رەسەي شەكاراشىلارى ۋكراين ساربازىن تۇتقىنعا الدى
«ينتەرفاكس» اگەنتتىگىنىڭ فەدەرالدىق قاۋىپسىزدىك قىزمەتىنىڭ روستوۆ وبلىستىق شەكارا باسقارماسىنا سىلتەمە جاساپ حابارلاۋىنشا، شلياحوۆوي شەكارانى «وتكىزۋ پۋنكتىنەن تىس جەردەن» كەسىپ وتكەن جانە ءتيىستى قۇجاتى بولماعان دەپ جازادى ازاتتىق.
ۇستالعان ساربازعا قاتىستى «شەكارانى زاڭسىز كەسىپ ءوتۋ» بابى بويىنشا اكىمشىلىك ءىس قوزعالعان. بۇل باپ بويىنشا ەكى جىلعا دەيىن باس بوستاندىعىنان ايىرۋ جازاسى قاراستىرىلعان.
دونباستاعى ۋكراين ارنايى وپەراتسياسى شتابىنىڭ باسپا ءسوز قىزمەتى ماكسيم شلياحوۆويدى 13- قاڭتار كۇنى رەسەيلىك شەكاراشىلار ۇستاعانىن راستادى. قازىر قىزمەتتىك تەرگەۋ ءجۇرىپ جاتىر.
ۋكراينا شىعىسىندا قاقتىعىس باستالعاننان بەرى رەسەيلىك جانە ۋكراينالىق اسكەريلەردىڭ ەكى ەل شەكاراسىن كەسىپ وتكەنى تۋرالى بىرنەشە رەت حابارلانعان. رەسەيدىڭ روستوۆ وبلىسى ۋكراينانىڭ كوپشىلىك بولىگىن رەسەيشىل سەپاراتيستەر باقىلايتىن دونەتسك جانە لۋگانسك وبلىستارىمەن شەكتەسەدى.
