شەتەلدىك باسىلىم قازاقستان ۇلتتىق قورىنىڭ قارجىسى قاي ۋاقىتتا بىتەتىنىن بولجادى
«قازاقستان ۇلتتىق بانك وكىلىنىڭ ايتۋىنشا، قازاقستان ۇلتتىق قورىنداعى 64 ميلليارد دوللار التى نەمەسە جەتى جىل ىشىندە تاۋسىلۋى مۇمكىن. سەبەبى، مۇناي باعاسى ارزانداعان سايىن قورعا مۇناي ەكسپورتىنان كەلىپ تۇسەتىن قاراجات ازايىپ جاتىر، ۇكىمەت ەل ەكونوميكاسىنا قولداۋ كورسەتۋ ءۇشىن ۇلتتىق قوردىڭ قاراجاتىن جۇمساپ جاتقانى دا اسەر ەتۋدە»، - دەپ جازادى Wall Street Journal.
باسىلىمنىڭ مالىمەتىنە سەنسەك، ۇكىمەت جىل سايىن قوردان $9,5 ميلليارد جۇمسايدى.
ۇلتتىق بانك شىعىندى ازايتىپ، سالىق سالىمىن كوبەيتۋى ءتيىس
«ۇلتتىق قورداعى جيناق اقشا كولەمى 2014 -جىلدىڭ تامىزىنداعى 77 ميلليارد دوللار بولعان شەكتى كورسەتكىشپەن سالىستىرعاندا %17 عا ءتۇسىپ كەتكەن. ۇكىمەت جىل سايىن قوردان $9,5 ميلليارد جۇمسايدى. قازاقستاندىق ساياساتكەرلەر جانە ۇلتتىق بانك شىعىندى ازايتىپ، سالىق سالىمىن كوبەيتۋى جانە قورعا تىكەلەي ينۆەستيتسيا سەكىلدى جوعارى ءتۇسىمدى اكتيۆتەر سالۋى ءتيىس. ءبىز ۇلتتىق ءال- اۋقات قورىن «جەپ جاتىرمىز». ءبىز جيناپ ۇلگەرگەن قاراجات - كاپيتاليزاتسياعا باعىتتالعان جالعىز اقشامىز. ۇكىمەت ۇلتتىق قوردىڭ ينۆەستيتسيالىق مەنەدجمەنتىنە نازار اۋدارۋ كەرەك»، - دەيدى ۇلتتىق بانكتىڭ 2012 -جىلى قۇرىلعان ۇلتتىق ينۆەستيتسيالىق كوپوراتسياسى باسشىسى بەرىك وتەمۇرات.
قازاقستاننان باستاپ ساۋد ارابياسىنا دەيىنگى ەلدەردىڭ ۇلتتىق قورىنداعى تريلليونداعان دوللار قاۋىپتى جاعدايدا تۇر دەپ جالعاستىردى باسىلىم.
«بۇل ەلدەردىڭ ۇكىمەتى جوعارى مۇناي تابىسىنا ۇيرەنىپ قالىپ، تاۋەلسىز قوردىڭ قولما قول اقشاسىنا قول جۇگىرتتى. حالىقارالىق ۆاليۋتالىق قور ازيا، افريكا، لاتىن امەريكا جانە تاياۋ شىعىس ەلدەرىنە تاۋەلسىز اكتيۆتەر ماسەلەسىنە وراي جوسپار قۇرۋعا كەڭەس بەرەدى»، - دەپ جازادى شەتەلدىك باسىلىم.
وتەمۇرات بولسا، ءوز جۇمىسىنان ايىرىلىپ قالامىن با دەپ الاڭداۋلى. ونى قىزمەتكە تاعايىنداعان ۇلتتىق بانك ءتوراعاسى 2014 -جىلى قىزمەتىنەن كەتكەن. ال ۇلتتىق بانكتىڭ جاڭا باسشىسىمەن كەزدەسكەن وتەمۇرات ۇلتتىق ينۆەستيتسيالىق كورپوراتسيانىڭ بولاشاعى بۇلىڭعىر دەگەن توقتامعا كەلگەن. ۇلتتىق بانك ءتوراعاسىنىڭ ورىنباسارى ءالى كۇنگە دەيىن تاعايىندالماعان.
ۇلتتىق بانك جاڭا باسشىسىنىڭ باسقا ماسەلەلەرمەن قولى بوساماي ءجۇر
"ۇلتتىق بانك جاڭا باسشىسىنىڭ باسقا ماسەلەلەرمەن قولى بوساماي ءجۇر. سوڭعى ەكى جىلدا ءبىرتالاي جۇمىستار اتقارعان باستى باعىتىمىز قاراۋسىز قالۋدا»، - دەيدى وتەمۇرات.
قازاقستاننىڭ ۇلتتىق بانكى بۇل ورايدا مالىمدەمە جاساۋدان باس تارتتى.
«ەگەر $100 ميللياردقا ءتۇسىم مولشەرى جىلىنا $5-6 ميلليارد بولسا، بۇل ۇكىمەتكە ءبىرتالاي قولعابىس بولار ەدى. ءبىز تۇسىمدەردى اشىق ەتىپ، قالاي ينۆەستيتسيالايتىنىمىزدان باستاپ كاپيتالدىڭ كەلۋ- كەتۋىنە دەيىن اقپاراتتى جاريا ەتىپ وتىرۋىمىز كەرەك. الايدا قازىرگى ۋاقىتتا مۇنى جاساۋ قيىن»، - دەپ جالعاستىردى وتەمۇرات.
«ۇلتتىق قوردىڭ اقشا كوزى بولىپ تابىلاتىن قازاقستان مۇناي كەن ورىندارىنىڭ پايداسىن ءبولىسۋ تۋرالى كەلىسىمشارت كوپشىلىككە قولجەتىمدى ەمەس، قور، ءتىپتى ءوزىنىڭ جەكە سايتىن دا اشپاعان»، - دەيدى ول.
35 جاستاعى ۇلتتىق كورپوراتسيا باسشىسى بولسا، ءوزىن حالىقارالىق تاجىريبەسى بار قازاقستاندىقتاردىڭ جاڭا ۇرپاق وكىلى سانايتىنىن العا تارتقان.
