پارلامەنتكە، ءماسليحاتقا ىسكەر ازاماتتار كەلۋى كەرەك - ز. قابىلدينوۆ
ونىڭ ويىنشا، قازىرگى ۋاقىتتا پارلامەنت ءماجىلىسىنىڭ كەزەكتەن تىس سايلاۋىن وتكىزۋ وتە وزەكتى بولىپ وتىر.
«قازاقستان رەسپۋبليكاسىنىڭ ازاماتى رەتىندە، قازاقستاننىڭ پاتريوتى رەتىندە، ۇكىمەتتىك ەمەس ۇيىمنىڭ وكىلى رەتىندە، پروفەسسور رەتىندە مەن تولىق وسى باستاماعا قوسىلامىن. نە سەبەپتەن وسىنداي قاجەتتىلىك تۋدى؟ بىرىنشىدەن، الەمدەگى جاعداي وزگەردى. گەوساياسي باعىتىن الساڭىز دا، ەكونوميكالىق- قارجى باعىتىن الساڭىز دا، جاعداي كۇردەلەنىپ كەتتى. بۇگىن عانا ينتەرنەت رەسۋرستاردى قاراساق، مۇنايدىڭ باررەلى 30 دوللاردان تومەندەپ كەتكەن. بۇل بۇكىل الەمدە داعدارىستىڭ جاڭا قارقىنى باستالادى دەگەندى بىلدىرەدى. سوندىقتان ءماجىلىس دەپۋتاتتارىنىڭ 3 فراكسيانىڭ وكىلدەرى پارلامەنتتە ۋاقىتىنان تىس تاراتۋ كەرەك، سونىمەن قاتار ءماسليحات دەپۋتاتتارىنىڭ سايلاۋىن بىرگە وتكىزۋ قاجەت دەگەن ۇسىنىستارىنا تولىعىمەن قوسىلامىن»، - دەيدى ول.
«ەڭ بىرىنشىدەن، ءبىزدىڭ ءماسليحاتتاعى دەپۋتاتتار، ماجىلىستەگى دەپۋتاتتار حالىقتان سەنىم الىپ، الدىمىزدا تۇرعان «ۇلت جوسپارىن» جۇزەگە اسىرۋعا، سونىمەن قاتار الەمنىڭ 30 دامىعان مەملەكەتتەرىنىڭ قاتارىنا ەنۋ تۋرالى ەلباسى تاپسىرماسىن ىسكە اسرىۋعا الاڭسىز كىرىسە الادى.
پارلامەنتتىڭ قۇرامى دا وزگەرەدى. مەن كەيدە وزىمە سۇراق قويامىن، مىنا ءماسليحاتتاردا قانداي ازاماتتار وتىرۋى ءتيىس دەپ. ەڭ ءبىرىنشى - ىسكەر ازاماتتار كەلۋى كەرەك. ەكىنشىدەن، پاتريوتتىق رۋحى وتە جوعارى ادامدار قاجەت. ۇشىنشىدەن، ەلىم، جەرىم دەپ، بۇكىل ءبىلىمىن، بۇكىل كۇشىن، العان تاجىريبەسىن ەلىنە حالقىنا ايانباي جۇمسايتىن ەڭبەكقور ازاماتتار كەلۋى ءتيىس. سوندا عانا ءبىز ەكونوميكالىق داعدارىستان شىعا الامىز. ءماسليحات دەپۋتاتتىعىنا وسىنداي ازاماتتار كەلەتىنىنە سەنەمىن»، - دەپ اتاپ ءوتتى ز. قابىلدينوۆ.
پروفەسسوردىڭ ءمالىم ەتكەنىندەي، سايلاۋعا نەعۇرلىم كوپ پارتيا قاتىسسا، سوعۇرلىم جاقسى مۇمكىنشىلىكتەر اشىلادى.
«جاڭا پارتيالار، جاڭا كوزقاراستار، جاڭا يدەيالار كەلەدى. ودان تەك قازاقستاندىقتار ۇتادى»، - دەپ ءتۇيدى ءسوزىن ورتالىق ديرەكتورى.
اۆتور: جاسۇلان جولدىبايەۆ
