قازاق قىزى قىتاي ەلىندە ۇزدىك ستۋدەنت اتاندى
«قازاقستان مەن قىتاي ەلدەرىنىڭ اراسىنداعى ديپلوماتيالىق، ەكونوميكالىق، مادەني بايلانىستار قارقىندى دامىپ جاتقان كەزدە شىعىستانۋشى ماماندىعىنىڭ ءرولى زور ەكەنى بەلگىلى. سوندىقتان دا ۋنيۆەرسيتەت تابالدىرىعىن اتتاعان كەزدە قىتاي تىلىندە ءبىلىمىمدى تولىقتىرسام دەگەن شەشىم قابىلداعان ەدىم. وسىلايشا، ءبىر جىلدىڭ ىشىندە ىزدەنىس پەن ەڭبەكتىڭ ارقاسىندا قىتاي ءتىلىن مەڭگەردىم. 17 جاستاعى ستۋدەنتتى كورشى ەل ءوزىنىڭ بەس مىڭ جىلدىق تاريحىمەن، بارىنە بىردەي اشىلا بەرمەيتىن يەروگليفتەردىڭ سيقىرىمەن قىزىقتىردى»، - دەيدى فاريدا تولەۋبايەۆا. پاۆلودارلىق دارىندى جاستىڭ ايتۋىنشا، قازىرگى تاڭدا قىتاي ءتىلى فاكۋلتەتى امەريكا، جاپونيا، كورەي، رەسەي، ۋكراينا جانە يندونەزيا سياقتى الەمنىڭ سان ءتۇرلى ستۋدەنتتەرىنىڭ باسىن بىرىكتىرگەن.
«مۇنداي جەڭىسكە جەتۋىمە ءاردايىم قولداۋ كورسەتەتىن اناشىم قارلىعاش تولەۋبايەۆا مەن ءبىلىم نارىمەن سۋسىنداتقان پاۆلودار قالاسىنداعى «جاس دارىن» مامانداندىرىلعان مەكتەبى ۇستازدارىنىڭ قوسقان ەڭبەگى زور. بۇگىندە العا قويعان ماقساتىم - شاڭحاي قالاسىنىڭ ەڭ ۇزدىك ۋنيۆەرسيتەتىندە وقۋىمدى جالعاستىرىپ، قازاقستاننىڭ الەمدىك دەڭگەيدەگى دەرجاۆاعا اينالۋىنا ۇلەس قوسۋ»، - دەيدى ول.
ايتا كەتەرلىگى، 2013 -جىلعى «جاس دارىن» مەكتەبىنىڭ «التىن بەلگى» يەگەرى اتانعان فاريدا تولەۋبايەۆا ءال-فارابي اتىنداعى ۇلتتىق ۋنيۆەرسيتەتتىڭ شىعىستانۋ فاكۋلتەتىنىڭ 3-كۋرس ستۋدەنتى. قىتاي ەلىندە اكادەميالىق موبيلدىلىك بويىنشا ءبىلىم الىپ جاتقان ول انا تىلىنەن باسقا، ورىس ءتىلى مەن اعىلشىن، قىتاي تىلدەرىن ەركىن مەڭگەرگەن.
