ادال جار بولا الا ما؟
ال قازىر ول وعان تۇرمىسقا شىعۋعا ۇسىنىس ءبىلدىرىپ ءجۇر، جىگىت باسقا ەشكىم كەرەك ەمەس ەكەنىن ايتىپ سەندىرگىسى كەلەدى. ءبىراق وسى 2011-2016 -جىل ارالىعىندا قانشا وقيعالار بولدى. تۇسىنىكتى بولۋ ءۇشىن ءبارىن باسىنان باستايىق.
2011 -جىلى قۇربىلار بولىپ جينالىپ وتىرعان، ول كورشى ستولدا ءبىر دوسىنىڭ تۋعان كۇنىن تويلاپ جاتتى. ولاردىڭ تانىستىعىمىز وسىلاي باستالدى. 1-2 ايداي قىز بەن جىگىت بولىپ جۇردى. قارىم- قاتىناسى باستاپقى كەزدەن-اق دۇرىس بولمادى. سەبەبى ول ءوز-وزىنەن «جوق» بولىپ كەتەتىن. حابارلاسام دەپ حابارلاسپاي كەتەتىن، كەلەم دەپ كەلمەي قالاتىن. بويجەتكەن ەكى كوزى ءتورت بولىپ، تالاي كەشتى كۇتۋمەن وتكىزەتىن. قىزدىڭ ءبىرىنشى بولىپ جىگىتكە ەشقاشان حابارلاسپايتىنى بار، بۇرىننان سونداي. ءوزى قايتا حابارلاسپاسا، جۇرە بەرەتىن. ول كەزدە اگەنت دەگەن بار ەدى، كوبىنە تەك اگەنتپەن عانا سويلەسەتىن. وسىلاي ارالارى الىستاپ جۇردى. ءبىراق الگى جىگىت قىزدان ەشقاشان حابارىن ۇزبەي كەلەدى. ەڭ ۇزاق دەگەندە 1 ايدا حابارلاسىپ، جاعدايىن ءبىلىپ تۇراتىن. اراسىندا جاي دوس رەتىندە ءۇي جاققا دوستارىمەن كەلىپ كەتەدى.
«جاسىراتىنى جوق ونى جاقسى كوردىم. ءبىراق قازىر ول سەزىم بار دەپ ايتا المايمىن. تەك ۇيرەنىپ قالعاندىقتان شىعار، ءالى دە قوڭىراۋلارىنا جاۋاپ بەرەمىن. مەنىڭ سەنىمىمنەن مۇلدەم شىعىپ كەتكەن، وعان سەنە المايمىن. قانشا رەت كوڭىلىمدى قالدىردى، قانشا رەت سول ادام ءۇشىن جىلادىم. سونىڭ ءبارى قازىر ويىما تۇسسە ونى ۇرىپ تاستاعىم كەلەدى» دەيدى قىز.
قىز ءۇشىن قازىر ول بار ما، جوق پا، ايتقان سوزىندە تۇرا ما، تۇرماي ما - ءبارىبىر. حابارلاسامىن دەسە دە، كەلەمىن دەسە دە قىز كۇتپەك ەمەس. ايتقان اڭگىمەلەرىنىڭ ءبارى وتىرىك سياقتى كورىنەدى دە تۇرادى، ءار ءسوزىنىڭ استارىنان وتىرىك ىزدەپ تۇراتىن بولدى. سەنگىسى-اق كەلەدى. وكپە- رەنىشىمنىڭ ءبارىن ىسىرىپ قويىپ وعان مۇمكىندىك بەرگىسى كەلەدى. ءبىراق كەۋدەدە بىرنارسە جىبەرمەي تۇرادى. ول رەنىش پە، باسقا ما، ول جاعىن قىز بىلمەيدى.
قازىر ول سەنىڭ ايتقانىڭ بولادى دەپ وتىر. «جاڭا ءومىر باستايمىن. سەنەن باسقا ەشكىمگە ۇيلەنبەيمىن، سەنى ەشكىمگە بەرمەيمىن، بىرەۋ الىپ قاشقاننىڭ وزىندە تاۋىپ الىپ، وزىممەن الىپ كەتەمىن. ساعان وزىڭە لايىقتى ۇسىنىس جاسايمىن. قاشان ۇيلەنەيىك دەسەڭ، سول كەزدە ۇيلەنەمىز، ءبىر جىلدان كەيىن دەسەڭ ءبىر جىلدان كەيىن، قازىر دەسەڭ قازىر. الىپ قاش دەسەڭ دە، ۇزاتىپ ال دەسەڭ دە، ايتقانىڭ بولادى» - دەيدى. مەنى سەن عانا جاقسى تۇسىنەسىڭ دەيتىنى بار. «سۇيەمىن» دەيدى عوي، ءبىراق سەنبەيمىن. ەسەگى سۋدان ءوتىپ العان سوڭ، وزەرىپ شىعا كەلەتىندەي كورىنەدى، دەپ وتىر قىز.
«مايىسىپ جۇرەتىن 18 جاستاعى قىز ەمەسپىن، بۇيىرسا، جازدا 25 كە تولامىن. كەيدە كۇيەۋگە شىقپاي قالاتىنداي قورقاتىنىم تاعى بار. ەشكىمدى وڭايلىقپەن ۇناتپايتىنىم تاعى بار. ال مىنا جىگىتكە تۇرمىسقا شىعايىن دەسەم، قاتتى قورقامىن. قاتەلەسۋدەن قورقامىن. سەنگىم كەلەدى، ءبىراق بەلگىسىز بىرنارسە ۇستاپ تۇرادى. تولىعىمەن باس تارتىپ، تالاي ءنومىرىمدى اۋىستىرۋعا تىرىستىم، ءبىراق ولاي دا ىستەي المادىم. ءوزى سىمباتتى جىگىت، سودان با ەكەن، الدە سەنبەگەندىكتەن بە، جانىمدا بولسا دا ەشقاشان مەنىكى بولمايتىنداي كورىنەدى.
تۇرمىسقا شىعۋ ۇلكەن قادام ەكەنىن تۇسىنەمىن. تانىستىعىمىزعا 5-6 جىل بولدى، 5 جىلدىڭ ىشىندە قارىم-قاتىناسىمىزدى ءبىر جاقتى ەتە الماعان ادامنان نە كۇتەمىن دەپ ويلايمىن. كەيدە وتباسى بولعاندا مۇلدەم باسقاشا بولاتىن شىعار دەپ ويلايمىن» - دەيدى قىز.
باسى قاتىپ جۇرگەن قىز، «جاردى ادالىنان جولىقتىرشى، ماعان قايىرلىسىن قىلا كور دەپ اللادان تىلەپ ءجۇر. ومىرلىك جار الدىن الا بەلگىلى دەيدى عوي. كىم ءبىلسىن؟!
قانداي اقىل- كەڭەس بەرە الاسىزدار؟ نە ىستەسەم ەكەن؟ سىزدەردىڭ كەڭەستەرىڭىزدى اسىعا كۇتەم. الدىن الا راقمەت» ايتامىن دەيدى.
ءسىز ءبىر تورەلىگىن ايتىڭىزشى وقىرمان، قىزعا قانداي كەڭەس ايتار ەدىڭىز؟
