ءۇش جىل كۇتكەن ءبىر ءسات
سەبەبى بۇل ناعىز جەتىنشى اسپان كوكجيەگى. حالىقتى بۇل مەكەنگە تارتاتىن تىلسىم كۇش - «بۇلتتار تەڭىزى» دەسەك قاتەلەسپەيمىز. جۇمىر جەردىڭ عاجايىپ قۇبىلىسى كوپ دەسەك تە، تولقىن بولىپ اققان تۇمان تەڭىزىن تاماشالاۋ باقىتى كىم-كىمگە بولسىن قىزىقتى. قازاقستاندا ۋنكاي سەكىلدى عاجاپ مەكەن بار. ول اسقاق شىڭدارىمەن اسپانعا پاڭدانا قاراعان ىلە الاتاۋىنىڭ باۋرايى.
تەرەڭدىك پەن بيىكتىكتىڭ تىعىز ولشەمىن بىلدىرەتىن بۇل كورىكتى جەر ۋنكايدان كەم ەمەس. انام، بيولوگ ۇستاز جەڭىسكۇل بەركىمبايەۆا العاش الماتىعا الىپ كەلگەندە، سول اسپانعا تىرەسكەن شىڭدارىن كورىپ، ءسۇيسىنىپ، «وسى شىڭدارعا شىقسام» عوي دەگەن ارمان ىشتەي مازالعانى راس ەدى. الماتى سول ارماندارعا جول اشتى...
اسقاق شىڭدارى ۇلى دالا توسىندە وسكەن قىر بالاسىن جاتسىنبادى. بيىكتەرىنە ورلەتتى، بار عاجابىن كورۋگە مۇمكىندىگىن بەردى. كەزىندە ءوزىم ارمان ەتكەن ۇلكەن الماتى شىڭىنا شىعۋ مارەسىن دە ناتيجەلى اياقتادىم. الاتاۋعا ءار تابانىم تيگەن سايىن فوتواپپارت الىپ، عاجايىپتارىن ءتۇسىرىپ وتىرۋ ادەتى كاسىبي پەيزاج ءتۇسىرۋ قۇلشىنىسىن وياتتى.
تابيعات - انا شەبەر عوي! بۇگىنگى كورگەن كورىنىسىڭ، ەرتەڭ قايتالانا بەرمەيدى. ءتىپتى بىرنەشە سەكۋندتار عانا بايقالاتىن ساتتەر بولادى. تاۋ تابيعاتىن ءتۇسىرۋ جانكەشتىلىكتى تالاپ ەتەدى. مىڭ مارتە قۇبىلاتىن تاۋ ديدارىن ءتۇسىرۋ ءۇشىن دە شىنايى سۇيىسپەنشىلىك كەرەك، تالپىنىس كەرەك جانە ەڭ باستىسى، ۇلكەن قاجىرلى ەڭبەك كەرەك.
ءار اتتاعان قادامىڭمەن بيىككە ورلەگەندە ۇلكەن كۇش ءتۇسۋى مۇمكىن، ءبىراق سەنى كۇتىپ تۇرعان عاجاپتى كورۋگە ۇمتىلۋىڭ، جانىڭدى سالىپ، بەرىلۋىڭ، ءوزىڭ ءۇشىن عانا ەمەس، ەرتەڭ سەن تۇسىرگەن سۋرەتىڭدى كورەتىن وقىرمان ءۇشىن دە قىزىقتى، ءبىر ساتتىك، ءبىراق ماڭگىلىك ماعىنالى ءتىلسىز بەينە بولىپ تابىلاتىن ونەر تۋىندىسىنا اينالادى.
العاشىندا تۇمان ۇلپەكتەرى قالا ءۇستىن تورۋىلداپ ءجۇردى دە، بىرنەشە مينۋتتاردان كەيىن قالانى قالىڭ تۇمان باستى. «ءتۇس - ءتاڭىردىڭ ايانى» دەيدى دانا حالقىمىز. تاڭەرتەڭ كورگەن تۇسىمدە، وسى قۇبىلىستى بۇگىن، جاقسى راكۋرستان تۇسىرگەنىمدى بەينەلەيتىن كەسكىندەر ەسىمدە جاتتالىپ قالىپتى.
مۇمكىن، ويداعى قيال سۋرەتتەرى بولار؟! وسى بولعان جايلاردى ەسكەرىپ، قالاعا قالىڭ تۇمان تۇسكەندە، تاۋعا قاراي زۋلادىم. كورىنىس جاقسى بولادى-اۋ، دەگەن جوتاعا ورمەلەپ، الگى ءساتتى تاماشالاۋعا بارىنشا ۇمتىلدىم.
جوتانىڭ ۇشار بيىگىنە شىققانىم سول ەدى، التىن ديدارلى كۇن نۇرىنا شومىلعان كوك تەڭىزدىڭ سۋى سەكىلدى تۋلاعان تولقىندارىمەن تاۋ جوتالارىنا ۇلكەن قارقىنمەن بيىككە قاراي قوزعالعان الىپ اسپان تەڭىزى الدىمنان قايتالانا بەرمەيتىن عاجايىپ سۇلۋلىعىمەن كورىنە كەتتى.
ءوزىم ويلاعان ءبىر ساتتىك كادر، مىنە، مەنىڭ الدىمدا، مەنىڭ تابانىمنىڭ استىنا كەلىپ سوعىلىپ تۇر. «ال دوسجان، مەنىڭ سۇلۋلىعىمدى ءتۇسىرىپ ال دا، قورىنا ساقتاپ قوي» دەگەندەي... بارىنشا سىمباتتانىپ، تاۋ شاتقالدارىنا كەڭ ارناسىمەن كەلىپ سوعىلىپ، ودان قالا بەردى شاتقال تەرەڭدىگىنە سىيماي، جوتالار بيىگىنە قاراي ارناسى مينۋتتاپ كەڭەيە باستادى.
اسپان تەڭىزىنىڭ جەر باۋىرلاپ كەلىپ، بيىك تاۋلار شاتقالىندا اساۋ وزەندەي اققان كوگىلدىر تۇنىق بەينەسى، تاۋ باۋرايىندا عاجايىپقا تولى شىتىرمان سۋرەتىن سالىپ جاتقانداي. ءسويتتى دە، ءوزى دە سۋرەتكە اينالىپ كەتە باردى.
باستاۋى كوكجيەك سىزىعىمەن تىرەلگەن اسپان تەڭىزىنىڭ اساۋ اعىنى ارمان بولعان ادەمى سۋرەتتىڭ شىنايى كورىنىسىنە اينالدى. بۇلت تەڭىزىنىڭ تىم تومەندە قوزعالىپ، اشىق اسپانعا اڭقىلداق كوڭىلىمەن كوتەرىلىپ بارىپ، قايتا تومەندەپ، جۇمىر جەرىن قۇشىرلانا ءسۇيىپ، قۇشاعىنا باسىپ، قۇشتارلىقپەن جىلجىپ كورىنگەندەگى ادەمى اعىنى اسەم سۋرەتكە اينالۋى مەن ءۇش جىلدان بەرگى كۇتىپ جۇرگەن ءبىر ءسات ەدى...
الدا اسپان تەڭىزىنىڭ فانتاستيكالىق كەسكىنى ءالى تالاي ءوزىنىڭ تىلسىم سىرىن سۋرەتتەۋگە مۇمكىندىگىن بەرەر...
دوسجان بالابەك ۇلى
سۋرەتتى تۇسىرگەن اۆتور
«ايقىن»
