قازاقستاندا شەتەل ۆاليۋتاسىندا يپوتەكا بەرۋگە تىيىم سالىندى
بىلتىر يپوتەكالىق نەسيەنىڭ كولەمى 1 تريلليون 33 ميلليارد تەڭگەنى قۇرادى. ونىڭ 150 ميللياردى، ياعني 14 پايىزى شەتەل ۆاليۋتاسىمەن بەرىلگەن.
بۇگىندە باسپانا ماسەلەسى بارشانى الاڭداتادى. ءۇي-كۇيسىز جۇرگەندەردىڭ كوبى قالتانىڭ جۇقالىعىنان پاتەر جالداسا، ءبىرى تۋىسىن جاعالاپ ءجۇر. ال جالدامالى باسپانا الەگىنەن جالىققان ازاماتتار يپوتەكا جولىمەن تۇرعىن ءۇي الۋدا.
ەندى جەكە تۇلعانىڭ سوڭعى التى ايداعى كىرىس كوزى شەتەلدىك ۆاليۋتادا بولماسا، بانكتەر يپوتەكالىق نەسيەنى ا ق ش دوللارىمەن بەرۋدەن باس تارتادى.
يمان ءال-كەيسي، ق ر ۇلتتىق بانكىنىڭ باسقارما باسشىسى:
- كەزىندە كوپتەگەن ادامدى شەتەل ۆاليۋتاسىندا بەرىلگەن نەسيەنىڭ تومەن پايىزدىق مولشەرلەمەسى قىزىقتىردى. ال بۇگىن ولار قارىزىن وتەي الماي وتىر. ويتكەنى ەكونوميكالىق احۋال مۇلدە وزگەردى. ءبىز ەل ازاماتتارىنىڭ قۇقىعىن قورعاۋ ماقساتىندا بۇل جوبانى قولعا الدىق. ەگەر ءسىزدىڭ كىرىسىڭىز تەڭگەمەن بولسا، تولەمدەر دە ۇلتتىق ۆاليۋتادا جاسالۋى ءتيىس.
بىلتىر يپوتەكالىق نەسيەنىڭ كولەمى 1 تريلليون 33 ميلليارد تەڭگەنى قۇرادى. ونىڭ 882 ميللياردى ۇلتتىق، ال 150 ميللياردى، ياعني 14 پايىزى شەتەل ۆاليۋتاسىمەن بەرىلگەن. ەكونوميكا عىلىمدارىنىڭ دوكتورى ۆياچەسلاۆ دودونوۆ شەتەل ۆاليۋتاسىندا بەرىلەتىن نەسيە كولەمىن بىرتىندەپ ازايتقان ءجون بولار ەدى دەپ وتىر.
ۆياچەسلاۆ دودونوۆ، ەكونوميكا عىلىمدارىنىڭ دوكتورى:
- وتە جىلدام جۇزەگە اساتىن باستاما ءوزىنىڭ كەرى اسەرىن كورسەتۋى مۇمكىن. ءتىپتى كەز كەلگەن نەسيە ءتۇرىنىڭ ازايۋ قاۋپى بار. قازىرگى داعدارىس جاعدايىندا بۇل جايت ەل ەكونوميكاسىنا وڭ اسەر ەتپەيدى. سەبەبى نەسيە - ەكونوميكالىق دامۋدىڭ قوزعاۋشى كۇشتەرىنىڭ ءبىرى.
تەڭگە بويىنشا پايىزدىق مولشەرلەمەنىڭ جوعارى بولۋى يپوتەكا جولىمەن باسپانا الۋدى قيىنداتا تۇسەدى. ۆياچەسلاۆ دودونوۆ قازىرگى ەكونوميكالىق احۋالدى ەسكەرە وتىرىپ، ەل ازاماتتارىن جاۋاپكەرشىلىككە شاقىرادى. بانكتەن الىنعان نەسيە مولشەرى قالتاداعى قاراجاتقا ساي بولۋى ءتيىس.
ال دوللاردىڭ كۇرت شارىقتاۋىنان زارداپ شەگىپ، دارمەنسىز جاعدايعا تاپ بولعان تۇرعىندارعا مەملەكەت قولداۋ كورسەتپەكشى. ۇلتتىق بانك 2004-2009-جىلدار ارالىعىندا بەرىلگەن تۇرعىن ۇيلەردىڭ نەسيەسىن قايتا قارجىلاندىرۋ باعدارلاماسىن ازىرلەۋدە.
ۆياچەسلاۆ دودونوۆ، ەكونوميكا عىلىمدارىنىڭ دوكتورى:
- مەملەكەت تاراپىنان يپوتەكالىق نەسيەلەردى قايتا قارجىلاندىرۋ - بانكتەر ءۇشىن ءتيىمدى جوبا. پروبلەمالىق نەسيەلەر قاتارىنىڭ كوپ بولۋى بانكتىڭ مارتەبەسىنە، قارجىلىق كورسەتكىشتەرىنە كەرى اسەر ەتەدى.
ال جەكە تۇلعالار ءۇشىن بۇل باعدارلاما جىلدىق پايىزدىق مولشەرلەمەنى %3 عا دەيىن تومەندەتۋگە، سونداي-اق شەتەل ۆاليۋتاسىندا الىنعان نەسيەنى تەڭگەگە اۋىستىرۋعا مۇمكىندىك بەرەدى.
يپوتەكالىق نەسيەلەردى قايتا قارجىلاندىرۋ بويىنشا 14 مىڭنان استام ءوتىنىش كەلىپ ءتۇستى. ونىڭ 9 مىڭى قولداۋ تاپتى. ايتا كەتەيىك، باعدارلامانى جۇزەگە اسىرۋعا 130 ميلليارد تەڭگە ءبولىندى.
www.24.kz
