روجدەستۆو مەيرامى دا ادامزاتتى ىزگىلىك پەن كەلىسىمگە ۇندەيدى - انتونيي، ورال جانە اقتوبە ارحيەپيسكوپى
ول ەلىمىزدەگى ادامگەرشىلىك قۇندىلىقتارىنا ساي كەلەدى. بۇل تۋرالى ورال جانە اقتوبە ارحيەپيسكوپى انتونيي اكەي ءمالىم ەتتى.
ونىڭ ايتۋىنشا، روجدەستۆو قۇرمەتىنە ورال قالاسىندا مەرەكەلىك شارالار جوسپارلانعان. مىسالى، ا. وستروۆسكي اتىنداعى وبلىستىق ورىس دراما تەاترىندا بالالار ءۇشىن شىرشا ۇيىمداستىرىلادى. وندا ۇلتىنا قاراماستان، وسىندا كەلگەن بارلىق بۇلدىرشىندەرگە سىيلىقتار تاراتىلادى. كەشكىسىن تەاتردا مەرەكەلىك كونسەرت قويىلماق. قازاقستاندا بارلىق ءدىني، رۋحاني مەيرامداردى اتاپ وتۋگە تولىق جاعداي جاسالعان. بارشا ۇلت وكىلدەرى تاتۋ- ءتاتتى ءومىر سۇرۋدە. بۇعان الەمدىك دىندەر كوشباسشىلارى سەزىنىڭ استانادا ءوتۋى دە يگى اسەرىن تيگىزۋدە.
«ءبىز ەلباسى ساياساتىن تولىق قولداي وتىرىپ، قازاقستاننىڭ بەيبىتشىلىك سۇيگىش ەل ەكەندىگىن الەمگە تانىتۋعا ۇلەس قوسا ءبىلۋىمىز كەرەك. ەشقانداي ءدىن ادامعا قيانات جاساۋعا شاقىرمايدى. قايتا بەيبىتشىلىك پەن كەلىسىمدى جوعارى قويادى. سوندىقتان ءبىز بىرلىگىمىزدى نىعايتىپ، ءبىر- بىرىمىزگە دەگەن قۇرمەت سەزىمىن بايىتا بەرۋىمىز قاجەت. روجدەستۆو مەيرامىمەن قۇتتىقتاي وتىرىپ، قاسيەتتى قازاق جەرىندە تىنىشتىق پەن تۇراقتىلىق سالتانات قۇرا بەرۋىن تىلەيمىن»، دەدى انتوني اكەي.
ايتا كەتەيىك، بيىل ورال ەپارحياسى ءوزىنىڭ 25 جىلدىق مەرەيتويىن اتاپ وتپەك. پاسحا مەيرامىنان كەيىن بولاتىن بۇل شارالارعا قازاقستان قالالارى مەن رەسەيدىڭ كورشىلەس وبلىستارىنان مەيماندار كەلمەك.
اۆتور: ەلجان ەرالى
