يۋنەسكو باسشىسى ب ۇ ۇ باس حاتشىسى ورىنتاعىنا ۇمىتكەر بولۋ نيەتىن قۋاتتادى
بۇل تۋرالى بولگار ساياساتكەرى جەكسەنبى كۇنى «نوۆا تەليەۆيزيا» بولگارلىق تەلەارناسىنا بەرگەن سۇحباتىندا ءمالىم ەتتى، دەپ حابارلادى ت ا س س.
«الداعى ب ۇ ۇ باس حاتشىسىن سايلاۋ تاقىرىبىنا تولىق شوعىرلاندىم. ۇلتتىق جاۋاپكەرشىلىكتى سەزىنەمىن جانە ولاي (سايلانۋ) بولۋىنا جاقسى مۇمكىندىگىم بار دەپ ويلايمىن. سايلاۋدا جەڭىپ شىعاتىنىمدى دالەلدەدىم»، - دەدى بوكوۆا.
«بولگاريادان ۇمىتكەر بولىپ تۇسكىم كەلەتىنىن ءارقاشان اتاپ كورسەتەمىن، بۇل ەڭ ماڭىزدىسى»، - دەدى ول. - ويتكەنى بۇل لاۋازىمدا ادام بارلىق مۇددەلى تاراپتاردىڭ قولداۋىنا يە بولۋى ءتيىس. ارينە، ەڭ الدىمەن، قاۋىپسىزدىك كەڭەسى تۇراقتى مۇشەلەرىنىڭ قولداۋى قاجەت».
بوكوۆا ونىڭ كانديداتۋراسىن حالىقارالىق كوشباسشىلار كوبىرەك قولداپ وتىرعانىن باسا ايتتى، دەگەنمەن بۇل تاقىرىپتا بولگاريادا ءارتۇرلى ۇستانىمداعى ماتەريالدار كوبىرەك پايدا بولىپ وتىرعانىن جەتكىزدى. «مەنى سىرتقى قولداۋ ۇلعايۋىمەن بىرگە ءارتۇرلى ۇستانىمداعى، قارالايتىن جاريالانىمدار كوبەيە باستاعانى وكىنىشتى. بارىنە بىردەي ۇناۋ مۇمكىن ەمەس، سونىمەن قاتار بارلىعىنىڭ بىردەي بىرەۋدىڭ پىكىرىمەن كەلسپەۋى دە مۇمكىن. ءبىراق تا مەن ءوزىمدى قولدايتىن كۇشتەردى بىرىكتىرە الامىن دەپ ويلايمىن».
جەكسەنبى كۇنى بولگاريا ديپلوماتيالىق دوستاستىعى مەن حالىقارالىق قاتىناستار ۇلتتىق قاۋىمداستىعىنىڭ بوكوۆانىڭ كانديداتۋراسىن قولداعان جانە ونى ب ۇ ۇ باس حاتشىسى لاۋازىمىنا ۇسىنعان اشىق حاتى جاريالاندى.
بولگاريا پرەمەر-ءمينيسترى بويكو بوريسوۆ پەن سىرتقى ىستەر ءمينيسترى دانيەل ميتوۆقا جولدانعان قۇجاتتا بولگاريانىڭ بۇكىل الەمدىك ۇيىمداعى جانە الەمدىك ديپلوماتياداعى ساياسي سالماعىن ارتتىرۋدا «يرينا بوكوۆا - جاقسى مۇمكىندىك» دەپ اتاپ كورسەتىلگەن.
