انكارادا تۇركى الەمىنە ەڭبەگى سىڭگەن تۇلعالار ماراپاتتالدى - فوتو

اكادەميانىڭ باسپا ءسوز قىزمەتىنىڭ حابارلاۋىنشا، بيىل 100 جاسقا كەلگەن تۇركى عىلىمىنىڭ الىپ شىنارى - اتاقتى تاريحشى حاليل ينالجىق پەن 94 جاستاعى بەلگىلى تۇركىتانۋشى زەينەپ كوركماز جانە تۇركيانىڭ كورنەكتى مەملەكەت قايراتكەرى حاسان جەلال گۇزەلگە تۇركى اكادەمياسىنىڭ ارنايى مەدالدەرى تابىستالعان.

تۇرىك ءتىل قۇرىمىندا تۇركيا جانە قازاقستان زيالى قاۋىم وكىلدەرىنىڭ قاتىسۋىمەن وتكەن سالتاناتتى جيىندا ماراپاتتاردى تابىس ەتكەن اكادەميا باسشىسى د. قىدىر-ءالى ولاردىڭ تۇركى الەمىنىڭ عىلىمى مەن ىنتىماقتاستىعى ءۇشىن اتقارعان ەرەن ەڭبەكتەرىن ايرىقشا اتاپ ايتتى.

1916 -جىلى ستامبۋل قالاسىندا ومىرگە كەلگەن حاليل ينالجىكتىڭ كونە وسمان تاريحى جايلى ەڭبەكتەرى الەمنىڭ ىرگەلى جوعارى وقۋ ورىندارىنىڭ بارىندە دەرلىك وقىتىلادى. تۇرىك جانە اعىلشىن تىلدەرىندە قىرىقتان استام كىتاپ جازعان اتاقتى پروفەسسور بۇگىندە تۇركيا، ا ق ش، ۇلى بريتانيا جانە سەربيا عىلىم اكادەميالارىنىڭ تولىق مۇشەسى.

تۇركى تانۋ، ونىڭ ىشىندە ديالەكتولوگيا بويىنشا كوپتەگەن عىلىمي ەڭبەكتەردىڭ اۆتورى زەينەپ كوركمازدىڭ جيىرماعا جۋىق كىتابى، 250 دەن استام ماقالالارى جاريالانعان. كورنەكتى عالىم زەينەپ كوركماز 1922 -جىلى دۇنيەگە كەلگەن.

اكادەميانىڭ ارنايى ماراپاتىن العان حاسان جەلال گۇزەل تۇركيادا ۇزاق جىلدار بويى مينيسترلىك لاۋازىمدا قىزمەت اتقارعان، تۇركى الەمىنە قاتىستى ىرگەلى جوبالاردى جۇزەگە اسىرعان، «تۇركى تاريحى»، «تۇركى مادەنيەتى»، «تۇرىكتەر» سياقتى ونداعان تومنان تۇراتىن كىتاپتاردى جارىققا شىعارعان ول بۇگىندە «جاڭا تۇركيا» ستراتەگيالىق زەرتتەۋ ورتالىعىن باسقارادى.

ءوز كەزەگىندە ماراپات يەلەرى تۇركى اكادەمياسىنا العىستارىن ءبىلدىرىپ، ىزگى تىلەكتەرىن ارنادى.

 

 

 

 

 

 

 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى