عىلىم مەن ءبىلىم كوكجيەگىندەگى قازاقستان مەن پولشا
ولاردىڭ كەيبىرى ۇزاق مەرزىمدى ايداۋعا تۇسكەن پولياك ۇلت ازاتتىق قوزعالىستارىنىڭ وكىلدەرى بولسا، بازبىرەۋلەرى پاتشالىق رەسەيدىڭ وتارلىق داۋىرىندە قىزمەتتە، ال كەلەسى بىرەۋلەرى جەكە زەرتتەۋ جۇرگىزۋ بارىسىندا وزىندىك وشپەس ءىز قالدىرعان تۇلعالار.
ماسەلەن ادولف يانۋشكيەۆيچ (1803-1857)، گۋستاۆ زەلينسكي (1809-1881)، برونيسلاۆ زالەسكي (1819 نە 1820-1880)، سيەۆەرىن گروسس (1857- ءو. ج. ب)، يان ۆيتورت (1853-1903)، الەكساندر زاتايەۆيچ (1869-1936) سىندى ساياحاتشى ءبىرتۋار ازاماتتاردىڭ ەرەن ەڭبەكتەرى ەكى ەلدىڭ اراسىن جاقىنداتۋدا ماڭگى وشپەس مۇرا بولىپ قالا بەرەرى ھاق. دەگەنمەن، تاريحي، مادەني، ادەبي، رۋحاني بايلانىستار مۇنىمەن شەكتەلىپ قالعان جوق. ياعني وقۋ-اعارتۋ ماسەلەسى مەن عىلىمي الەۋەتتى ارتتىرۋ ماقساتىندا دا قوس ەلدىڭ جوعارى وقۋ ورىندارى تىعىز بايلانىس جاساۋدا.
ماسەلەن، مەن ادام ميتسكيەۆيچ اتىنداعى پوزنان ۋنيۆەرسيتەتى مەن ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ 2008-جىلى ءوزارا كەلىسىمشارت جاساۋى نەگىزىندە جانە «قازاقستاننىڭ جوعارى وقۋ ورىندارىنا شەتەلدەن مامانداردى شاقىرۋ» باعدارلاماسى بويىنشا، اتالعان وقۋ ورنىنىڭ «فيلولوگيا» جانە «تاريح» ماماندىعىنىڭ ماگيسترانتتارىنا 2015-جىلدىڭ 12- ساۋىرىنەن 26- ءساۋىر ارالىعىندا «قازاق-پولياك مادەني-تاريحي-ادەبي بايلانىس»، «پوستمودەرنيستىك ادەبيەت» جانە «XX عاسىرداعى قازاق ادەبيەتىنىڭ تاريحيلىق سيپاتى» پاندەرىنەن ءدارىس وقىپ، تاجىريبەلىك ساباقتار جۇرگىزىپ جانە سىلتەمە جاسالىناتىن حالىقارالىق Thomson Reuters, Scopus بازالارىنىڭ شارتتارى جايلى سەمينارلار ۇيىمداستىردىم.
سونىمەن قاتار وسى ۋاقىت ارالىعىندا ۋنيۆەرسيتەتتە وتكەن قازاقتىڭ ۇلى عالىمى، تاريحشى، ەتنوگروف، ساياحاتشى، «قۇيرىقتى جۇلدىزداي اعىپ تۇسكەن» شوقان ءۋاليحانوۆتىڭ 180 جىلدىعىنا جانە پروفەسسور و. ا. سۇلتانيايەۆتىڭ شىعارماشىلىعىنا ارنالعان حالىقارالىق عالىم عىلىمي-تاجىريبەلىك كونفەرەنتسيالاردىڭ پلەنارلىق ماجىلىستەرىندە باس بايانداما وقىپ، سەكتسيالىق وتىرىستارىنا ساراپشىلىق جاساپ، عىلىمي ورتادا وزىندىك پىكىر الماسۋ مۇمكىندىگىنە يە بولدىم.
سونىمەن قاتار وسى اتالعان كونفەرەنتسيالارعا رەسەيدىڭ، حاقاسيانىڭ، تاتارستاننىڭ جانە وتانىمىزدىڭ وقۋ ورىندارىنان عالىمداردىڭ ارنايى كەلىپ، باياندامالارىن وقۋى دا ەرەكشە سيپاتتا بولدى دەپ ەسەپتەيمىن بۇل ورايدا، ايتىپ كەتەتىن جايت، ارقا وڭىرىندە ورنالاسقان ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ءبىلىم بەرۋ دەڭگەيى مەن عىلىمي الەۋەتىنىڭ كورسەتكىشى جوعارى، ساپالى ەكەندىگىن بايقادىم.
مۇنى، ءوز دارىستەرىمدى وقۋ بارىسىندا، ستۋدەنتتەر مەن ماگيسترانتتاردىڭ قىزىعۋشىلىقتارىنان، قويعان ۇتىمدى سۇراقتارى مەن كەز كەلگەن عىلىمداعى وزەكتى ماسەلەگە، جاڭالىقتارعا دەگەن كوزقاراستارىنان، پىكىر-تۇجىرىمدارىنان تانىدىم.
بۇل ارينە، وقىتۋشىلىق- پروفەسسورلىق قۇرامنىڭ جۇيەلى ءارى ساپالى ءبىلىم بەرۋىنىڭ ارقاسىندا دەپ بىلەمىن. ال ءدال سونداي ءبىلىمدى دە بىلىكتى عالىمداردىڭ ۇيىمداسۋى، ۋنيۆەرسيتەتتىڭ زامانۋي تەحنيكالىق، يننوۆاتسيالىق قۇرالدارمەن قامتاماسىزداندىرىلىپ، شەتەلدەن مامانداردى شاقىرىپ، ءوزارا تاجىريبە الماسۋ الاڭىن جاساعان، قازاق ەلىنىڭ عىلىمنا بەي-جاي قاراماعان وقۋ ورنىنىڭ رەكتورى، پروفەسسور ءا. ءا. ءابجاپپاروۆتىڭ ىسكەرلىگىنىڭ ارقاسى.
سول ءۇشىن ۋنيۆەرسيتەت باسشىلىعىنا العىسىم شەكسىز. ەندەشە، تاعدىرى تامىرلاس قازاقستان مەن پولشانىڭ عىلىمى، ءبىلىمى دە تامىرلاس بولىپ، عىلىمي، مادەني ورتادا ايتارىمىز بەن جازارىمىز كوپ بولسىن دەمەكپىن.
اقتاي گۇلايحان، ادام ميتسكيەۆيچ اتىنداعى پوزنان ۋنيۆەرسيتەتىنىڭ، تۇركى، موڭعول، كورەيتانۋ ءبولىمىنىڭ قاۋىمداستىرىلعان پروفەسسورى، PhD (پولشا).
Baq.kz
