ەلوردادا قارتتارعا ارنالعان مادەني ورتالىق اشىلدى
استانا اكىمدىگىنىڭ سايتىنىڭ حابارلاۋىنشا، جىل سايىن قالادا قارت ادامدارعا ارنالعان شاعىن ورتالىقتار اشىلادى. مۇندا قارتتاردىڭ ءبىر بىرىمەن كەزدەسۋىنە، شاحمات، دويبى ويناۋىنا، كىتاپ وقىپ، بىرگە شاي ىشۋىنە بولادى. ورتالىق سىيىمدىلىعى - 30 ادام.
سونىمەن قاتار، ەسىل اۋدانىنىڭ ارداگەرلەر كەڭەسى ءوز جۇمىسىن جوسپارلاۋ جانە تالقىلاۋ ءۇشىن سەمينارلار مەن كەزدەسۋلەر وتكىزە الادى. سونداي-اق، ورتالىقتا اپتاسىنا ءبىر رەت ارداگەرلەردىڭ ءوتىنىشىن قابىلداۋ جۇرگىزىلەدى.
جالپى، ەلوردادا قارت ادامدارعا ارنالعان 15 شاعىن ورتالىق جۇمىس ىستەيدى. وندا قاريالارعا ارنالعان دەمالىس كلۋبتارىندا ءتۇرلى ۇيىرمەلەر جۇمىس ىستەيدى، شاحمات جارىستارى، پوەزيا كۇندەرى، مەرەيتوي يەلەرىن قۇتتىقتاۋ، سەمينارلار مەن ت. ب. شارالار وتكىزىلەدى.
