قازاقستاندىق عالىمداردىڭ زەرتتەۋ ناتيجەلەرى شەت ەلدەردىڭ دە بيزنەسىنە ەنەتىن بولادى

بۇل تۋرالى بۇگىن سەناتتىڭ الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا ءبىلىم جانە عىلىم ۆيتسە-ءمينيسترى تاحير بالىقبايەۆ ءمالىم ەتتى.

ەسكە سالايىق، كوميتەتتە «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (ءونىمدى يننوۆاتسيالاردى ىنتالاندىرۋ جوباسى) راتيفيكاتسيالاۋ تۋرالى» زاڭ جوباسى تالقىلانعان بولاتىن.

«ءونىمدى يننوۆاتسيالاردى ىنتالاندىرۋ جوباسى اياسىندا شەتەلدەردە تەحنولوگيالار ترانسفەرتىمەن اينالىساتىن ەكى كەڭسە اشۋعا نيەتتىمىز. بۇل ءۇشىن جۇمىس ىستەپ تۇرعان شەتەلدىك كەڭسەلەر اراسىندا ارنايى كونكۋرستار وتكىزەتىن بولامىز. ول كەڭسەلەر قازاقستاندىق عالىمداردىڭ زەرتتەۋ ناتيجەلەرىن شەت ەلدەردىڭ بيزنەسىنە ەنگىزۋدى قاراستىرادى. سوسىن اتالعان كەڭسەلەر ارقىلى شەت ەلدەردە قاجەتتى تەحنولوگيالاردى دا وزىمىزگە تارتۋدى قاراستىرامىز»، - دەدى ت. بالىقبايەۆ.

ونىڭ ايتۋىنشا، تەحنولوگيالاردى كوممەرتسيالاندىرۋ كەڭسەلەرىنىڭ الەۋەتىن ارتتىرۋ شارالارى دا قاراستىرىلماق. ماسەلەن، 2016-2020-جىلدار ارالىعىندا ۇدەمەلى يندۋستريالىق-يننوۆاتسيالىق دامۋ باعدارلاماسىنا قاتىساتىن جوعارى وقۋ ورىندارى اياسىندا كوممەرتسيالاندىرۋ كەڭسەلەرىنىڭ الەۋەتىن ارتتىرۋ كوزدەلەدى. بۇل ماقساتقا 10 ملن دوللار بولىنەدى. «سونىمەن بىرگە، ۇلتتىق يننوۆاتسيالىق جۇيەنى كۇشەيتۋ جانە ينستيتۋتسيونالدىق قۇرىلىمداردىڭ الەۋەتىن ارتتىرۋ ماقساتىندا يننوۆاتسيالىق تالداۋلار ورتالىعى قۇرىلادى. ونداي ورتالىقتاردا تۇتاستاي رەسپۋبليكامىزداعى يننوۆاتسيالىق مۇمكىندىكتەرگە، يننوۆاتسيالىق شارالاردىڭ تيىمدىلىگىنە مونيتورينگ جۇرگىزىلىپ، وعان باعالاۋلار جاسالادى. بۇل جۇمىس عىلىم قورىنىڭ نەگىزىندە جۇزەگە اسادى»، - دەدى ت. بالىقبايەۆ.

  اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى