الماتى جۇرتشىلىعى بەلگىلى كينواكتەر مەڭتاي وتەپبەرگەنوۆتى اقتىق ساپارعا شىعارىپ سالدى
جامبىل اتىنداعى قازاق مەملەكەتتىك فيلارمونياسىندا وتكەن قارالى جيىنعا مەڭتاي اعانىڭ تۋعان- تۋىستارى، ونەردەگى بىرگە ىستەسكەن ارىپتەستەرى، ۇزەڭگىلەس دوستارى، كينو جانە تەاتر اكتەرلەرى، الماتى قالاسى اكىمدىگىنىڭ وكىلدەرى، ونەر قايراتكەرلەرى جانە قالا تۇرعىندارى كەلىپ، مارقۇمنىڭ وتباسىنا كوڭىل ايتىپ، قايعىلارىنا ورتاقتاستى.
قارالى جيىندى جۇرگىزگەن ق ر ەڭبەك سىڭىرگەن مادەنيەت قايراتكەرى، اكتەر بولات ءابدىلمانوۆ الدىمەن ق ر قورعانىس ءمينيسترى يمانعالي تاسماعامبەتوۆتىڭ جىبەرگەن جەدەل حاتىن وقىدى.
«مەڭتاي سماعۇل ۇلى وتەپبەرگەنوۆ ءوزىنىڭ بۇكىل سانالى عۇمىرىن قازاق ونەرىنە ارناعان ءبىرتۋار جان ەدى. ول ءوزىنىڭ قاجىرلى ەڭبەگىمەن، تالانتىمەن كينو ونەرىنىڭ شىرقاۋ بيىگىنە كوتەرىلدى، جارىق جۇلدىزىنا اينالدى. ۇلتتىق كينو ونەرىنە ولشەۋسىز ۇلەس قوسىپ، ەل رۋحانياتىن ەسەلەۋ جولىندا تىنباي ەڭبەك ەتتى. ونىڭ ءومىرى مەن ونەرى بارشا جاماعاتقا، تۇتاستاي ۇرپاققا ۇلگى»، - دەلىنگەن جەدەلحاتتا.
بۇدان كەيىن ءسوز العان الماتى قالاسى اكىمىنىڭ ورىنباسارى ارمان قىرىقبايەۆ قالا اكىمى باۋىرجان بايبەكتىڭ اتىنان مارقۇمنىڭ وتباسىنا كوڭىل ايتتى.
سونىمەن قاتار، قارالى جيىن بارىسىندا «قازاقپارات» تىلشىسىنە بەرگەن سۇحباتىندا بەلگىلى كينو رەجيسسەر ەركىن راقىشيەۆ مەڭتاي اعانىڭ فيلمدەردە كوبىنەسە جاعىمسىز كەيىپكەرلەردى سومداعانىمەن ومىردە جانى جايساڭ، كوڭىلى كەڭ ادام بولعاندىعىن ەسىنە الدى.
«مەڭتاي اعا قازاقتىڭ كينو ونەرىندەگى شوقتىعى بيىك جۇلدىزداردىڭ ءبىرى بولدى. كينودا كوبىنەسە جاعىمسىز كەيىپكەرلەردى سومدادى. وتە شىنايى سومدايتىنى سونشالىق، شىنىمەن سەنىپ قالاتىنسىڭ. «اپىراي، نەتكەن ءتۇسى سۋىق، نەتكەن قاتىگەز ادام!» - دەپ ويلايسىڭ. ال ومىردە ول كىسى جانى جايساڭ، ءبىر كەرەمەت ادام بولاتىن. ول مەنىڭ «ايشا» دەگەن فيلمىمدە دە جاعىمسىز كەيىپكەردى وينادى. سوندا جاقىن تانىستىق. سوندا ونىڭ ناعىز قازاقي مىنەزدى، كوڭىلى كەڭ، شۋاقتى ادام ەكەنىن كورىپ ءتانتى بولدىم. كەرەمەت قالجىڭداساتىن. شىنىن ايتۋ كەرەك، مەڭتاي اعا ءوزىنىڭ دەڭگەيىنە لايىق اتاق- دارەجە الا الماي كەتتى. «ءبىر جاقسى رولدەردى سومداسام» دەگەن ارماندارى بار ەدى. امال قانشا، اسىل اعامىزدان ايرىلىپ وتىرمىز. جانى ءجانناتتا بولسىن. ونىڭ جاساماعان جاسىن، ارتىنداعى ۇرپاقتارى جاساسىن»، - دەدى ە. راقىشيەۆ.
اۆتور: جاپپاربەرگەن ايبوتا
