مەملەكەتتىك قىزمەتكە قابىلداۋدىڭ جاڭا جۇيەسى ەنگىزىلدى
تەستىلەۋ ەرەجەسى دە وزگەردى. جاڭا جىلمەن كەلگەن جاڭا تۇزەتۋدىڭ ارتىقشىلىعى قانداي؟ تەستىلەۋدىڭ قاي تۇستارى جەتىلدىرىلدى؟ ارتۋر ءبىرىمجانوۆ بۇگىن مەملەكەتتىك تەستىلەۋدەن سۇرىنبەي ءوتتى. كۇنى-ءتۇنى كوز مايىن تاۋىسىپ، تالماي، ءتۇرلى زاڭدى جاتتاعان ەڭبەگى ەش كەتپەدى. ول ب كورپۋسىنىڭ س5 ساناتىنداعى قىزمەتكە ورنالاسۋدى كوزدەگەن.
ارتۋر ءبىرىمجانوۆ، قالا تۇرعىنى:
- قازىرگى ۋاقىتتا ەش جەردە جۇمىس ىستەمەيمىن. اقپاراتتى egov.kz سايتىنان تاۋىپ، حالىققا قىزمەت كورسەتۋ ورتالىعىندا تەستكە قاتىسۋ تۋرالى ءوتىنىش قالدىردىم. ەكىنشى باعدارلاما بويىنشا تەست تاپسىرعاندارعا 100 مينۋت ۋاقىت بەرىلەدى. ال مەن بارلىق سۇراقتى 70 مينۋتتا بەلگىلەپ شىقتىم.
استانادا ارتۋر سەكىلدى قاڭتاردىڭ العاشقى كۇندەرىنەن بەرى جۇزگە جۋىق ادام جاڭا ەرەجەمەن تەست تاپسىرعان. بۇرىن ۇمىتكەر ءار زاڭعا بەرىلگەن 15 سۇراقتىڭ كەمى 10 ىنا جاۋاپ بەرۋى ءتيىس بولاتىن. ال وسى جۇيە بويىنشا ول شەكتەۋ الىندى. جالپى دۇرىس جاۋاپتار سانى ەسەپتەلەدى. تەست باعدارلاماسى 3 ساناتقا بولىنگەن.
مارات تۇرسىنوۆ، «مەملەكەتتىك قىزمەتتى باسقارۋ ۇلتتىق ورتالىعى» ا ق مۇشەسى:
- ءبىرىنشى باعدارلاما 135 سۇراقتان تۇرادى. سونىڭ ىشىندە تەستىلەۋشىلەرگە 95 سۇراقتى بەلگىلەۋ قاجەت. ەكىنشى باعدارلاما 120 سۇراق، ونىڭ ىشىندە 72 دۇرىس جاۋاپ بولۋ قاجەت. ءۇشىنشى باعدارلاما سايكەسىنشە 90 سۇراق، 45 دۇرىس جاۋاپ بولۋى قاجەت.
بىلتىر ەل بويىنشا 59 مىڭ ادام مەملەكەتتىك تەستىلەۋدى تاپسىرعان. ءبىراق ونىڭ %33 ى عانا وتكەن. وسىعان دەيىن سىننان سۇرىنگەندەر قايتا تەستكە قاتىسۋى ءۇشىن 3 اي كۇتۋى ءتيىس ەدى. قازىر مەرزىم 2 ايعا دەيىن قىسقارعان. تاعى ءبىر وزگەرىس - مەملەكەتتىك قىزمەتكە ءوتۋدىڭ جاڭا III كەزەڭى شىقتى.
عانيجان اسان، ق ر مەملەكەتتىك قىزمەت ىستەرى مينيسترلىگىنىڭ وكىلى:
- III كەزەڭ - بۇل مەملەكەتتىك ورگاننىڭ وزىندە، ياعني بوس لاۋازىمعا كونكۋرس جاريالانعان مەملەكەتتىك ورگاندارعا اڭگىمەلەسۋ. بۇل ساتىدا ۇمىتكەردىڭ جەكە بىلىمدەرى، تاجىريبەلەرى ايقىندالادى. سونىڭ ناتيجەسى بويىنشا كونكۋرستىق كوميسسيا القالى تۇردە شەشىم قابىلداپ، بەلگىلى ءبىر كانديداتتى جەڭىمپاز رەتىندە تانيدى.
مەملەكەتتىك قىزمەت تۋرالى زاڭنامانى جەتىلدىرۋ، ۇمىتكەرلەردى سۇرىپتاپ، ساپالى ماماندى تاعايىنداۋعا تىكەلەي سەپتىگىن تيگىزەدى.
www.24.kz
