يتاليا حالقى قارتايىپ بارادى

وندا تۇرعىنداردىڭ تورتتەن ءبىرى، ياعني 13 ميلليون ادام 65 جاستان اسىپ كەتكەن. ال تۋۋ كورسەتكىشى وتە تومەن.

ماسەلەن وتكەن جىلى نەبارى 490 مىڭ نارەستە دۇنيەگە كەلگەن. ساراپشىلاردىڭ ايتۋىنشا، بۇل جاعداي يتاليا ەكونوميكاسىنا دا كەرى اسەرىن تيگىزۋدە. سوڭعى 10 جىلدا يتاليادا جالعىزباستىلار سانى ەكى ەسەگە وسكەن. شامامەن 7 ميلليون ادام وتاۋ تىكپەي، سالت باستى، ساباۋ قامشىلى ءومىر ءسۇرىپ ءجۇر.

ءبىر كەزدەرى ۇلكەن وتباسىلىق داستۇرلەرىن ماقتان تۇتاتىن يتاليالىقتار قازىر توقىراپ تۇر. بالانىڭ جاۋاپكەرشىلىگىن قازىر ەشكىم ءوز موينىنا العىسى كەلمەيدى. كوبىسى اۋپىرىمدەپ، ارەڭ كۇن كورىپ ءجۇر. قازىرگى تاڭدا نارەستەنى اياققا تۇرعىزۋ وڭاي ەمەس. حالىق سانى قالىپتى ءوسۋى ءۇشىن ءار شاڭىراقتا ورتا ەسەپپەن ەڭ كەمى ەكى بالادان بولۋى كەرەك. الايدا قازىر ونداي وتباسىلار نەكەن-ساياق. يتاليادا ۇلتتىڭ قارتايۋى وسىدان 30 جىل بۇرىن باستالعان. ماسەلەنىڭ ءمانىسىن زەرتتەپ-زەردەلەگەن دەموگرافتار 20 جىلدان كەيىن ەلدە حالىق سانىنىڭ ۇشتەن ءبىرى شاۋ تارتقان ەگدە جاستاعى ادامعا اينالادى دەپ دابىل قاعىپ وتىر. ال ۇكىمەت ءۇشىن جىل سايىن قاراسى كوبەيە تۇسكەن قاريالارعا زەينەتاقى تولەۋ قيىنعا سوعىپ تۇر.

كوررادو بونيفاتسي، دەموگرافيا مەن الەۋمەتتىك زەرتتەۋ ينستيتۋتىنىڭ ديرەكتورى:

- قازىر وتە كۇردەلى ماسەلەنىڭ ءبىرى -  زەينەتاقى بولىپ تۇر. يتاليادا زەينەتاقى جۇيەسى بىرنەشە رەت وزگەرىسكە ۇشىرادى. سوڭعى جىلدارى ءتىپتى زەينەتكە شىعۋ جاسى كوتەرىلىپ، تولەم دە ءبىرشاما تومەندەدى. ونىڭ بارلىعى ەلدەگى دەموگرافيالىق جاعدايعا بايلانىستى. يتاليا حالقى قارتايۋ جاعىنان الەم بويىنشا جاپونيادان كەيىن ەكىنشى ساتىدا تۇر. زەينەتكەرلەرگە تولەنەتىن قىرۋار قارجى ەكونوميكا ءۇشىن ءتيىمسىز. ەگەر ءدال وسىلاي جالعاسا بەرسە، يتاليانىڭ داعدارىستان جاقىن ارادا شىعا قويۋى ەكىتالاي.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى