تۇرمەدەن قاشقان اسا قاۋىپتى قىلمىسكەرلەرمەن اتىستا ەكى پوليتسەي جارالاندى
بۇل تۋرالى بەيسەنبى كۇنى جۋرناليستەرگە جاندارمەريا وكىلدەرى ءمالىم ەتتى دەپ حابارلادى ت ا س س.
ولاردىڭ مالىمەتتەرىنشە، قاشىپ جۇرگەن مارتين لاناتتا، كريستيان لاناتتا جانە ۆيكتور سكيللاچي سانتا-فە پروۆينتسياسىنداعى كوروندا قالاسى ماڭىندا ءتارتىپ ساقشىلارىنا وق جاۋدىرعان. اتىستان كەيىن قىلمىسكەرلەردىڭ سىتىلىپ كەتۋىنىڭ ءساتى تۇسكەن. پوليتسەيلەر اۋرۋحاناعا جەتكىزىلدى. ولاردىڭ ءبىرىنىڭ جاعدايى اۋىر، ال ەكىنشىسىنىڭ ومىرىنە قاۋىپ جوق.
ارگەنتينا قاۋىپسىزدىك ءمينيسترى پاتريسيا بۋللريچ شۇعىل وقيعا ورنىنا اتتاندى. بۇدان بۇرىن حالىقارالىق ىزدەۋ جاريالانعان قىلمىسكەرلەردى ۇستاۋعا 500 ءتارتىپ ساقشىسى تارتىلعان بولاتىن.
ەسكە سالا كەتسەك، ەسىرتكى مافياسىمەن تىعىز بايلانىستا بولعان قىلمىسكەرلەر ءۇش رەت ادام ولتىرگەندىكتەرى ءۇشىن ءومىر بويى باس بوستاندىقتارىنان ايىرىلعان. تەرگەۋ بولجامىنىڭ ءبىر نۇسقاسى بويىنشا، ولاردىڭ بۋەنوس-ايرەس پروۆينتسياسىنداعى قاتاڭ رەجىمدەگى تۇرمەدەن قاشىپ شىعۋلارىنا سونداعى قىزمەتكەرلەردىڭ ءبىرى كومەكتەسكەن.
