يتالياندىق سىنشىلار قازاقستاندىق ونەرپازداردىڭ جەتىستىكتەرىن جوعارى باعالادى

27, 29 -جەلتوقسان جانە 2, 3 -قاڭتار كۇندەرى «استانا وپەرا» تەاترىنىڭ سوليستەرى اتاقتى يتالياندىق «كارلو فەليچە» تەاترىندا ج. پۋچچينيدىڭ «بوگەما» پرەمەراسىندا ونەر كورسەتتى.

ميمي پارتياسىن ايگۇل نيازوۆا ورىنداسا، رۋدولفتى - مەدەت چوتابايەۆ، ميۋزەتتانى سالتانات احمەتوۆ، مارسەلدى - تالعات مۇسابايەۆ، شوناردى - ەۆگەني چاينيكوۆ، كوللەندى - ارتۋر قايىپقۇلوۆ سومدادى.

جاس قازاقستاندىق توپتىڭ ونەرىن «ll Sole 24 Ore Domenica» گازەتىنىڭ ساراپشىسى جوعارى باعالاپ، قازاق ارتىستەرى ەۋروپالىق وپەراعا شىعىستىڭ مانەرىن سىيلاي ءبىلدى دەپ اتاپ ءوتتى.

«ەتتورە سكولا قويىلىمىن ءسوزسىز جەتىستىككە قازاق انشىلەرىنىڭ تولىق قۇرامى جەتەلەدى دەسە دە بولادى. وپەرا جۇلدىزى ايگۇل نيازوۆا (ميمي) داۋىستىڭ ءمىنسىز قىرلارىن اشىپ، كەرەمەت اكتەرلىكتى پاش ەتتى. مەدەت چوتابايەۆ (رۋدولف) كەزىندەگى جاس پاۆاروتتي سياقتى جوعارى نوتالاردى الادى. ماعان اسىرەسە سالتانات احمەتوۆانىڭ ورىنداۋىنداعى ميۋزەتتا ۇنادى. ونىڭ تاماشا، جارقىن تەمبرى تاڭقالدىرادى. شوناردى سالعان ەۆگەني چاينيكوۆتە باتىستىڭ داۋىس تەمبرى باسىمىراق»، - دەلىنگەن ماقالادا.

ق ر ەڭبەك سىڭىرگەن قايراتكەرى سالتانات احمەتوۆانىڭ اتاپ وتكەنىندەي، ەۋروپالىق ساحنادا ەۋروپالىق ارتىستەرمەن بىرگە ونەر كورسەتۋ قازاقستاندىق ونەرپازدار ءۇشىن ۇلكەن تاجىريبە.

«ءبىزدىڭ انشىلەر يتالياندىق ارىپتەستەرىنەن ەش كەم ەمەس. بارلىعى جوعارى دەڭگەيدە ءوتتى، داۋىس جاعىنان دا، اكتەرلىك جاعىنان دا. ءبىزدىڭ قاتىسۋىمىزبەن وتكەن پرەمەرالىق كۇندەردە انشلاگ بولدى»، - دەيدى ول.

ارتىستەردىڭ ايتۋىنشا، ەكىنشى، ءۇشىنشى، ءتورتىنشى كۇندەردەن سوڭ، قازاق ارتىستەرىن جانكۇيەرلەر سىرتتا قولتاڭبا الۋ ءۇشىن تورۋىلداپ تۇراتىن بولعان. سونىمەن قاتار يتاليادا وقىپ جاتقان ءبىر توپ قازاقستاندىق ستۋدەنتتەر دە قازاق انشىلەرىن تىڭداۋعا ارنايى كەلگەن. ورىنداۋشىلىق شەبەرلىكتى تىڭدارماندار عانا ەمەس، ديريجەرلەر دە جوعارى باعالادى. قازاقستاندىق انشىلەرگە بولاشاقتا بىرلەسىپ جۇمىس جاساۋ جونىندە ءبىرقاتار ۇسىنىستار ءتۇسىپتى.

«ءبىزدىڭ ۋاقىت قازاقستان مادەنيەتى مەن ونەرىنىڭ ورلەۋ كەزەڭى. ءبىزدىڭ سوليستەردىڭ شەبەرلىگى حالىقارالىق دەڭگەيگە دەيىن كوتەرىلدى. بۇنى شەتەلدىك باسىلىمدار دا اتاپ وتۋدە. مۇمكىن ءبىز ونى بايقاماي جاتقان شىعارمىز. ءبىراق قازاقستان مادەنيەتى مەن ونەرىنىڭ رەناسسانسى، اسىرەسە وپەرا جانە بالەت سىندى كلاسسيكالىق ونەردە قاتتى بايقالۋدا»، - دەيدى «استانا وپەرا» تەاترىنىڭ ديرەكتورى تولەۋبەك الپيەۆ.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى