استانالىقتاردى ينتەرنەت الاياقتارى سان سوقتىردى
قالانىڭ ءى ءى د باسپا ءسوز قىزمەتى تەرگەۋشىلەر ءىرى اقشالاي قاراجاتىنان ايىرىلعان بىرنەشە جابىرلەنۋشىلەردىڭ شاعىمى بويىنشا تەرگەۋ جۇرگىزىپ جاتقاندىعىن حابارلادى.
«بارلىق جاعداي جەڭىل قىلمىستىق سحەمامەن جۇزەگە اسقان. جابىرلەنۋشىلەر ينتەرنەت ارقىلى بارىنشا تومەن باعادا جىلجىمايتىن مۇلىك نەمەسە تاۋار تاپقان، بۇل رەتتە مۇلىكتىڭ نەمەسە تاۋاردىڭ بارىن جانە مەملەكەتتىك ورگانداردا تىركەلگەنىن كۋالاندىراتىن قاجەتتى قۇجاتتارىن تەكسەرمەي، شەتەلدەگى «ساتۋشىلارمەن» بايلانىسقان. ءبىزدىڭ ازاماتتار پاتەردىڭ نەمەسە تاۋاردىڭ بار ەكەنىنە، سونداي-اق شەتەلدە «ساتۋشىلاردىڭ» جۇمىس ىستەيتىنىنە سەنىپ، تولەم قابىلەتتىلىگىنە كەپىل رەتىندە «Money Gram» نەمەسە «Western Union» جۇيەسى ارقىلى اقشا اۋدارعان، ونىڭ باسىم بولىگى ءىرى سومادان تۇرادى. بۇل رەتتە اقشا اۋدارىمى جابىرلەنۋشىلەردىڭ اتىنان نە بىرەگەي كودىن كورسەتە وتىرىپ ولاردىڭ تۋىسقاندارىنىڭ اتىنا وتكەن.
سودان كەيىن الاياقتار جابىرلەنۋشىلەردەن بىرەگەي كودى جوق بانك قۇجاتىنىڭ كوشىرمەسىن سكانەرلەپ، ولاردىڭ مەكەنجايىنا ەلەكتروندىق پوشتا ارقىلى جىبەرۋدى وتىنگەن. قىسقا ۋاقىت ىشىندە كورسەتىلگەن قاراجاتتى بەلگىسىز بىرەۋلەر اتالمىش شوتتان شەشىپ العان» - دەدى استانا ق. ءى ءى د تەرگەۋ ءبولىمىنىڭ باستىعى پوليتسيا مايورى المات اقىتايەۆ.
كەيىن جابىرلەنۋشىلەر شوتلانديا، پورتۋگاليا، فرانسيا سياقتى كەيبىر ەۋروپا ەلدەرىندە «Money Gram» نەمەسە «Western Union» جۇيەسى ارقىلى اۋدارىلعان اقشانى الۋ ءۇشىن بىرەگەي كود تالاپ ەتىلمەيتىنىن انىقتاعان. الاياقتاردىڭ جابىرلەنۋشىلەرمەن بايلانىسىپ جۇرگەن ІР مەكەنجايىن تەكسەرۋ بۇل مەكەنجايلار جوعارىدا كورسەتىلگەن ەلدەرگە تيەسىلى ەكەنىن كورسەتتى.
