سيريالىق قىز بۇكىل الەمدى جىلاتتى

 وكىنىشكە وراي، ەشبىر ساياسي كۇش قانشاما بەيبىت حالىقتىڭ جاسىن توگىپ، قانشاما ءسابيدىڭ بالالىق شاعىن سوعىس وتىنا ورتەپ جاتقان قاندى وقيعالاردى توقتاتا الماي وتىر. ەسەسىنە، بار جوعى 9 جاستاعى سيريادان شىققان دجينا بوۋ حامدان ەسىمدى قىز ءبىر انىمەن عانا بۇكىل الەمگە «بالالىق شاعىمدى قايتارىڭدار» دەپ، نازىك بولمىسىمەن نارازىلىعىن ءبىلدىردى.

 ءبىر اپتا بۇرىن بالالارعا ارنالعان الەمدىك «داۋىس» شوۋىنىڭ اراب ەلىندەگى نۇسقاسىنا قاتىسقان دجينانىڭ ءانىن 7 ميلليون 200 مىڭ ادام كورىپ، كوزدەرىنە جاس العان. بۇل تەك - ارابشا «داۋىس» شوۋىنىڭ رەسمي اككاۋنتى جاريالاعان ۆيدەونىڭ كورسەتكىشى. ال، الەۋمەتتىك جەلى مەن جۇزدەگەن سايتتار ارقىلى دجينانىڭ جان ايقايىن تىڭداعان ادام قانشاما...!؟

دجينا حامدان «داۋىس» شوۋىنا ليۆاندا تۇراتىن ءانشى قىز رەمي باندالي ورىنداعان «بالالىق شاعىمىزدى قايتارىڭدار، بەيبىت ءومىردى قايتارىڭدار» اتتى جولدارى بار ءاندى ايتىپ شىقتى. الايدا، داۋىسى وتە ادەمى دجينا ءاننىڭ ەكىنشى شۋماعىن ايتا باستاعاندا، كوز جاسىنا ەرىك بەرەدى.. . ءاننىڭ ءسوزىن ۇمىتقاننان، بولماسا، ءان نوتالارىنا داۋىسى جەتپەگەندىكتەن ەمەس، ءوزى قاتارلاس قانشاما سيريالىق ءسابيدىڭ تاعدىرى ويىنا ءتۇسىپ، جىلادى. وسىلايشا، قازىلار القاسى مەن زالداعى حالىقتى جىلاتتى. قارا تۇندەي تۇنىق كوزدەرىنەن اققان جاستى ەكى قولىمەن كەزەك- كەزەك سۇرتكەن كىپ- كىشكەنتاي قىز بۇكىل الەمگە «ءبىزدىڭ جازىعىمىز نە؟ » دەپ تۇرعانداي.. .

ەستەرىڭىزگە سالا كەتەيىك، ۇكىمەتكە قارسى شارالاردان باستالعان سيرياداعى ازاماتتىق سوعىس 2011 - جىلدىڭ ناۋرىزىنان بەرى توقتاعان جوق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى