جەتى جاسار قىزدى زورلىقشىلدان قۇتقارىپ قالعان جاۋىنگەرگە قۇرمەت كورسەتىلدى

اۋدان باسشىسى اسكەري بورىشىن ابىرويلى وتەپ، اۋىلعا ورالعان ساربازعا جانە وسىنداي ۇل تاربيەلەگەن اناسى قىمبات مۇحامبەتوۆاعا يگى لەبىزىن ءبىلدىرىپ، قايىربولاتتىڭ ءوز پارىزىن ادال ورىنداعانى بارشا جاستارعا ۇلگى ەكەندىگىن اتاپ كورسەتتى. ول ق. زاكاريەۆكە العىسحات جانە ەستەلىك سىيلىق تابىس ەتتى.

ايتا كەتەيىك، وقيعا وتكەن قازان ايى كۇندەرىنىڭ بىرىندە بولعان ەدى. قايىربولات پەن ونىڭ جولداسى ۆيتالي شپاكۋروۆ بوس ۋاقىتتارىنان سوڭ بولىمگە كەلە جاتىپ، جولدى قىسقارتۋ ءۇشىن ءبىر تاسالاۋ جەرلەردەگى اۆتوگاراجدار ماڭىنان وتكەندە، ەكى كۇماندى ادامدى بايقايدى. ولاردىڭ ءشۇبالانۋى دۇرىس بولىپ شىقتى. الگى ەكەۋى 7 جاسار قىزعا ءزابىر كورسەتپەكشى بولعان. بىرەۋىن ۇلاندىقتار تاپ سول جەردە تىرپ ەتكىزبەي ۇستايدى، قاشىپ قۇتىلماقشى بولعان ەكىنشىسىن كومەككە جەتكەن پوليتسيا قىزمەتكەرلەرى تۇزاقتايدى.

وسىنداي قىراعىلىعى ءۇشىن قايىربولات پەن ۆيتالي «ۇلتتىق ۇلان قىزمەتىنىڭ ۇزدىكتەرى» بەلگىسىمەن جانە باسشىلىقتىڭ العىسىمەن كوتەرمەلەندى. ال قىزدىڭ اتا-اناسى بۇل جىگىتتەردى قوناققا شاقىرىپ، ءارقايسىسىنا قول ساعاتىن سىيلادى.

ق. زاكاريەۆ - اقجايىق اۋدانىنداعى اقجول اۋىلدىق وكرۋگىنىڭ تۇلەگى. ول ۇلى جەڭىستىڭ 70 جىلدىعىنا وراي ەلوردادا وتكەن اسكەري شەرۋگە قاتىستى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى