قازاقستان اۋىر اتلەتتەرىنىڭ دوپينگ داۋىنا قاتىستى ماسەلە كۇردەلەنە ءتۇستى
ءتىپتى حالىقارالىق اۋىر اتلەتيكا فەدەراتسياسىنا قارسى مالىمدەمە دە جاسالماعان. اتلەتتەرگە اراشا بولماسا، بيىل وتەتىن جازعى وليمپياداعا جاسۇلان قىدىربايەۆ، الماس وتەشوۆ سىندى باستى فاۆوريتتەر بارماي قالۋى عاجاپ ەمەس.
فەدەراتسيا مونرەال زەرتحاناسىنىڭ شەشىمىنە قارسى مالىمدەمە جاساۋدان باس تارتقان. ءتىپتى ماڭىزدى ناتيجە شىعاراتىن ب سىناماسىن وتكىزبەۋگە ءوتىنىش بەرىپتى. سەبەبى ول تاعى دا سول زەرتحانادا جاسالادى.
فەدەراتسيانىڭ ايتۋىنشا، ءوز ىشىمىزدە كوميسسيا تاعايىنداپ، جاسالعان ساراپتاما ناتيجەسىن حالىقارالىق فەدەراتسياعا جىبەرىپ، ناقتى شەشىمدى كۇتەدى. سونداي- اق اتلەتتەردىڭ قانىنا دوپينگ باسقا جولدارمەن ءتۇسۋى مۇمكىن.
اتى شۋلى پروتسەسكە ەكى دۇركىن وليمپيادا چەمپيونى يليا يلين دە پىكىرىن ءبىلدىردى.
«مەنىڭ ويىم وزىمىزدە تەكسەرگەنى دۇرىس. ءبىزدىڭ باسشىلىق قازىر سپورتتان شەتتەتۋ نەمەسە ۇلكەن كولەمدەگى ايىپپۇل بولماس ءۇشىن وسى ىسپەن دۇرىستاپ اينالىسىپ جاتىر. سەبەبى جاس سپورتشىلاردى قورعاپ قالۋ كەرەك»، - دەيدى يليا.
ق ر اۋىر اتلەتيكا فەدەراتسياسىنىڭ باس حاتشىسى ومار مۇستافيننىڭ سوزىنشە، ەلىمىزدە زاڭدىق ءبىلىم بار، بىزدە مۇمكىندىك تە بار. وتاندىق ماماندار اتلەتتەردىڭ اعزاسىنا دوپينگتىڭ قالاي تۇسكەنىن انىقتايدى.
كەيبىر رۇقسات ەتىلگەن تاعامدار مەن ءدارى- دارمەكتەردىڭ قۇرامىنان دا شىعۋى مۇمكىن. بۇل سپورتشىلاردىڭ كىناسى بولمايدى. ەگەر سولاي بولسا، مينيمالدى ايىپ سالىنادى.
جاعداي ەكى ۇشتى بولىپ تۇرعانمەن، جارىسقا قاتىسۋدان ۋاقىتشا شەتتەتىلگەن جىگىتتەر جاتتىعۋ وتكىزىپ، وليمپياداعا دايىندىقتى باستاپ كەتىپتى. وزدەرىنىڭ اقتىعىنا، فەدەراتسيانىڭ ىسكەرلىگىنە سەنەتىندەي.
ال ۇلتتىق قۇرامانىڭ باس جاتتىقتىرۋشىسى الەكسەي ني بىرنەشە زىلتەمىرشىلەرىنەن دوپينگ تابىلعان رەسەي تارابى دا بۇل ماسەلەمەن بەلسەندى تۇردە اينالىسىپ جاتقانىن ايتادى.
قازىردىڭ وزىندە دوپينگ تابىلعانى ءۇشىن قازاقستانعا 50000 دوللار ايىپپۇل سالىندى. حالىقارالىق اۋىر اتلەتيكا فەدەراتسياسى ەگەر زىلتەمىرشىلەردىڭ دوپينگتى ادەيى قابىلداعانىن تۇپكىلىكتى تۇردە دالەلدەسە، وندا جاسۇلان مەن الماس ەكى جىلعا سپورتتان شەتتەتىپ، ريو- دە- جانەيروداعى وليمپياداعا بارمايدى. ونداي جاعدايدا ەلىمىزدەگى بەدەلدى سپورت ءتۇرى اۋىر اتلەتيكا فەدەراتسياسىنىڭ ابىرويىنا نۇقسان كەلەرى انىق.
