قازاق سپورتشىلارىن بيىل قانداي جارىستار كۇتىپ تۇر؟
ال ەسىگىن ايقارا اشقان مەشىن جىلى وليمپيادا ويىندارى وتەتىنى بارشامىزعا بەلگىلى. سوندىقتان، بيىلعى جىل ناعىز سپورتتىق باسەكەلەرگە تولى بولاتىنى انىق. وتكەن جىلى وليمپياداعا جولداما الا الماعان سپورتشىلار بيىل بارىن سالىپ، جولداما ءۇشىن كۇرەسەتىنى بەلگىلى. ولاي بولسا، 2016-جىلى قانداي ءىرى سپورتتىق دودالار وتەدى؟
بيىلعى جىلدىڭ ەڭ باستى دوداسى ءتورتجىلدىق دودا ريو وليمپياداسى ەكەنىن جوعارىدا اتاپ وتتىك. ريو-دە-جانەيرو وليمپياداسى 5-21- تامىز ارالىعىندا وتەدى. سونداي-اق، وسى ەلدە 7-18- قىركۇيەك ارالىعىندا پاراليمپيادا ويىندارى وتەتىنىن دە ۇمىتپاۋىمىز كەرەك.
قازىر قازاقستان قۇراماسى باستى دوداعا ەلۋگە جۋىق جولداما الىپ ۇلگەرگەن. بۇل سان ءالى دە از ەكەنى انىق. بۇل ولقىلىقتىڭ ورنىن 5- تامىزعا دەيىن تولىقتىرۋ باستى ماقساتىمىز. جالپى ريوعا قازاق ەلى جۇزدەن اسا سپورتشى اپارۋدى جوسپارلاپ وتىر.
بيىل فۋتزالدان ەۋروپا چەمپيوناتىنا قازاقستان قۇراماسى تۇڭعىش رەت قاتىسقالى وتىر. بۇل باسەكە 2-13- اقپان ارالىعىندا سەربيادا وتەدى. وندا جەرلەستەرىمىز رەسەي، حورۆاتيا كوماندالارىمەن ءبىر توپتا ونەر كورسەتەدى.
وسى جىلدىڭ تاعى ءبىر باستى دودالارىنىڭ ءبىرى - ليللەحامەردە (نورۆەگيا) وتەتىن جاسوسپىرىمدەر اراسىنداعى قىسقى وليمپيادا ويىندارى. بۇل باسەكە كەلەسى ايدىڭ سوڭىندا، ناقتىراق ايتساق 12-21- اقپان ارالىعىندا وتەدى. بۇل جارىسقا وتكەن جىلى جۇلدىزداي جارقىراپ، كوپتەگەن سايىستاردا جەڭىس تۇعىرىنان كورىنگەن قارشاداي قىزىمىز مانەرلەپ سىرعاناۋشى ەليزابەت تۇرسىنبايەۆا مەن كونكيدەن جاسوسپىرىمدەر اراسىنداعى الەم كۋبوگى كەزەڭدەرىنىڭ جۇلدەگەرى ستانيسلاۆ پالكين قاتىسادى دەپ كۇتىلۋدە.
16-21 اقپاندا تايپەيدە مانەرلەپ سىرعاناۋدان امەريكا، ازيا، اۆستراليا جانە افريكا سپورتشىلارى قاتىساتىن «ءتورت قۇرلىق چەمپيوناتىنىڭ» الاۋى تۇتانادى. وتكەن جىلى بۇل دوداعا قازاقستاننان دەنيس تەن قاتىسىپ، باس جۇلدەنى ەنشىلەپ قايتقان بولاتىن. تەن بيىل دا وسى جارىسقا قاتىسادى. سونىمەن قاتار دەنيس تەن بوستوندا (ا ق ش) ناۋرىزدىڭ 28 ءى مەن ءساۋىردىڭ 3 ءى ارالىعىندا وتەتىن الەم چەمپيوناتىنا دا قاتىسىپ، باعىن سىناماق.
ال 11-15- ناۋرىزدا سەۋلدە (وڭتۇستىك كورەيا) شورت-ترەكتەن الەم چەمپيوناتى وتەدى. بۇل بىرىنشىلىككە قازاقستان قۇراماسى ءتورت ەر، ەكى ايەل سپورتشى اپارۋدى كوزدەپ وتىر.
6-22- مامىر ارالىعىندا رەسەيدە شايبالى حوككەيدەن الەم چەمپيوناتى وتەدى. بۇل سىندا قازاقستان ەرلەر قۇراماسى ونەر كورسەتەدى. قازاقستان توپتىق كەزەڭدە رەسەي، شۆەتسيا، چەحيا، شۆەيتساريا، لاتۆيا، نورۆەگيا، دانيامەن وينايدى.
19-27- مامىر ارالىعىندا استانادا بوكستان ايەلدەر اراسىندا الەم بىرىنشىلىگى وتەدى. بۇل بىرىنشىلىكتە ريو-دە-جانەيرو وليمپياداسىنىڭ جولدامالارى ساراپقا سالىنادى. ءبىزدىڭ ارۋلارىمىز ءوز ەلىمىزدە وتەتىن بايراقتى باسەكەدە جەرگىلىكتى جانكۇيەرلەرىمىزدىڭ مەرەيىن ۇستەم ەتەدى دەگەن ۇمىتتەمىز. ريو وليمپياداسىنىڭ جولداماسى ساراپقا سالىناتىن تاعى ءبىر دودا 22-29- مامىر ارالىعىندا ماسكەۋدە وتەدى. وندا قازىرگى بەسسايىستان الەم بىرىنشىلىگى وتەدى. بۇل دوداعا دا قازاقستان قۇراماسى قاتىسادى.
26-30- قاڭتاردا جاپونيادا ۆەلوسپورتتان ازيا چەمپيوناتىنىڭ جالاۋى جەلبىرەيدى. بۇل باسەكەدە باعى جانعاندار ريو-دە-جانەيرو وليمپياداسىنىڭ جولداماسىن قالتاسىنا باسادى. بۇل سىنعا قازاقستان ايەلدەر قۇراماسى تولىق قۇرامدا قاتىسىپ، وليمپيادا ليتسەنزياسىنا تالاسادى.
اقپاننىڭ 17 ءسى مەن 21 ءى ارالىعىندا تايلاندتا كۇرەستەن ازيا چەمپيوناتى وتەدى. سونداي-اق، 18-20- ناۋرىز كۇندەرى استانادا وتەتىن ازيالىق وليمپياداعا ىرىكتەۋ تۋرنيرىندە ريو جولداماسى تاراتىلادى.
13-18- ساۋىردە ۋسي قالاسىندا (قىتاي) سەمسەرلەسۋدەن ازيا بىرىنشىلىگى ءوتىپ، وليمپيادا جولداماسى ساراپقا سالىنادى.
19-20- ساۋىردە مانيلادا (فيليپپين) ازيا قۇرلىعىنىڭ تاەكۆوندوشىلارى وليمپيادا جولداماسى تاراتىلاتىن جارىسقا قاتىسادى. بۇل جارىسقا قازاقستان تولىق قۇرامدا بارماق.
25-30- ساۋىردە تاشكەنتتە (وزبەكستان) اۋىر اتلەتيكادان ازيا چەمپيوناتى ۇيىمداستىرىلادى.
قازاقستان قۇراماسى مامىردىڭ 28 ءى مەن ماۋسىمنىڭ 1 ءى ارالىعىندا جاپونيادا وتەتىن ترياتلوننان قۇرلىق بىرىنشىلىگىندە دە وليمپيادا جولداماسىن الۋعا تالاسادى.
مىنە، بيىلعى جىلدىڭ باستى دودالارى وسىلار. ءبىزدىڭ سپورتشىلار ءۇشىن جىل اسا تارتىستى بولماق. ەڭ باستىسى وليمپيادا ويىندارىندا ۇزدىك ونەر كورسەتۋ.
كۇنسۇلتان وتارباي
