بۇگىندە ۇلتتىق قوردىڭ قارجىسىن ءجونسىز شىعىنداۋ قاۋپى جوق - ب. سۇلتانوۆ

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر قارجى ءمينيسترى باقىت سۇلتانوۆ ءمالىم ەتتى.

«ۇلتتىق قوردىڭ قارجىسىن «جەپ قويۋ» قاۋپى جوق. اتاپ ايتقاندا، ۇلتتىق قوردىڭ قارجىسىن باسقارۋدىڭ ناقتى جۇمىس ىستەپ تۇرعان تۇجىرىمداماسى بار، سونىمەن قاتار ءبىز ۇستانىپ وتىرعان بەلگىلى ءبىر شەكتەۋلەر مەن ليميتتەر ەسكەرىلگەن»، - دەدى مينيستر.

مۇنىمەن قوسا، ۇلتتىق قور جۇمىسىنىڭ تەتىگىنە توقتالعان ول، وعان مۇناي-گاز سەكتورىنان تۇسكەن بارلىق تابىستار باعىتتالاتىنىن جانە بەلگىلى ءبىر كولەمدە ودان قارجى الىناتىنىن جەتكىزدى.

«بيىل ءبىز پليۋس 15 پايىز ەرەجەسىنەن باس تارتتىق، ياعني ۇلتتىق قوردىڭ قولدانىستاعى تۇجىرىمداماسى بويىنشا تەك 8 ميلليارد دوللار كولەمىندەگى قارجىنى كەپىلدەندىرىلگەن ترانسفەرت قاراجاتى تۇرىندە الامىز. وتكەن جىلى بىزگە 1,8 تريلليون تەڭگە ءتۇستى، 1,7 تريلليون تەڭگە كەپىلدەندىرىلگەن ترانسفەرت تۇرىندە پايدالانىلدى. «نۇرلى جول» باعدارلاماسىن جۇزەگە اسىرۋعا ماقساتتى ترانسفەرت قارجىسى جۇمسالدى. ياعني، بۇلار داعدارىسقا قارسى شارالار بولىپ تابىلادى. ەگەر دە ۇلتتىق قورعا كەلەتىن ءتۇسىم نولگە تەڭ بولسا دا، ءبىز وندا شوعىرلانعان قارجىنى تەز ارادا شىعىندامايمىز، سەبەبى بىزگە ۇلتتىق قور قارجىسىن پايدالانۋ بويىنشا قادامداردى قايتا قاراستىرۋ ماقساتى جۇكتەلدى جانە وسى جۇمىستار جۇرگىزىلىپ جاتىر»، - دەدى ب. سۇلتانوۆ.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى