جارىڭىزدى ماقتاپ تۇراسىز با؟
ول الەمنىڭ تىرشىلىگى مەن باقىتى ەر كىسىنىڭ ادالدىعى، جاناشىرلىعى، ەرەكشە مەيىرىمى جانە ايەلدىڭ كورسەتۋى قاجەتتى شىنايى، بايىپتى ءارى وپالى قۇرمەتىمەن جۇزەگە اسادى».
مۇسىلمان عالىمدارى تىلگە تيەك ەتكەن وسى ءبىر ءسوز وتباسىلىق ءومىرىمىزدىڭ ءاربىر ساتىندە بىزدەر ءۇشىن داۋا ىسپەتتى. وسى سەكىلدى وتباسىلىق ومىرىمىزگە قاجەتتى ءتورت سيقىرلى نارسە دە بار: «ماقتاۋ، العىس ءبىلدىرۋ، كۇلىمسىرەۋ جانە تاۋەكەل». وسى تىلسىم سوزدەر تەك جۇبايلار اراسىنداعى قاتىناستاردا ەمەس، ادامي قاتىناستاردا دا اسا ءبىر ماڭىزعا يە. وتباسىندا تىپتەن ومىرشەڭ قاعيدا دەۋگە بولادى. مۇسىلمان پسيحولوگتار بۇل سوزدەردى دارىگە ۇقساتىپ، وتباسىلىق ومىردە جۇبايلار اراسىنداعى ءدۇردارازدىقتاردى شەشۋدە وسى ۇعىمدارعا جۇگىنۋ كەرەكتىگىن ۇسىنۋدا. قالاساڭىزدار، ماقتاۋ، العىس ايتۋ، كۇلىمسىرەۋ جانە تاۋەكەلدىڭ جانۇيامىزعا اسەرىنە ءبىر قارايىق.
جۇبايلار ءبىر-ءبىرىن اركەز كوتەرمەلەپ، ماقتاپ وتىرۋى ءتيىس، سوندا جاقسى ىستەر ەسەلەنىپ جالعاسا تۇسەدى. جۇبايلاردىڭ ءبىر- بىرىنە دەگەن سىيلاستىعى مەن جانقيارلىقتارىنا العىس ءبىلدىرۋدى، تۇپتەپ كەلگەندە، ادامگەرشىلىك پەن سىپايىلىقتىڭ تالابى.
نەگە دەسەڭىز، ادامزات ماقتاۋلىسى مۇحاممەد پايعامبارىمىز (س. ا. ۋ. ) ادامعا راقمەت ايتۋدى بىلمەيتىن جاننىڭ اللاعا دا شۇكىر ەتىپ جارىتپايتىنىن ەسكەرتەدى. وسى اقيقات جانۇيالارىمىز ءۇشىن دە قاجەتتى. جۇبايلار ءبىر-ءبىرىنىڭ جاقسى جاقتارىن ماقتاپ وتىرۋى ءتيىس، سوندا بۇل جاقسى ىستەر ەسەلەنىپ، جالعاسا تۇسەدى. ءمۇمين ايەل ەرىنىڭ جاساپ جۇرگەن ىستەرىن باعالاپ، ءمۇمين ەر كىسى دە ۇيدەگى شارۋالاردى رەتتەپ، بالالاردى يماندىلىققا باۋلىپ وتىرعان جۇبايىن ماقتاپ قويۋى كەرەك. ايتالىق، 20 جىل بويى كۇندە كەشكىسىن كۇيەۋىنە اس ازىرلەگەن ءبىر ايەلدى ويلايىق. كۇيەۋى بۇعان داعدىلانىپ العاندىقتان ءمان بەرمەيدى دە. ونىڭ ويىنشا، بۇل ماقتاۋدى قاجەت ەتپەيدى، ويتكەنى جۇبايىنىڭ كۇندەلىكتى مىندەتى.
شىنتۋايتىندا، كەشكىسىن ايەلىنىڭ قولىن الاقانىنا سالىپ وتىرىپ: «سەن تۋرا 20 جىلدان بەرى كەشكى استى دايىنداپ كەلە جاتىرسىڭ. اللا قولىڭا قۋات بەرسىن. وزىڭە ءبىر راقمەت ايتىپ قويايىن» دەسە، ايەلىنىڭ كوڭىلى ءوسىپ، ەرتەسى كۇنگى كەشكى استى ودان دا ۇلكەن ىنتا، ماحابباتپەن ازىرلەيتىن بولادى.
تاۋەكەل - جۇبايلاردى ءبىر-بىرىنە جاقىنداتادى
ءومىردىڭ ءار ساتىندە تاۋەكەلگە جۇگىنۋ - يماننىڭ تالابى بولىپ تابىلادى. جانۇيادا دا كەزدەسكەن قيىندىقتاردى تاۋەكەلمەن قارسى الۋ - ولاردىڭ شەشىمىن جەڭىلدەتەدى. ومىردە كەيدە ءبىز نە ىستەسەك تە ەركىمىزدەن تىس، وزگەرتە المايتىن جايسىزدىقتار كەزدەسۋى مۇمكىن. اۋرۋ، ءولىم، قولداعى دۇنيەسىنەن ايرىلىپ قالۋ سەكىلدى. بارلىق ءىس قالىپتى ءجۇرىپ بارا جاتقاندا، جارىڭىز تاپ بولعان اۋرۋعا تاۋەكەل ەتە الساڭىز، بۇل جۇبايلاردى ءبىر-بىرىنە جاقىنداتا تۇسەدى. نەمەسە ماتەريالدى قيىندىقتار كەزىندە دە جارىڭىزبەن ەتەنە جاقىن بولۋىڭىز، سول كۇندەر وتكەندە، قارىم-قاتىناستارىڭىزدى بۇرىنعىدان دا كۇشەيتە ءتۇسۋى مۇمكىن. ءبىر نارسە ۇناماعاندا، دەرەۋ اجىراسۋعا بەل بۋعاننان گورى تاۋەكەل، سابىرمەن سول ماسەلەنى شەشۋ ەڭ دۇرىسى. پايعامبارىمىز (ساللاللاھۋ ءالايھي ءۋا ءساللام): «ايەلدەرىڭمەن جاقسى سىيلاسىڭدار. ەگەر ءبىر مىنەزىن ۇناتپاساڭدار، اللا سەندەرگە ۇناماعان سول نارسەدە كوپ جاقسىلىق جاسىرعان بولۋى مۇمكىن»، - دەپ وي سالادى. بۇل حاديس تابيعاتىنان سەزىمتال ءارى تەز وكپەلەگىش بولىپ كەلەتىن ايەلدەرگە كۇيەۋلەرىنىڭ بۇرىنعىدان دا كوبىرەك تۇسىنىكپەن قاراۋى قاجەتتىگىن كورسەتۋدە.
ارالاستىققا جول اشاتىن ەڭ جەڭىل جول: كۇلىمسىرەۋ
سيقىرلى تاسىلدەردىڭ ءبىرى - كۇلىمسىرەۋ. مۇسىلمان ءبىر پسيحولوگ ەرلى-زايىپتىلارمەن جاساعان كەزدەسۋىندە ەكى جاققا دا ۇنامايتىنى قاتۋلى قاباق ەكەنىن ايتقان. وكىنىشكە قاراي، كۇلىمسىرەسەك، ءبىر جەرىمىز كەمىپ قالاتىنداي بولىپ تىجىرىنامىز. انىعىندا بىرەۋمەن سويلەسە باستاعاندا ءسال عانا كۇلىمسىرەۋىڭىز ونىڭ دا اشىلىپ، سىزگە كوبىرەك نازار اۋدارۋىنا كومەكتەسەدى. قارىم-قاتىناسقا جول اشاتىن ەڭ وڭاي جول - كۇلىمسىرەۋ ءارى وتباسىندا دا كوبىرەك جىلى جۇزدىلىك تانىتۋ.
islam.kz
