قازاقستاندا مەملەكەتتىك قىزمەتكەرلەرگە قوعامدىق ورىنداردا ماس كۇيىندە كورىنۋگە تىيىم سالىندى
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر مەملەكەتتىك قىزمەت ىستەرى ۆيتسە- مينيستر ايگۇل شايىموۆا ءمالىم ەتتى.
جۇرگىزىپ جاتقان رەفورمالار اياسىنداعى ازىرلەنگەن شارالارعا توقتالعان ول، العاش رەت جاڭا ەتيكالىق كودەكس اياسىندا قىزمەتكەرلەردىڭ ءتۇرلى جاعدايلاردا ءجۇرىس- تۇرىسىنىڭ ستاندارتتارى ايقىندالعانىن، ياعني بۇندا ونىڭ جۇمىس ۋاقىتىنداعى ءتارتىبى، ارىپتەستەرىمەن قاتىناسى جانە قىزمەتىنەن تىس ۋاقىتتاعى ءجۇرىس- تۇرىسى ەسكەرىلگەنىن جەتكىزدى.
ماسەلەن، مەملەكەتتىك قىزمەتكەرلەرگە ادال، ادىلەتتى جانە قاراپايىم ءارى سىپايى بولۋى سەكىلدى تالاپتار قويىلادى. ولار شەشىم قابىلداعان كەزدە زاڭدىلىقتىڭ ساقتالۋىن قامتاماسىز ەتۋگە مىندەتتى، ياعني بۇل ەڭ باستى ولشەم جانە ەڭ باستى تالاپ بولىپ سانالادى.
«قىزمەتىنەن تىس ۋاقىتتا ولار قوعامعا قارسى مىنەز- قۇلىق ارەكەتتەرگە، ونىڭ ىشىندە قوعامدىق جەرلەردە الكوگولدىك ىشىمدىككە ماسايعان كۇيىندە بولۋىنا جول بەرمەۋى ءتيىس. بەلگىلەنگەن ستاندارتتاردى قاتاڭ ساقتاۋ - حالىقتىڭ مەملەكەتتىك اپپاراتقا سەنىمىن ارتتىرا تۇسەدى»، - دەدى ول.
اۆتور: رۋسلان عابباسوۆ
