرىپ كەلە جاتىرمىز، ەشتەڭە دە دۇرىس ەمەس. قايدا ەكەنىمىزدى بىلمەيمىز، سۋ اق ەمەس، جاسىل».
1963 - جىلى جۇك تيەگەن «Marine Sulphur Queen» كەمەسى ءىز- ءتۇزسىز جوعالىپ، ونىڭ قالدىقتارى دا تابىلماعان.
بەرمۋد ءۇشتاعانىن تۇسىندىرەتىن ايگىلى پىكىرلەر تومەندەگىدەي:
تەڭىزدەن ينفرادىبىستى تولقىندار پايدا بولىپ، ودان قورىققان ەكيپاج مۇشەلەرى بورتتان سەكىرىپ كەتكەن.
گولفستريمنىڭ قۋاتتى جىلى اعىسى بەرمۋد ءۇشتاعانىنداعى اۋا رايىن دەرەۋ وزگەرتىپ جىبەرەدى.
تەڭىزدە مەتان تولى ۇلكەن گاز كوپىرتپەلەرى پايدا بولادى. كەمە مەن ۇشاق مۇنداي كوپىرتپەگە تاپ بولعاندا ۇلكەن تىعىزدىق پەن كوپىرتپەدەگى اۋادان تومەنگە تارتىپ كەتەدى.
