ەلىمىز ءۇشىن ماڭىزدى جاڭا كەزەڭدە پارلامەنتتە قاي پارتيا جۇمىس ىستەيتىنىن حالىق ايقىنداۋى كەرەك - ا. پەرۋاشيەۆ
بۇگىن ءماجىلىستىڭ جالپى وتىرىسىندا بەسىنشى سايلانعان پارلامەنت ءماجىلىسىن تاراتۋ جانە جاڭا سايلاۋدى تاعايىنداۋ تۋرالى ق ر پرەزيدەنتىنىڭ اتىنا جولدانعان ۇندەۋدى تالقىلاۋ بارىسىندا «اق جول» پارتياسى فراكسياسىنىڭ ءتوراعاسى، دەپۋتات ازات پەرۋاشيەۆ وسىلاي مالىمدەدى.
ءسوز بارىسىندا دەپۋتات پەرۋاشيەۆ ماجىلىستەگى پارتيا فراكسيالارىنىڭ باستاماسىن تولىق قولدايتىنىن اتاپ ءوتتى.
«سايلاۋشىلار ءوز تاڭداۋىن ناقتىلاپ، ەلىمىز ءۇشىن ماڭىزدى جاڭا كەزەڭدە پارلامەنتتە قاي پارتيا جۇمىس ىستەيتىنىن حالىق ايقىنداۋى كەرەك. قازىرگى كۇنى قوعامداعى تۇراقتىلىق، كەلىسىم مەن ەكونوميكانىڭ تۇيىتكىلدى ماسەلەسىن شەشۋ بۇرىنعىدان دا مەيلىنشە وزەكتى. كاسىپكەرلەرگە دە سىلكىنىستەر كەرەك ەمەس. ال جاڭا سايلاۋ وزەكتى ماسەلەلەرگە قاتىستى قوعامدىق كەلىسىمدى نىعايتاتىنىنا سەنىم مول. ءماسليحاتتىق دەڭگەيدەگى جاڭا سايلاۋلار دا قوعامنىڭ نە كۇتەتىنىن تولىق تۇسىنۋگە جاعداي جاسايدى»، دەدى ا. پەرۋاشيەۆ.
فراكسيا جەتەكشىسى كەزەكتەن تىس سايلاۋدى كوپ سوزباي وتكىزۋ اسا ماڭىزدى ەكەنىن ايتىپ، بۇنىڭ پرەزيدەنت رەفورمالارىن ساۋاتتى جۇزەگە اسىرۋعا ءوز سەپتىگىن تيگىزەتىنىن العا تارتتى.
«بۇل ەرتەڭگى كۇنگە دەگەن سەنىمدى نىعايتادى. سونىمەن قاتار، جاڭا كەزەكتەن تىس سايلاۋ ۇلتتىق بيزنەسكە، تۇتاستاي رەسپۋبليكاعا اسەرىن تيگىزەتىن ۋاقىتشا قيىندىقتاردى بارىنشا جەڭىل وتكەرۋگە مۇمكىندىك بەرەدى دەپ سانايمىز. ال ءماجىلىس پەن ءماسليحات سايلاۋىن بىرىكتىرىپ وتكىزۋ بيۋدجەت قاراجاتىن ۇنەمدەۋ تۇرعىسىنان ماڭىزدى»، دەدى ازات پەرۋاشيەۆ.
اۆتور: قانات مامەتقازى ۇلى
